Maràn

MARÀN DE VALPOLESÉLA (Marano di Valpolicella)
Popolassión: 3.175 Altessa: 350 metri sóra el livèl del mar
Superfice: 18,62 chilometri quadri Comùni confinanti: Negràr, Sant'Ana d'Alfaedo, San Piéro Incarian, Fumane.

Comùne nel cor de la Valpoleséla tra la val de Fumane e quèla de Negràr conossù ànca come "La Césa" e con sede municipal in contrà Porta. Nel teritorio numarosi jè stà i reperti archeologiçi catadi come le folende, ceramiche, ossi, bronsi de epoca preistorica a Ravazzol, Boschetti, Monte Castèlon, San Rocco, Pizzol, Monte Per, Castèl Besin, Monte Noroni, Mondrago, Porcarola e Ciacalda, Covólo dei Pani ora in esposission al Museo de Verona, al Museo de Sant'Ana d'Alfaedo e a la Sóraintendesa a le Antichità de le Venesie. Scavi inissiadi ne l'800 da Stefano de Stefani e portà avanti da Olindo Falsirol, Raffaello Battaglia, Francesco Zorzi, Luciano Salzani e Leone Fasani. Sul Monte Castèlon de origine vulcanica, l'òmo l'è sempre stà presente da l'epoca preistorica fin al medioevo come ne pól dimostràr i resti de un castèlier de l'Età del Fero, costrussióni romane e una fortificassion medievàl. E sempre sul Castèlon 'ndóe 'desso gh'è el Santuario de Santa Maria Valverde, se vede i segni de un tempio romàn dedicà a Minerva, in pratica l'éra un importante çentro pagano e religioso no solo de la val ma de tuta la Valpoleséla, in quél tempo "Pagus" dei Arusnati. Infati fin a poco tempo fa la frassión San Roco, poco distante dal "tempio", l'éra ciamà "San Roco de Minerbe". Nel XIII secolo el castèl 'isto in precedensa, l'éra feudo del Conte de la Valpoleséla, Federico De la Scala cusin de Cangrande; ma nel 1325 quando Federico l'à proà a spodestar Cangrande che nel fratempo l'éra malà, l'è stà sconfito e mandà in esilio con la so faméja, butandoghe zò el castèl. Nel testamento del 1339, Federico el ricorda la sovranità che'l g'à avù ne la val "Iaborerium castri mei Marani" e tuto el formento restà da 'na parte ne la Valpoleséla. Nel '400 el Castèl de Maran el vien ricordà ne l'elenco de "Castra Veronae" e durante 'na visita pastoral de Ermolao Barbaro la cèsa de Santa Maria de Minerbe la se cata in "in Valleversa sive in castro". Secondo 'na legenda el castèl el g'avéa origini piassé antiche; nel 102 a.C. el console romàn Mario che l'avéa vinto contro i Cimbri ne la batàja dei Campi Raudi el s'à fermà a Verona e portà in trionfo dai Veronesi, decidendo subito dopo de costruìr un castèl in Valpoleséla, che vegnarà ciamà "Mariano" in so onòr. Gh'è ci dise che el nome del paese el possa derivàr da 'sta fola, piassé probabile che un çerto Marius el g'avesse dei teréni de propietà "Marianum". Dopo i Scaligeri l'è stà la 'òlta dei Venessiani, cossita Maran l'è stà le dipendense del Vicariado de la Valpoleséla con sede a San Piéro in Carian. A parte la peste del 1576 e del 1630 la vita sóto la Serenissima l'è andà avanti in tuta tranquilità. In 'sto periodo se vede la nàssita de numaròse vile come Vila Guantieri a Fasanara con pòrtego, lòsa e tór colombara, mentre el nucleo çentràl l'è del '400, afreschi e decorassioni del '500; a Canzago del '700 gh'è Vila Lorenzi e la maestosa Vila Rizzini con Oratorio de San Carlo. Altre vile interessanti a Valgatara de l'800 Graziani, Raisa-Rimini e Silvestri. Nel XIX secolo da segnalàr, sóto al dominio francese Maran l'è stà assegnà al Canton de San Piéro in Carian, da contàr ànca la presensa austriaca e nel 1866 sto comun l'è entrà a far parte del Regno d'Italia. Tra le cése da segnalàr la ceséta del XIII secolo in località Pozzo, arènte a la frassión Valgatara, dedicà a San Marco con afreschi de l'epoca e con tochi de pièra de origine romana; a Valgatara la parochiàl dedicà ai Santi Fermo e Rustico del XVII secolo e sgrandà nel'800 e '900; a Maran la cèsa parochiàl dedicà a San Piéro e Paolo del '900 con arènte la vècia cèsa del '700; el Santuario de Santa Maria Valverde sul Monte Castèlon el g'à origini antiche come ne dise un documento del 1184 S.Maria Menervii. L'atuàl Santuario l'è del 1682 come dise l'iscrission su l'altàr magior, mentre la statua lignea de la Madona col Butìn che i dise la sia miracolosa l'è stà costruida nel 1516 da la Compagnia de Santa Maria de Valverde del Castèl de Maran; a Puran l'Oratorio de San Giorgio ricordà in documenti del '400, con drénto 'na pala con rafigurà "San Giorgio che'l copa el drago" segnalà nel 1699, e 'na statua de San Gioàni Nep. documentà dal 1764. Se ve piase el vin, Ve convien far 'n salto da ste parti par béar un bòn Recioto vardando el magnifico paesagio quando i siresari jè in fior.