Monteforte

MONTEFORTE (Monteforte d'Alpone)
Popolassión: 8.891 Altessa: 38 metri sóra el livèl del mar
Superfice: 20,47 chilometri quadri Comùni confinanti: Soave, San Bonifacio, Montécia de Crosara, Gambelara VI.

Monteforte, comun de la Val d'Alpón con le frassioni Brognoligo, Costalonga e Sarmaza al confìn con la provincia de Vicensa. Sul Monte Zopega tra Soave e Monteforte jè stà rinvegnudi de reperti preistoriçi de l'Età del Bronso e del Fero come scudèle e vasi mentre sul col de Sant'Antonio nel 1953 dei vasi de teracota. De epoca romana, tegnendo conto che el teritorio de Monteforte l'éra travérsà da la Via Postumia, jè stà catà 'ndóe 'desso gh'è la cèsa de Santa Crose dei copi e tochi de costrussióni mentre in località Fossa Dragon 'na tomba e monéde de l'Impero romàn. Sicuramente l'è in 'sta epoca, che 'l paese l'è stà fondà sicuramente sul col 'ndóe 'desso gh'è la céseta de Sant'Antonio par tegnér d'ocio l'importante l'arteria romana dal de sóra con 'na fortificassion. E pròpio in 'sta zona che nel X secolo a causa de le invasioni dei Ungari, el grande Re Berengario l'avéa concesso la costrussión de un opera de difesa. La roca nel XII l'è andà a finìr ne le mane de la faméja dei Sambonifacio e grassie a Federico Barbarossa ai Vescovi de Verona fin a l'arivo de Napoleón. Con l'arivo dei Scaligeri se vede le prime batàje vista la vicinansa con Soave, infati un çerto Vinciguera Sambonifacio l'à rebaltà el paese sóto sóra a l'inissio del '300 e nel 1338 Orlando de Rossi capitàn de l'esercito Venessian l'à messo a fero e fogo el paese. Dopo i Scaligeri, Monteforte d'Alpón l'è passà ai Venessiani lassando cossita come stà, l'aministrassion. E pròpio sóto la Serenissima nel XVI secolo Monteforte l'è stà coinvólto ne le batàje con la Lega de Cambrai. Nel XIX secolo jè passadi i eserciti austriaçi e francesi come nel resto de la provincia veronese. Tra le cése da segnalàr quèla de Sant'Antonio costruida sui resti del castèl ancora visibili, la presenta un "Cristo Moro" in legno del XVI secolo; la cèsa parochiàl dedicà a Santa Maria Magior costruida a partir dal 1805 su disegno de Bartolomeo Giuliari, ghe stà zontà el pronao nel 1868 e l'è stà finida con le decorassioni de Gioàni Bevilaqua nel 1904. Decorassioni mortali parché nel 1903 jè vegnudi zò malamente da le impalacadure Giusepe Zannoni e M. Rancani. Tra el 1894 e 1897 inveçe l'è stà costruì el campanìl considerà el piassé alto de la provincia Veronese (70 m circa). Drentro la cèsa podémo amira 'na tela del '500 de Girolamo Dai Libri la "Samaritana al pósso" e 'na "Visitassion" de Gioàni Caliari. Altra cèsa l'è quèla de Santa Maria Fossa Dragon del XV secolo al confìn de la parochia con afreschi del '300-'400 e 'ndóe nel 1567 jè rivè i Capucini restadi fin a l'800. Da un documento del 1473 risulta che arènte la cèsa gh'éra un romitorio. A Sarmaza gh'è l'antica cèsa de Santa Crose con afreschi del '300 mentre a Brognoligo gh'è la cèsa de San Stefano del 1838-41. Arènte a la cèsa parochiàl de Monteforte gh'è el Palasso Vescovil del XIV secolo con cortil interno con pòrtego a colone in marmo rosso e ne la capela podémo catàr 'na pala del '500 del Caroto: " ...il palazzo è un bell'esempio di quélle creazioni piéne di buon gusto proprie di quest'epoca, dove tutto, dai camini alle scale, alle porte, riceveva un'impronta caratteristica. Dappertutto è profuso l'anello gentilizio dei Barbaro... Un bèl saggio della costruzione interna si può avére nelle stanze al piano terra, ove ancor si vedono vólte a vela che hanno per chiave lo stemma Barbaro, porticine con mensole a foglia..." (L.Simeoni). A a genàr prima de inissiar la corsa podistica "Montefortiana" tra le piassé conossude al mondo, podì béar un gòto de vin Soave Classico (che ne la zona l'è bòn) a la nostra salute!