Cari Veronesi, vissini e lontani, nel mondo. El primo de aprìl, La Rena Domìla smorsa 27 candeline e podémo dir che l'è un calcossa che ne porta nel cór una çèrta emossión. Te pensi quando te si partì e come el tempo l'è scapà via, portandose drio un sécio de sodisfassioni. St'ano par una "strana combinassión" el nostro Diretór l'è finìdo in tilivisión quatro volte in quatro giorni par parlàr de Carnevàl e del so libro stampa nel 2022. Avì capido ben, calchedùn s'a sveià tardi, forsi parché prima no se podéa far publiçità a un libro che no l'éra scrito dal Bacanàl del Gnoco? Forsi, la risposta no la savarémo mai, l'importante l'è portàr denànsi la cultura sensa vardàr ci ne vol mal o ne mete el bastón tra le rue. Anca st'ano ghe sarà de le novità, che piàn piàn le saltarà fóra. Noàntri ghe metémo la bóna volontà, ma ghe vorìa anca el vostro contributo, La Rena Domìla l'è patrimonio de Verona! Ringrassiémo come sempre Nicolò Dàmoli par darne 'na man a tegnér vivo el motór del sito, el Diretór no pól far tuto. Nel mese de aprìl parte anca el 27mo Canpionato del Mondo de le Tradissioni Veronesi con grandi novità, ve ricordémo che le iscrissioni i è verte fin al 19 de aprìl 2026. Supiémo le candeline, par un bón compleàn! Pensa, 27 ani e semo ancora qua! La Redassión (Verona, 31.03.2026).
