Teràzo

TERASSO - TERAZO (Terrazzo)
Popolassión: 2.242 Altessa: 12 metri sóra el livèl del mar
Superfice: 20,53 chilometri quadri Comùni confinanti: Boschi Sant'Ana, Legnago, Castagnaro, Vilabartolomea, Bevilàqua, Badia Polesine RO, Merlara PD, Urbana PD, Castèlbaldo PD.

Comùn de la bassa veronese a na çinquantina de chilometri da Verona. La zona l'éra abitada fin da l'Età del Bronso come ne pól testimoniàr i resti de una grossa comunità catadi durante i scavi par la costrussión de le scole elementari in via Brazzetto. In epoca romana l'éra travérsàda da la strada consolar Emilia Altinate costruida dal console Marco Emilio Lepido nel 175 a.C. che partendo da la via Emilia la menàva al municipio romàn de Altino passando sóra l'Àdese a l'altessa de Montagnana e servendo i çentri de la zona. A testimoniansa de la presensa de 'sta strada, con dei rilevamenti aerei, l'è stà adocià el vècio traciado in mèso ai campi coltivadi fin a la frassión de Begosso. Con la piéna de l'Àdese e la conseguente "rotta della Cucca" antica denominasion de Veronèla, ne l'autuno 589 d.C. tuta la pianura veronese l'è stà modificada brutalmente. Le aque del fiume le avéa somerso la pianura veronese, lassando poche tere, zone sabiose e paludose, pròpio in quèla ocasion l'Àdese, che prima el passava tra Veronèla, Pàdoa e Este l'à cambià percorso bagnado el comune de Terasso. A la fine de l'ano mile in questi teritori desoladi e sachegiadi dai barbari, i çentri abitadi i éra gran pochi e pròpio da questi l'è scomincià l'opera de bonifica e l'atività dei campi. El paese el vien citado in un privilegio del 1145 con el quàl el Papa Eugenio III l'avéa confermà Tebaldo, Vescovo de Verona i diriti su la cèsa de Terasso "Ecclesiam Turracii cum decimis". Nel XII l'éra stà costruido un forte a difesa del teritorio con tanto de tóri e de queste ghe né rimasta una, simbolo del paese, infati el nome el deriva da Turracium. Nel 1234 el fortilizio el vien assaltado dal podestà de Verona Ruberto de Pii mandà da Eselin III da romàn ma con esito negativo. Terasso dopo èssar passà sóto la Serenissima nel 1405, nel 1514 durante la guera de Cambrai vien sachegià e devastà. Passà questo periodo la Republica Venessiana la pensa bèn de butar zò i ultimi albari rimasti, che in prinçipio i-éra stà salvadi par ricavarghene legna par le navi e bonificàr l'area paludosa trasformandola in terén agricolo; così el terén el vien spartido tra le faméje nobili venesiane e veronesi che le costruìrà col tempo un bèl mucio de vile. Nel 1630 la peste fa visita ànca da ste parti e i abitanti i se dimesà. Tra le cése, da segnalàr quèla de San Paolo rifata nel 1613 ma con el campanìl e fonte batesimal del IX secolo. L'altàr maiòr in marmo l'è stà realisà nel 1741 dal scultór Giuseppe Schiacci da Verona; la parochiàl de la frassión Begosso costruida tra l' XI e 'l XII secolo, in costante manutension nei secoli parchè bandonà e in degrado; la cèsa afrescada de San Celestin de la frassión Nichesola del 1330. Inveçe, tra le vile, da segnalàr la stupenda Vila fortessa "Fascinato" in stile liberty, ma con carateristiche medioevali. L'esistensa del complesso l'è documentada nel 1500 ma che la risulta presente in epoca piasè lontana. Atualmente la se presenta con quatro tóri, du davanti 'ndóe gh'è la fassàda e altre do ne la parte de drio, un bèl pósso del 1400 e l'oratorio dedicado a San Carlo Borromeo del 1884. Tra i primi propietari de questa vila la potente faméja dei Nichesola e nel 1600 i Bevilacqua de Lasise. Un altra vila tra le più interessanti l'è la Nani-Mocenigo conossuda ànca come Corte Bottagisio. Con tór rapresentà sul gonfalon comunàl usada nel corso de secoli come colombara, la vila la faséa parte de un importante sistema difensivo in epoca medievàl (vedi sóra), posissionà ai confini tra Terasso e Merlara (PD). Bela l'è ànca la fusion de stili tra le barchesse, i pòrteghi e la maestosa casa padronal, tuti e tri de epoche diverse. Par finìr del '600 l'è la Vila Adele-Brizzi ora sede comunàl. Do parole le va spese ànca par la frassión Nichesola conossuda nei secoli come Nauclesiola, Nichexuola e Neclosola sembrarìa derivàr da l'òmonima nobile faméja presente nel teritorio prima de l'ano mile. La vien nominada par la prima 'òlta su 'n diploma del 1154 da Federico Barbarossa "Nauclesiola nominatur in Diplomate Federici Regis an. 1154 et firmatur Episcopo Veronesi loquendo de pluribus locis in simul". Begosso "Bovosio" el vien nominado par la prima 'òlta nei documenti del X secolo come quél del 932 d.C. 'ndóe se parla de una donassión del Dicono de Verona al Capitolo de la Catedral de alcuni teréni, nel 955 d.C. el Conte Milone de Sambonifacio el concede a so fradel e a so neodo un castèl, una corte e un vigneto mentre nel 967 d.C. el Vescovo Raterio el ghe fa una donassiónal clero minor de la cèsa veronese. El paese el faséa parte de le "12 vile" che versava le "decime" a la pieve de San Piéro in Tillida (atuàlm. in Cantalovo). Nel XVIII secolo l'éra molto usado dai barconi el porto su l'Àdese par el trasporto de giara e de varie mercansie ma butà zò nel 1813 dai austriaçi.