La suca dei morti, la Lùmera.
Come ogni ano se presenta la festa de Halloween a la fine de otobre, 'na festa pagana de origine Celtica, deventà come un altro carnevàl grassie ai 'mericàni che come al solito no i g'a inventà gnénte de nóvo ma copià mal dal vècio continente. El bruto l'è, che "grassie" a la globalisassión, ne tóca festegiàr mal un qualcossa che noàntri émo sempre festegià a la bóna ne le nostre campagne, ma in pòcio Mericàn, parché l'è de moda. St'émo perdendo i nostri valori e le nostre tradissioni, sémo deventà istessi de un cinese o de un africàn o de un australiàn, quél che gh'è a Verona te pol catarlo anca a Pechino, a parte la Pearà! Ghe némo pién le bale, de 'ste feste mal fate, noàntri gh'émo de mèio, Lo savì che anca noàntri gh'émo le nostre tradissioni par el periodo dei "morti" portà 'vanti de pare in fiol? Avì mai sentì dir de la "Brassadela" o el pan dei morti "trandoti" o le "miòle de sùca" brustolà sul fogolàr o i biscoti come "ossi da morto" o la "supa de fàe" de San Giorgio Inganapoltron? No? Beh, podì nar ne la rubrica "Mi ghe credo" o lésar qua de sóto e forsi capirè che la festa de "l'aulin" Halloween l'è 'na granda vacada e magari podì gòdarVe mèio in casa vostra....
31 Otóbre, Lumèra - Noémbre, Santi e Morti
In tuto el Veneto, gh'è un fraco de testimonianse su la nòte che vién prima del giorno de Ognisanti ma soratuto in quéla che vién dopo. Se stava in casa a spetàr el "ritorno dei morti", tacàndo la famosa "candela da morto" che più grossa l'èra e più podéa garantìr la presensa de le àneme in casa (àneme in pena) e preparando "el piato" sora al buféto de la càmara 'ndóe i-èra morti i parenti (o sul comò co' tute le foto in bianco e nero nel secolo passà). El 2 de noémbre se faséa una vera e propia festa, come quando i vivi torna da lontàn a casa, par questo motivo se preparava l'istésso magnàr anca par i morti. A seconda de la zona, su la tòla se podéa catàr i biscoti come "ossi da morto", i dolsi come la "brassadela" o el pan dei morti "trandoti", le "miòle de sùca" brustolà sul fogolàr, la "supa de fàe", le castagne e i maroni o le patate dolse americane. A proposito de 'Merica, i séita a romparne le bale co' la "festa de Halloween", la vigilia de Ognisanti, in verità, festa pagana de antica tradission celtica, difàti i Celti i scominciava l'ano el primo de noèmbre, co' la celebrassión de la fine de la staión calda e l'inissio de quéla freda. Anca in Veneto, par esorcisàr la paura de la morte e par creàr de le figure par gnente serie de le àneme dei defunti, se ciapàva 'na suca, che dovéa èssar udà da le miòle e da la polpa, se faséa dei busi par òci e boca come un crepa da morto e se ghe metéa drento 'na candela, par simulàr l'origine infera del spirito, da lì el nome "Lumèra" utilisà in particolàr ne la provinçia veronese ("suca dei morti" nel vesentìn o "Suca barùca" in tante parti del Veneto). Le "Lumère" conossù come "fuochi fàtui" no i-è altro che dei foghéti de colór blu, che salta fora in lóghi come çampisanti, paludi e stagni a livèl del terén, che i dise, sia, la manifestassión dei spiriti, ma in verità, una combustión de metano e de fosfàno dovù a la decomposissión de resti organiçi. Tra le curiosità storico-pagane, segnalémo che le "Lùmere" nei paesi anglo-sassoni prima del '500, i-èra fate co' de le grosse rave, mentre ne le nostre campagne, anca co' crape de bestie. Ci voléa nar a morose, magari nel paese arénte, in quei giorni catàva la strada piena de "paure", co' le Lùmere scónte sui àlbari o nei fòssi; ci g'avéa vóia de schersàr, ghe ne pensàva de tuti i colori, a 'òlte i schersi podéa finìr in tragedia, magari scapàndo de corsa da la crepa slusénte. Storicamente, più de miletresènto ani fa la Césa Romana l'à spostà la festa de Ognisanti dal 13 de maio al 1 de noémbre e inserida un par de secoli più tardi quéla dei morti del 2 noémbre par çercàr de cristianisàr le celebrassioni dedicà al culto dei defunti. (Verona 19.10.2021)...
