Montécia

MONTÉCIA (Montecchìa di Crosara)
Popolassión: 4.370 Altessa: 87 metri sóra el livèl del mar
Superfice: 21,06 chilometri quadri Comùni confinanti: Soave, Cassàn de Traméa, San Gioàni Lariòn, Roncà, Monteforte d'Alpón, Gambelara VI

Comùne de la Val d'Alpón sul confine con la provincia de Vicensa e travérsà dal progno Alpón che'l se butà ne l'Àdese a l'altessa de Albaredo. Quasi sicuramente l'origine del çentro abitado l'è romana, come i pól testimoniàr i tochi de costrussióni, lapidi e iscrissioni catade nel teritorio de la vècia "Monteculeta" ancò Montécia. El primo documento storico che'l parla de Montécia l'è del 951 quando el teritorio l'è deventà dei Vescovi de Vicensa, concesso col tempo in feudo ai Maltravérsi verso la fin del X secolo. In 'sto periodo nasse el vilaio fortificado fato come un castèl, ne la zona de la frassión atuàl Castèl in colina e se vede in un documento del 1076 i toponimi Montecleda/Monteclida che i deriva da Monscleda infati i abitanti i vien ciamadi Monscledensi o Montescledensi. Toponimo che podarìa avérghe el stesso significado de quél dei abitanti de Schio (Vi) ciamadi Scledensi, da aesculetum = bosco de leci in 'sto caso monte de leci. Verso la metà del XII secolo i vesentini par contrastar Pàdoa i à dimandà aiuto a Verona regalandoghe in cambio Cologna e Montécia. E sempre in 'sto secolo grandi lote tra Guelfi e Ghibelini con robarìe e fogo al castèl. Durante el dominio scaligero ànca Montécia l'à contribuido par la costrussión del palasso de giustissia de Soave, e pròpio in 'sto periodo el castèl l'è stà butà zo da Vinciguerra Sanbonifacio in lota coi Scaligeri. Nel '400 Maltravérso dei Maltravérsi l'à fato costruìr un ospedal ne la casa che'l g'avéa in Cà Castèl deventà col tempo 'na semplice casa de campagna. Dopo le dominassioni dei Visconti e dei Cararesi, nel 1439 l'è stà la 'òlta de la batàja de Bastia tra i milanesi con Nicolò Piccinino sconfiti da i venessiani con a capo Gioàni Pompei. Durante la Lega de Cambray da segnalàr qualche batàjanel teritorio e nei secoli dopo qualche episodio secondario sia coi francesi che con i austriaci. Nel teritorio, da segnalàr dal pónto de vista idrico, ànca el corso d'aqua Vienega che'l nasse da la sorgente che gh'è de drio a la cèsa parochiàl e se buta ne l'Alpón. Tra le cése no podémo no parlar de quèla dedicà a San Salvator del X secolo tacà al çimitero de Castèl, con statue in legno, afreschi del tri e quatrosento e tochi de pièra de epoca romana come colone e capitei. El campanìl e le absidi ne la cripta jè ancora originali ànca se ghe stà un fraco de modifiche nel corso dei ani a la cèsa. De fora podémo 'édar 'na scrita del XII secolo che la ne parla de la donassión de Uberto Maltravérsi a la cèsa. Poco distante se pól catàr la ceséta dei Santi Piéro e Biagio del '600. Da ricordàr la parochiàl de Santa Maria, progetada da Bartolomeo Giuliari e costruida nel XIX al posto de la vècia pieve. Tra le residense nobiliari dei patrissi venesiani ghe Vila Sapori e 'l Castèleto. Montécia 'na 'òlta l'éra famosa par le cave de basalto, ancò l'è conossuda par le sirése e la produssion dei vini Soave e Durèl.