LA RENA DOMILA - DAL 1999 EL SITO VERONESE DEI VERONESI IN VERONESE

Comùne de la Bassa Veronese a 41 chilometri da Verona con le frassioni Anson, San Stefano, San Zén (Zénone) e Strepola Stopazzole (Stoppazzole). Minerbe la g'à origini pre-romaniche e 'l so nome el deriva da "Vicus Minervinus" par la presensa de un tempio pagan dedicado a la Dea Minerva. Infati ne la frassión de San Zénone l'è stà costruida la cèsa òmonima pròpio sóra al tempio (ghe resta solo l'epigrafe esposta su'l muro esterno de la cèsa atuàl) par ricordàr el Vescovo Zéno che l'à portado el cristianesimo nel paese. El teritorio l'è abitado fin da l' Epoca Paleoveneta come ne dimostra le tombe catade ne la necropoli de Compagnina e 'l monumento funebre de Lucilio de la tribù Romilia oltre a ucie, fibule, bracialeti con decorassioni in brónso. De epoca romana jè alcune tombe romane, du vaseti, anfore, biceri de vero, du vaseti e tri monéde in brónso catadi duante dei laori agricoli nel 1934 in località Ponte Alto. Storicamente Minerbe l'è stà de propietà de la curia veronese che el l'à concessa in feudo al monastero de San Michel de Campagna fin al 1199 quando l'è deventà comune con podestà. Con l'afermassion dei Scaligeri, el paese l'è deventà Vicariado dei Conti Bevilacqua con possibilità de trasmission ereditaria ai dissendenti, titolo confermado nel 1406 dal doge Steno de la Serenissima Republica de Venesia. numaròse jè stà i sachegi e le devastassioni come quéle del 1385 par opera de Franceschino de Caldonazzo, nel 1407 un poche de bande de farabuti le à messo sóto sóra el paese con la conseguente astension dal pagamento de le tasse su ordine de Venessia par çinque ani, nel 1509 durante la guera de Cambrai e infine nel 1776 la piéna de l'Àdese che par secoli l'è stà la disperassion dei minerbesi. Nel 1866 sóto el Regno d'Italia el paese l'è riussido a riciaparse un poco da le devastassioni con la noa fioridura de l'artigianado e l'agricoltura. Tra le cése, da segnalàr la cèsa parochiàl de San Lorenso del 1848-49 a tri navade con çinque altàri par parte e un campanìl a sié campane del 1859. Sóra l'arco de la porta çentràl gh'è la statua del santo patron del paese mentre drénto se pól amiràr i dipinti de Antonio Rebustini con la rapresentasion de un pochi de miracoli. La cèsa de Santa Lussia con fassàda in stile neoclassico e un altàr baroco l'è del XIV-XV secolo. Tra i primi documenti da segnalàr la visita del Vescovo Giberti nel 1526 a la cèsa e al'ospedal li tacà, dedicado a San Roco e Bastian. Ne la frassión San Stefano, da visitàr la ceséta òmonima, visitada più 'olte dal Vescovo Giberti tra el 1526 e 'l 1541 e che la dipendea inissialmente da l'abassia de San Gabriele de Cremona; inveçe la ceséta de la "Maternità de Maria" del 1858 la se cata ne la frassión Anson. Par finìr una tra le cése più antiche de la provincia veronese dedicada al "Vescovo moro", che l'esisteva za prima del X secolo, la se cata ne la frassión de San Zénone come dito in precedensa. Nominada come "pieve" nel 1035 l'è ricordà ne la bóla de Papa Eugenio III del 6 dugno 1145 "Plebem Sancti Zénonis cum capellis et decimis et curte" e citada in un diploma de l'imperadór Federico I del 1155. La cèsa atuàl l'è stà costruida nel 1818 e consacrada nel 1873 con fassàda in stile neobaroco su disegno de l'architeto Gioàni Salvi completada nel 1938. In più se pól amiràr una stupenda fonte batesimal de forma otagonal del 1454. Tra le i palassi e le vile, da segnalàr Palasso Beghinatus del 1705 dichiarà monumento nassional, el Palasso "La lòsa" una 'òlta sede municipal, Vila Spolverini "El Palasson" del XIV secolo con afreschi e sofiti in legno piturà, Vila Burzio del XIV secolo, Vila Leopardi del 1700 mente ne la frassión de San Stefano gh'è Vila Visconti 'na 'òlta residensa dei Visconti de Milan del XVII-XVIII secolo. In località Anson la Vila Spolverini-Buri-Bernini in stile Veneto, Vila Guariente "Aliata" e par finìr Vila Angiari ora sede del municipio de Minerbe. numaròse jè le corti come la Bernini-Cavazzocca "La Colombara", Domaglia, Corte Somaglia. Da visitàr in zona Campegio el Molin Rebustini uno tra i più antichi e ancora in funsion de Minerbe.