Cari Veronesi, vissini e lontani, nel mondo. Un 2026 de paçe e serenità. El 2025 el s'a serà con guére sparse par el mondo e co' quéle tra le mura de la çità par un pugno de gnochi. La Giunta Comunàl la dise che el nostro Carnevàl el g'a dei problemi co' i conti ma par el Bacanàl, tuto l'è in regola. Intanto parò, quéi che i ghe resta mal iè quéi che sfila e quéi che i varda la sfilada del Vènardi Gnocolàr. Altra guéra l'è anca quéla del giornàl The Telegraph contro el balcón de Giuliéta che secondo la stampa inglese l'è un falso. Bèla scoèrta, anca se, lo stésso Sèspir no l'è dito che sia nato in Gran Bretagna e che'l sia vegnù a Verona. In pratica tuti contro tuti, co'una cosa in comun, interessi, o mèio...schèi! Noàntri de La Rena Domìla organisémo eventi in çità e da 27 ani portémo inànsi le tradissioni sensa ciapàr un euro.
Forsi l'è par quésto che no riussémo a capir, che ghe sia guére inutili par un piato de gnochi, quéle bén più gravi e sensa fine iè altre. Par vérghe schèi a Verona, se parla de tradissioni sensa daver de cosa se parla e quando organisémo calcossa noàntri a gratis, i ne vién drio copiando e soratuto fasendose pagàr. Le tradissioni le vién dal cor no dai schèi! Nissuni s'a ricordà che vint'ani fa l'è morto uno dei più grandi poeti del '900, Tolo Da Re el poeta de "l'Adese". Un aniversario che nissuni a parte noàntri s'a ricordà. Sperémo che sia un Bon 2026 de paçe e serenità! .(El Diretór 31.12.2025)
