Zevio

ZEVIO
Popolassión: 14.953 Altessa: 31 metri sóra el livèl del mar
Superfice: 54,87 chilometri quadri Comùni confinanti: Caldièr, San Martìn, Belfiór, Ronco al'Àdese, Palù, Opeàn, San Gioàni Lupatoto

Comùne de la pianura veronese travérsà da l'Àdese e posissionà a sud-est de Verona, famoso par la coltivassión dei "pomi", el g'à come frassioni Santa Maria, Perzaco, Volon e Bosco. El teritorio l'è stà abità dai romani come i ne dimostra i reperti catadi, tombe, lapidi, monéde vasi, scudèle e da le popolassióni galiche. Dal pónto de vista toponomastico la prima ipotesi la ne dise de la probabile origine romana de Zevio, infati, tegnendo conto che la letara "d" par corussion fonetica se trasforma in "z" e che 'na 'òlta Zevio el vegnéa ciamà Devio, podémo risalir a la parola latina "devius" che vól dir fora via. Zevio l'éra lontàn da la Via Postumia e quindi fora strada, ipotesi che i studiosi i preferisse scartàr. Nel corso dei secoli l'è stà ciamà in diverse maniere come ricordà nei documenti: nel 861 se lese la variante "Gebitus"; nel 903 gh'e scrito "in Gebitus locus"; nel 920 catémo "palus zevedana" (palude); ne la bóla pontificia del 1145 "plebem geberti"; nel documento del 1184 "bar.gebitum"; jebetum o gebetum lo catémo scrito ne l' Historia langobardorum de Paolo Diacono e podarìa far pensàr ai Gebeti o Gepidi, 'na popolassión barbara che nel 566 l'è scapà dal longobardo Re Alboin verso Zevio, 'ndóe i à abità par un poco de tempo par concessión, a la fin, del stesso Alboin. 'Sto re l'à sposà Rosmunda, fióla del re dei Gepidi, un çerto Gebeto conossù ànca come Cunimondo, famoso parchè Alboin, dopo avérlo copà el g'à usà el "cranio", par farghe béar la pora butèla. Zevio l'éra uno dei tanti "Pagus Gebetum" sparsi ne la provincia veronese deventà col tempo Gebetum, Tera dei Gepidi. Nel XII secolo i paróni de Zevio i éra i Lendinara, amiçi de Federico Barbarossa, che jà dovudo far le sue contro la popolassión zeviana che l'éra insorta brusandoghe el castèl dopo avér sentido de la sconfita de l'imperadór a Legnano. Come ne dise un documento del 1182 grassie a l'aiuto del Vescovo Ognibene, i Lendinara i è riussidi a deventàr paróni da nóvo de Zevio. Nel XIII secolo grandi lote tra Guelfi e Ghibelini; i g'a tacà fogo e messo sóto sóra el paese nel 1232 mentre 'l castèl l'è stà butà zo dai Guelfi mantovani nel 1236. Sóto i Scaligeri da 'ste parti jè passà nel 1378 i soldà de Bernabò Visconti in diressión Verona su ordine de 'na "Scaligera", che no l'éra dacordo su la sucession dei De la Scala. Dopo le Dominassioni Viscontea e Carrarese l'è rivà quèla Venessiana nel 1405. In 'sto periodo e par èssar precisi nel 1438 dopo le lote tra Venessia e i Visconti, el condotièr venessiàn Federico Sforsa l'à preferido butar zò el castèl piutosta che deventasse base par el nemico. A causa de la guera de la Lega de Cambrai contro Venessia el paese nel 1509 l'è stà messo sóto sóra da nóvo. Zevio in epoca Venessiana l'éra a capo de un Vicariado con sóto i paesi de Àlbaro, Scardevara e Paquara mentre in epoca Austriaca, nel 1818, el distreto el comprendea Isola Rissa, Palù, Opeàn, Ronco e S.Gioàni Lupatoto. Nel 1880 l'è stà inaugurà su l'Àdese el ponte caro ai zeviani e batesà col nome del sindaco che l'à vólù costruìr l'opera, un çerto Antonio Perez. A Zevio, da 'édar gh'è el "castèl" che in un documento del 920 l'éra de Re Berengario, passà ai Lendinara e nel XVIII trasformà in residensa da la faméja Sagramoso. De la vècia costrussión gh'è restà el ponte levadòr, le galere e i soteranei, con el val pién de aqua del'Àdese. Tra le cése da segnalàr la parochiàl dedicà a San Piéro ricostruido nel 1839 su disegno del Giuliari al posto de un tempio del XII secolo, con drénto 'na tela de la Scóla del Brusasorzi e un batistero otagonal del '400 in marmo rosso; la cèsa de Santa Toscana nel çimitero l'è stà costruida 'ndóe g'avéa casa la Santa nel '300; la cèsa parochiàl de Santa Maria del 1820 conserva 'na tela de Sante Prunati con rafigurà la "Madona e i Santi"; la cèsa de San Bartolomeo Apostolo costruida a la fin del XVIII secolo podémo catarla, inveçe, ne la frassión Perzaco; Tra i palassi da segnalàr Palasso Todeschini arènte a la cèsa de Santa Toscana con sale afrescade del '500; Palasso Smania un tempo dei Conti Arrigoni degli Oddi con afreschi del '400. Tra le vile da segnalàr la Da Lisca, la Perez, la Bonomi da Monte, la Albertini e la Rivalunga. Tra i personagi famosi da segnalàr el grande pitór Altichiero nato a Zevio nel 1320 che l'à afrescà la cèsa de San Giorgio e quèla de Santa ''Nastàsia a Verona e Santa Toscana nata da la nobile faméja de' Crescenzi.