El nóvo 'Ròscopo Veronese del Pojàna, el Divìn che'l varda le stéle e i pianeti sóra a Verona par dar una interpretassión de qual podarà èssar, el destìn de l'òmo su la tera nel 2026. No l'è un semplice 'stròlogo. El Zodiaco Veronese tra i più vèci in Italia, studià par secoli e presente su La Rena Domila in ciàve moderna co' Moltón, Tòro, Zuméi, Moléca, León, Giuliéta, Balànsa, Scarpión, Cavalón, Cavrón, Garda, Àole. Par ogni segno del Zodiaco gh'è un colór che te porta positività, fortuna, schéi e salute nei momenti 'ndóe le robe le va mal. El Divìn Pojàna te diese la verità, no l'è falso. Varda Verona, varda le stéle co' Divìn Pojàna.
Moltón 21 marso - 22 aprìl Saturno el passa ogni trent’ani par cavàr via un mucio de rogne, che ve pol spassàr via come quando fioca e te vol netàr la corte. Netuno no’l g’a un casso da far par almanco dis’ani el te rebalta come un stramasso nel cambio de staion. In amor deventarè piassè romantico, come quando te vol spianàr ‘n asse co’ la cartavetrata. Urano e Plutone i ve invita a nar oltre i to confini magnando una bona pasta e fasoi, te vegnarè sparà in çiél come Apollo 11.
Tòro 23 aprìl - 22 màio Marte el g’a le bàle che gira e pol portarve indrio la vostra vècia moiér o el vostro vècio marì dopo averlo lassà. Ocio che moiér tornà e vérze riscaldà no iè mai bone”. Urano l’è pronto a darve ‘na man co’ schèi e laóro, par far i schèi te devi piegarte al volér de la produssión e te farè cariera.
Zumèi 23 màio - 22 dùgno Mercurio l’è in zumèi e ve darà tanta sicuressa, podì butàrve dai Colonèi del Baldo co’ un parapendio sbuso sensa farve del mal,. Nel laóro, podì deventàr el capo del capo come nei vostri sogni, ma el restarà un sogno. Ve bussarà a la vostra porta calchedùn che ve pensava da ani e che finalmente l’a fàto la prima mossa, el postìn co’ ‘na létara de l’Agensia de le Entrade.
Molèca 23 dugno - 22 lùio Dopo ani de amór “fai da te”, le stéle g’a scoltà le vostre preghiere e cossita grassie a luna piéna in Cavrón, quando fis-cia el vento, podì nar soto le quèrte e darghe drénto. A San Valentìn ve convién magnàr un òvo de strusso dopo avér utilisà tute le vostre energie, lassàndo stàr el laóro e i schèi par tuto el resto de l’ano, in póche parole te si nato poaréto e te móri poaréto, ma almanco te ciavi.
León 23 luio - 22 agosto Saturno el ve dise che tuto quél che l’è aqua deventa Recioto e tuto quél pensà podarà realisarse, riussirè parfìn a traversàr Corso Milàn bendè. Sul laóro podì far le robe sensa spacàrse la schèna, basta métarse in malatìa e far laoràr un altro al posto tuo. In salute, mèio béar un bèl bicèr de graspa par desmentegàr tuto, ma ve vegnarè fermà dai Carabinieri e te perdarè anca la patente.
Giulieta 23 agosto - 22 setembre Dopo ani de sfiga, l’amór el vegnarà da drio le spàle, podarìa èssar el momento de cambiàr modo de védar le robe. Co’ la luna piena in Giuliéta la primavera sarà el periodo de la rinassita personàl ma Mercurio che no se fa mai i cassi sói el ve farà spetàr calché Aola che come al solito no la g’a voia de combinàr gnénte. Sodisfassioni nel laóro e póchi schèi i vegnarà con calma, sempre se i vién.
Balànsa 23 setémbre - 22 otóbre G’avì Saturno e Netuno in Ariete che pol farVe nar fóra de molóna, cossìta vegnarà vóia de stàr un mese da soli a l'Eremo dei Camaldolesi sóra Garda, sensa nissuni che rompa le bàle. Plutone e Urano i ve darà ‘na man a risòlvar le beghe de l’an passà, basta usàrla bén in piéna facia de ci g’avì denànsi. La schèdina del SuperEnaloto lassà ne le braghe in lavatriçe la pól portàrve schèi, cossita ‘na òlta destésa a sugàr al sól, la sgolarà via co’ el vento.
Scarpión 23 otóbre - 22 noémbre Plutone e Giove iè con voiàtri e podarà giutarve ne le rogne che ‘na òlta risolte, ve premierà co’ una bèla vacansa a fine febràr a Tàranto; par colpa de la vista, el vostro rioplàn ve portarà a Toronto in Canada co’ -15. L'è un ano da capìr cosa far ne la vita, te pol cromparte casa a marso, i mobili d'arte a Zaréa a lùio e grassie a Giove te pol nar a starghe a decémbre. Salute, mèio de l’an passà, ma forsi ghe vol póco.
Cavalón 23 noémbre - 21 decémbre Ano nóvo, sfighe vèce, anca se, Saturno saltàndo a pié pari da l’aqua de le Aole al gropón del Moltón podarà portarVe schèi e nóe spariénse de laóro, in particolar de nóte. In amór gnénte de nóvo, ci l'è sposà da vint'ani oramai l'è rassegnà e ci l'è da par lu/éla l'è rassegnà.
Cavrón 22 decémbre - 20 genàr Par voialtri in tempo de guéra ogni buso l’è una trincèa, in amór ve và bén tuto, ghe sarà una trasformassión drénto de voialtri, ci l’è òmo deventa dòna e ci l’è dona devénta òmo. Ogni 'òlta a genàr l'è sempre de quéla se va la riçérca de calcossa de difarente, ma par far calcossa de difarente bisón cambiàr, far calcossa mai fato prima, base jumping con l'astìco de le mudande dal ponte de Veia a setembre o caminàr sora l'Adese in piena a otobre.
Garda 21 genàr - 19 febràr Co’ la Luna in Zumèi, g’avì cul par tuto l’ano, defàti podarè caminàr co’ l’ombrèla sbusa in via Nóa sensa bagnarve. Nel laóro podì far tanta strada...ma a pié, da casa par colpa de 'na busa del cantiér del filobus che v'a spacà la machina. A fine ano, el vostro mestiér sarà quél del Michelasso, magnàr, béar e 'nar a spasso
Àole 20 febràr - 20 marso El Vostro segno l’è quél piassè romantico, quindi dovì ciavàr prima de farve ciavàr. St’ano no importa con ci, l’importante l’è darse da far. Forsi in istà, la fortuna vegnàra pestàndo una boàssa ai Parpari. Nel laoro par 'verghe una promossion dovì lecàr el cul al vostro capo e no in senso figurà, dùgno el mese par darse da far co' la vaselina.
