Traénsòl

TRAÉNSÒL - TRAVÉNSÒL (Trevenzuolo)
Popolassión: 2.753 Altessa: 31 metri sóra el livèl del mar
Superfice: 26,94 chilometri quadri Comùni confinanti: Erbè, Vigasi, Isola de la Scala, Nogarole Roca, Roérbèla MN, CastèlBelforte MN

Comùn de la Bassa Veronese al confìn con la provincia de Màntoa e posissionà a 20 chilometri in diressión sud-ovest da Verona lóngo el corso del fiume Tión nel quàl i se buta fossi e canài come el Tiónçèl, Demorta, Grimana, Gambisa, Giona e Camandón che i bagna i 9000 campi de la campagna de Traènsól. L'òmo l'è presente da 'ste parti fin da la preistoria come i pól dimostràr i numarosi reperti de un par de comunità de l'Età del Bronso vegnudi a la luçe tra el Tión e 'l Tiónçèl: tochi de ceramiche, ponte de frece, lame, ossi de bestie, un pugnàl, siguréto e altre robe. De epoca romana jè i resti de un complesso de costrussióni in località Seràjo destèso su 'n area de 1900 metri quadri, forse 'na vila con funsioni de fatoria, che podarìa risalir al III° secolo d.C. fasendo riferimento a le monéde vegnù a la luçe nel stesso posto. Altri reperti romani jè stà catadi 'ndóe 'na 'òlta gh'éra el castèl; da ricordàr le du iscrissioni, una su lamina de brónso dedicà a Minerva e l'altra in pièra in onòr de Tiberio Augustano, procurator de la Britania. El toponimo de Traensòl l'è de origine romana, podarìa vegnér dal nome de un çerto Trebentius. Ne l'alto medioevo Traènsól el risulta tra i possedimenti del Monastero de San Zén e pròpio de 'sto periodo jè documenti piassé antichi che i parla del paese; dal 1027 i documenti i ne parla Traènsól fasendo parò riferimento al "castrum" o "castèllum". Nel XIII secolo el castèl l'è stà protagonista de le lote tra Mantoani e Veronese e nel 1230 el paese l'è stà messo sóto-sóra dai Mantoani che diese ani dopo i è stà sconfiti da Eselìn da Romàn. In 'sto periodo se vede l'afermassion del comun e grassie a dei documenti se riesse a capir la strutura organisativa; gh'éra el massaro, el console e un par de consijeri che i podéa élesar el sindaco con el compito de distribuir le tere concesse dal monastero de San Zén a la zente de Traénsol par un nùmaro de ani preciso, mentre un mese dopo se riuniva i capifaméja "vicinia" par confermar o meno la decisión. Nel 1217 l'è stà stabilì lo "statuto campestre" conossù come "Regula" a la presensa dei rapresentanti del Comùn e de quei de la Césa sóto el portègo de la Pieve de Santa Maria, 'ndóe i-éra stà decise le multe da far pagar in caso de dani a beni agricoli; in pratica el Comùn el g'avéa el compito de gestir problemi e teritorio mentre el Monastero su çerte decisioni importanti el vólea essarghe e dir le propie rasoni che'l più de le 'olte iera decisive. Durante el secolo parò el Comùn de Verona l'à continuà a muciar beni e diriti a Traènsól e nei comuni confinanti fin a rivendicar el completo contról sul comun. Quando jè rivà i Scaligeri, tuti i beni del Comùn jè passà sóto a la faméja De la Scala mentre finì sto periodo e quél Visconteo, nel 1404 la Serenissima l'à ciapà el posto dei Carraresi grassie a Jacopo Dal Verme che'l guidava i soldà Venessiani riussendo a métar sóto al pròpio dominio, tere e la frassión fortificà de Fagnan che faséa parte del sistema difensivo del famoso Serajo vólù dai Scaligeri. A l'inissio del periodo Venessian i teritori de Traènsól i éra tornà sóto la gestión de l'Abate de San Zén ma pian pianela jè finì ne le mane de faméje nobili che nel corso dei ani i éra deventà sempre piassé importanti come i Arcoli, Sogeri, Peroni, Farfusola, Da Quinto, Nichesola, Bevilacqua-Lazise, Zerbi, Guantieri, Pellegrini, Schioppo, Allegri e Fontanelli. Dopo el periodo Venessian andà avanti 'bastansa bèn a parte la peste, verso la fin de l'700 jè rivà i francesi che i à messo a fero e fogo el teritorio mentre nei primi de l'800 sóto i austriaçi le cose no jè andà al mejo, sempre piassé miseria e malatie tanto che nel 1875 dopo l'unificasion d'Italia i primi Traensolesi jè stà costreti a migrar in Brasil. Tra le cése da segnalàr la parochiàl de Traènsól dedicà a Santa Maria Madalena ricordà tra i possessi de San Zén fin dal XI secolo e come pieve a partir dal 1145, restaurà nel XV secolo e rimodernà nel XVIII secolo, la conserva un coro intarsià del XVII secolo e do tele interessanti, una del Ridolfi e l'altra de Francesco Barbieri "El Sfrisà". La parochiàl de Fagnàn l'è del XVII secolo ma con elementi de la vècia cèsa come el batistero in marmo del 1432, un par de afreschi del '300 con la Vergine e 'na magnifica statua in legno che rafigura la Madona col Butìn del XV secolo. La cèsa atuàl de Roncolevà dedicà a San Zén l'è stà costruì nel 1871 ma de origine sicuramente piassé antica. Tra le corti da segnalàr la San Bernardin sul confìn nord del comun, un tempo de propietà dei Giona, l'è costituì da un palasso çentràl çircondà da un poche de costrussióni e con arènte un oratorio dedicà al Santo costruì nel XV secolo; la Curtalta sul confìn col mantoàn che faséa parte nel XV secolo del feudo dei Grimani mentre el palasso l'è del '800 con barchesse e torioni. Inoltre da segnalàr Corte Azzini con el "Palazzon", Corte Spolverini ciamà Sant'Eurosia dal nome de la ceséta, Corte Grande un tempo dei Allegri, la magnifica Corte Pellegrini; a Fagnan se pól catàr Corte Giusti al Serajo, Corte Ravaldini, Corte Deçima, Corte Schioppo; a Roncolevà Corte Muttoni-Mezzanelli, Corte Dossi.