Secondo a quanto podemo catar scrito su enciclopedie e vocabolari, el Dialèto l'è un sistema linguistico usà in zone geograficamente limitade in un contesto social e cultural ristreto. Se volemo ndar più nel specifico, el termine el vien dal greco Diálektos "lingua" derivà dal verbo Dialegomai "parlo". El dialèto in general l'è una forma comunicativa parlada e non scrita, tramandà de pare in fiol che la se porta drio tuta la cultura de un popolo. Ma no sempre l'è così come nel caso de molti dialèti d'Italia. Col tempo anca el Veronese l'à subì una forma (grassie ai numerosi scritori, poeti, artisti veronesi che i l'à difusa) de "codificasion scrita" che fatalità l'è propio la definission de "Léngua". I linguisti antropologici i definisse el dialèto una forma specifica de una lingua usà da 'na comunità de parlanti, in pratica la difarensa tra lingua e dialèto l'è tra l'astrato e 'l concreto, fasendo risultar che nissuni parla una léngua ma tuti i parla un dialèto de 'na léngua. La Léngua l'è usà in un zona bela granda, el Dialèto in una parte de zona. Alora el Veronese l'è una léngua o un dialèto? L'è una léngua formà da tanti dialèti. La provinsia veronese la confina con le provinsie de Mantoa, Vicensa, Padoa, Trento e Bressia, che comporta l'imbastardimento de la parlada Veronese e quindi l'alterassion de le parole specialmente ne le nostre zone de confine par esempio a San Bonifacio, Mossecan, Valés, Roaredo de Guà, Castagnaro, zona Garda-Baldo ecc. Par semplificar ancora piasè ò disegnà sto schema 'ndoe se vede che rispeto a la çità, ne le zone de confin gh'e un influsso magior de le parlade da parte de le altre provinsie.

Quindi partendo dal Dialèto de la çità e andando verso le zone de confine se scomincia a sentir de le sfumadure ne la parlada, inissialmente de calche letara e/o parole acentà e via via sempre piasè forti a favor de la vissina "tera straniera". Le "sfumadure" che catemo tra le zone de confine e la çità, l'è un incroso de parlade e de acenti, no con tante difarense, che podemo sentir tra paesi e/o contrà confinanti tra lore. Rispeto a la çità, in Lessinia o ne la Bassa podemo catar anca dei termini a 'olte completamente diversi, magari dovù al tipo de mestier (es. atressi par laorar i campi o par far el botiér). Par la parlada Veronese Ve rimando parò al relativo capitolo. Avemo visto che 'l dialèto el se porta drio la cultura de un popolo, ma no se capisse come mai ci parla Dialèto el sia ritegnù un sotosvilupà o un ignorante, inveçe se vien parlà da una persona famosa e conossù alora el vien rivalutà. A parte i soliti poeti e cultori veronesi, la nostra parlada la tende a sparir a favor de un italian sempre più bistratà da le lingue straniere come l'inglese che definisso macheronico in Italia, deventando cossita un "carneval" de parlade. L'unica cosa par salvar el Veronese, l'è, che quei pochi che i le parla ancora, i continua a farlo tramandandolo a fioi e neodi. Portarlo ne le scole sarìa el massimo zontandoghe lo studio de le nostre tradissioni, insegnando a 'sti fioi del terso milenio come se vivea 'na 'olta, cossita che i possa catar de le cose positive e perfessionar le cose negative rendendole mejo e al passo coi tempi. L'ultima solussion l'è scontà, ma Ve la digo istesso, dovì continuar a vardar www.larenadomila.it e magari spedir via imeil de le Vostre esperiense e altro material par el ben de la nostra lingua o "lengua".