Rìole

RIOLE (Rivoli Veronese)
Popolassión: 2.180 Altessa: 191 metri sóra el livèl del mar
Superfice: 18,43 chilometri quadri Comùni confinanti: Brentìn, Cavrìn, Afi, Cavaión, Sant'Ambroso de Valpoleséla, Dolçè, Costermàn.

Comùne posissionà a l'inissio de la Val d'Àdese a monte de la "chiusa", ne la zona zona denominada "Tera dei Forti" e incoronà da el famoso "anfiteatro morenico" uno tra i piassé interessanti fenòmini naturali al mondo. Riole l'è abità fin dal Neolitico come ne pól dimostràr i reperti catadi in contrà Castèl come lame de folenda, ponte de freçe, tochi de vasi de teracota, un scheletro, 'na situla, na spada e na lancia spacà a metà, mentre altri resti i éra sul col 'ndóe 'desso gh'è el forte. Sóra a la Roca inveçe j è vegnù a la luçe i resti de 'n antico castèl medievàl che 'l gavéa funsioni de contról su la strada che vegnendo da Verona la menàva verso Trento. In origine l'éra 'na sempliçe costrussión de pièra e legno de forma quadrangolar col tempo sgrandà, usà tra el VI e 'l VII secolo a difesa de le invasioni dei franchi, a metà del XII secolo l'è servido da ostacolo ai eserciti stranieri come nel caso de l'imperadór Federico Barbarossa, dopo l'è stà riscatà dal Podestà de Verona Guglielmo da Orsa ritegnudo indispensabile par la difesa del teritorio veronese, mentre tra el 1380 e 'l 1410 l'è stà rimesso a posto e usà ne la guera tra Veronesi, Milanesi e Venessiani par el contról de la Val d'Àdese. Dopo tal data l'è stà abandonà del tuto e lassà al so destin. Sóto i Scaligeri e col tempo dei Venessiani no l'è sucesso gnente de particolar a parte el passàio dei Lanzichenechi nel 1526 e de l'imperadór Carlo V che l'avéa fato costruìr un ponte su l'Àdese nel 1530. 'Na data famosa in tuto el mondo l'è el 14 genàr 1797 quando gh'è stà la batàja de Riole tra francesi e austriaçi: 15.000 soldà de Napoleón insieme ai valorosi generai Joubert, Messena e Berthier, çircondà da 27.000 austriaçi guidà dal generàl Alvinczy, i è riussidi a rebaltàr la situassion portando la Francia a la vitoria. A ricordo de 'sta gloriosa batàja con 5556 òmini tra morti e feriti (2180 francesi e 3376 austriaçi), Napoleón l'à intitolà 'na via de Parigi "Rue de Rivóli" e sul campo de batàja l'à fato costruìr un monumento nel 1806 arènte a la frassión de Canal, costituido da 'na colona alta 20 metri de cui podémo amiràr solo el basamento parché i austriaçi i l'à butà zò el 12 febrar 1814 quando i s'à rifati vivi da 'ste bande. Par ci vól savér piassé su stà batàjaghe convien visitàr ne la piassa de Riole el fantastico forte de rìoleMuseo Napoleónico con documenti, reperti, cimeli, s-ciopi, divise militari, ricostrussióni storiche. Da 'ste parti parò, in epoca risorgimental ghe stà le batàje, quéle tra Piemontesi e Austriaçi. A ricordo de 'sto secolar passà militàr jè ancora in pié: el forte de Riole Wohlgenuth costruido a metà de l'800, modificado nel 1866 quando el Veneto l'è deventà Italian, invertendo el tiro verso nord-est; la bateria bassa costruida nel 1884 sul piassal a nord del forte; la tajada de Canal del 1884 costruida da l'esercito italian. 'De visitàr ànca el Museo de la Grande Guera drénto el forte de Riole, pién de reperti storici de la prima guera mondiàl che consijemo de visitàr parché unico ne la provincia veronese. Tra le cèsa da visitàr gh'è la parochiàl de Rìole dedicà a San Gioàni Batista del 1766 sui resti de 'na ceséta romanica del XII secolo con drénto tra le altre 'na pala del XVI secolo de Marco Antonio Scalabrino rafigurante la Madona, San Gioàni Batista e San Francesco in adorassion del Butìn Gesù; la parochiàl de Canal del 1681 l'è dedicà a San Luca Evangelista afresca nel 1921-22 e la fassàda restaurada nel 1975 con campanìl merlà; la ceséta romanica de San Zén a Canàl durante i bombardamenti de la 2a guera mondiàl l'è vegnù zò ma grassie a un grandioso restauro podémo amiràr el vècio campanìl e alcune parti de l'antica navada; la parochiàl de Gaión costruida nel 1951 in località Riolti, l'è dedicà a San Michèl Arcangelo; l'antica Pieve de San Michel o San Micheleto, ceséta romanica del XII secolo, deventà sagrestia quando l'è stà inglobà ne la cèsa parochiàl nel 1564, l'è vegnù zò ne la 2a guera mondiàl e s'à salvà solo la sagrestia e 'l campanìl con numarosi afreschi de la céseta romanica come quél de San Cristoforo del XII secolo. Prima de andàr al Concilio de Trento g'à celebrà 'na messa San Carlo Boromeo ospite de la faméja Gaiuni. Tra i palassi, vile e corti da segnalàr Palasso Becelli a Valdoneghe de sóra del XV secolo con pòrtego, fienil, stala e casa del castaldo; Vila Becelli a Valdoneghe de sóto con pòrtego e cecéta de San Lorenso del 1678; Palasso Torri a Possól del '600; Vila Cozza del '600 che secondo tradissión g'à sponsà Napoleón Bonaparte durante la batàja de Riole; tra le corti da segnalàr Corte Campana, casa de Francesco Calzolari (1522-1609) el famoso botanico «Speziale alla Campana d'oro» de Verona e autor del libreto «II viaggio di Monte Baldo, della magnifica Città di Verona»; Corte Fiffaro del '600 con stale, porteghi e tór colombara; Corte Bramante al çentro de Riole con caneve e pòrtego costruido coi resti del monumento de Napoleón; Corte Rizzoni del '700 con parco e case coloniche. E alora 'desso Ve resta che magnàr i sparasi che da 'ste parti jè boni e béar un bèl gòto de vin de la "Tera dei Forti" magari un Enantio a la nostra salute! Foto: forte de Riole