Se par caso g'avì poco più de 1 milion e mèso de euri da spéndar e no savì come, ve consiliémo un bel astrolabio del 1455 un tempo tacà via par almanco tre secoli, nel ciòstro de l'Abassia de San Zén che podì crompàr a la Daniel Crouch Rare Book de Londra. Grassie ai tre quadranti da spostàr a man, i Benedetini i podéa organisàrse la giornada, i savéa cossìta le fasi lunari, el calendario zodiacàl de le stéle, quanto ciàro gh'éra in un tal giorno de l'ano e anca i giorni e le ore de le feste dei santi destinade a la preghiera. No l'è propio picenìn da tacàr in sala o in cusìna ma de sicuro fasì 'na bèla figura, el disco piassè grando l'è de 1280mm de diametro invésse quéi picenini 533mm e 483mm.
Sóra se pól lésar anca i nome dei Santi vescovi de Verona, San Cerbonio, San Procolo, San Lucillo e San Zén. Ma l'Astrolabio come pól èssar finìdo in tanta m..alora? Forsi quando i francesi nel 1797 i g'a mésso a fèro e fógo la çità, un tal Bartholomaeus de Fanzago Cartulariis de l'Abassia de San Zén l'è riussìdo a salvarlo. Defàti se vardémo la colessión de l'inissio del '900 de la faméia Cartolari, dissendenti del monaco, catémo che l'éra ne le mane del Conte Antonio Maria Cartolari. Nel tempo l'è probabile che sia stà vendù come sucesso a un quadro de famèia finìdo in museo de la California. Sperémo che calchedùn che vansa un póchi de schèi ne le scarsèle el crompa un bèl calendario astronomico anca se i "sanzenàti" i dise, che la tór de l'Abassia l'è quéla mèssa mal e che dovarìa èssar sistemà...... (El Diretòr 25.08.2022)
