Roarè

ROARÈ (Roverè Veronese) - in cimbro Roveràit
Popolassión: 2.115 Altessa: 843 metri sóra el livèl del mar
Superfice: 36,55 chilometri quadri Comùni confinanti: Boscocesanoa, Gressana, Sèro Veronese, Selva de Progno, Velo Veronese, San Moro de Saline, Verona.

Comùne montano de la Lessinia a 25 km da Verona, con le frassioni San Francesco, San Roco de Piegara e San Vidàl; el teritorio comunàl l'è posissionà par tuta la so longhessa da nord a sud arènte a la Val Squaranto e partendo dal confìn col Comùn de Verona a 300 m.s.l.m. el se rampega ai 1575 m.s.l.m. El paese l'è nato sóra ai resti de un vilàio del Neolitico ànca se numaròse testimonianse le ne dise che l'òmo l'éra presente un fraco de tempo prima. De epoca romana l'è la statueta in brónso de Mercurio catà arènte la cèsa parochiàl, la lapide de un console oltre a medaje, monéde e vasi. El toponimo el deriva dal Rovere pianta classificada come Quercus Petraea de la faméja de le fagacee; da l'antico nome Roboreto risulta Rovereto e da la contrassión g'avémo Roverè. El legno 'isto la resistensa e la duressa l'è stà usà dal '200 al '400, par la costrussión de mobili de qualità, par costrussióni navali, par struture portanti e dal momento che'l brusava bèn, ànca come legna da camin e carbón vegetal. Nel XI secolo la zona a boschi e pascolo l'éra propietà de la Césa Veronese e la vegnéa fità, cossita nel 1287 el Vescovo Bartolomeo de la Scala, l'avéa ciamà e concesso a du tribù "Cimbre" (Tzimberer) provenienti dal Vesentin e originarie del Sud Tirolo, (con a capo Olderico de Altissimo e Olderico de la Curia Vesentina) dei teréni in "Roveré di Velo e siti finitimi" par disboscàr in parte e abitarghe. Roarè l'è stà el primo lógo de quèla parte de Lessinia colonisà dai Cimbri, coloni che, sempre piassé numarosi i à dovù slargarse verso altre zone de la "Montagna del Carbón". In un diploma de Cansignorio de la Scala del 25 febrar 1355 Roarè el faséa comune con Césanoa e Val de Poro e nel 1375 el Vescovo Piéro de la Scala l'à creà la parochia de la Ecclesia Nova destacandola da la cèsa de San Nicolò de Roarè mentre nel 1403 sóto i Visconti l'è stà zontà ne la lista dei Comùni del "Vicariado de la Montagna". Poco tempo dopo jè rivà i Venessiani che i à riconfermado l'autonomia ai cimbri, con privilegi e l'esension de le tasse in cambio de la vigilansa sui passi confinanti col Tirolo. Nel 1797 con con Napoleón l'antico "Vicariado de la Montagna" l'è stà sostituido dal "Distreto de la Montagna. Tra le cése da segnalàr quèla de Roaré dedicà a San Nicolò, parochia prima del 1375 e costruida ne la version atuàl tra el 1733 e 'l 1763 mentre de la vècia cèsa ghe restà solo el campanìl opera de Dòminico da Lugo del 1493; a San Vidàl prima de l'atuàl cèsa, ricostruida nel '900 gh'éra 'na capela consacrà nel 1372; a San Francesco nel 1630 gh'éra un capelan che dipendea da Roaré mentre la cèsa atuàl l'è stà costruida al posto de n'altra nel 1883 su disegno de Antonio Gaspari, campanìl del 1895 e parochia nel 1941; la cèsa de San Roco parochia dal 1648 ma de origini piassé antiche conserva 'na tela del '600 con rafigurà la Madona col Butìn con Angeli e Vergini opera de Dòminico Macacaro morto de peste nel 1630. E par ci ghe piase i fenòmini naturalistici de origine carsica, el pól andàr ne la "Grota del Monte Capriolo" (Roaré 1000) longa piassé de 200m bèn atressada, 'ndóe antiche fole ne parla de "orchi" e "fade"; sul Monte Purghestal (945 m.) jè stà rinvegnudi numarosi reperti de epoca romana mentre tra la çima e la contrà Maso de Sóra gh'è 'na sorgente de aqua mineral (con zolfo, fero e magnesio). Par lo sport invernàl consiliemo le magnifiche piste de sci nordico a Conca dei Parpari in un panorama magnifico. Magari fasendo quatro passi podì incontrar el Bartoldo, furbo montanàr nato da 'ste parti, che secondo tradissión l'è andà a Verona, deventando consilier e giulàr a la corte de Re Alboin......