Noàntri no fémo politica, analisémo quél che vién fato a Verona. No disémo su a nissuna Giunta ma no gh'émo ricordi de Giunte che le g'a laorà bén e l'ultima, la g'a preferì taconàr in calche maniera. Co' la Giunta del sindaco Tommasi, émo visto de tuto e de più, cose fate bén e che ghe voléa da ani ma che secondo tanti veronesi no le g'avéa importansa, parché probabilmente no le se vedéa, come i tubi de le fogne del 1929 in via XX setembre o la méssa in sicuressa del cavalcavia de Viale Piave o la costrusion de rotonde in incrosi mortàli. Quél che salta a l'òcio ai veronesi iè le nóe piste ciclabili costruide taiàndo àlbari e fàte in modo assurdo, che le g'a tirà via asfalto a le auto portando a colóne sensa fine. Come darghe torto? Tuti contro la Giunta, fàta, secondo i "social", da "scapàdi de casa", definissión da difamassión. Te pol dir tute le to rasóni ma sensa òfendar, soratùto bisognarìa savér le robe prima de parlàr e no nar drio a le altre pégore.
Ma a parte questo, i veronesi, paga le tasse e i vol che giustamente tuto sia fato bén. Cambiàr nel tentativo de darghe un scurlón a la çità ferma da ani, co' idee "sanfassone", fa solo del mal. Gh'è robe che no se pól far e no te devi gnanca pensarle. In più la zénte se lamenta che i assessori no i scolta, che iè sensa spariénsa par gestìr una çità, soratuto gestìda da un primo çitadìn che prima pessatava un balón. Uno dei problemi de Tommasi l'è el so caràtere da montanàr, laoràr a tèsta bassa e parlàr póco. I veronesi preferìsse un sindaco in mèso a la zénte e che no mova pàia ma che dàga una parola de confòrto quando gh'è rogne, no come sucesso co' l'invasión dei "Maransa", ndóe no s'a sentido la so vicinansa. Ma 'ndoe casso érelo? A organisàr una riunión con Prefèto, Questòr, Vigili, Assessori e Psicologici nel tentativo de capìr da 'ndóe pól vègnar questa forma de cativèria da parte dei butèi delinquenti, tentando de cavàrla da le raìse.
Dal lato democristiàn, podarìa 'vérghe rasón, ma dal lato pratico, bisón farghe capìr a ci rompe, che i dàni se paga, con çifre de tuto rispèto. La parola giusta l'è questa, el rispèto. Uno che paga le tasse e se comporta bén, el vol pugno durissimo in çèrte situassioni da parte del Sindaco. Purtròpo le ultime Giunte, no le g'a fato bén el so còmpito, lassando le rogne a ci vién dopo. I veronesi dise de scancelàr i progeti fóra de testa, pagando le penali, pitòsto de creàr casìn, ma no l'è così façile. El filobus no l'è de questa Giunta, come la pista ciclabile da Parona al ponte Garibaldi o come i progeti de cementificassioni su le colìne. No l'éra de questa Giunta gnanca la gestión de bóna parte de le mura de la çità, fin a póchi mèsi fa in man al Demanio. Dopo, gh'è anca le robe assurde come nel caso de la gestión del "Balcón de Giuliéta" che ne la Giunta Sboarìna l'éra stà criticà dai assessori de Tommasi in quél tempo consiliéri de minoransa e che dèsso invésse i g'a fàto pèso. Anca le strade dovéa èssar sfaltàde da ci g'a mésso la fibra par internet, ma a quanto par, co' le nóe regole vegnù da Roma, i comuni deve vardàr ne le propie scarsèle e cosìta ghe vol póco a far saltàr i bilanci.
La zénte fà fadìga a capìr cosa vol dir aministràr un condominio, figuremose una çità. Se lése su i "social" de le cose incredibili: "invésse de butàr i schèi lì, l'è mèio spéndar de là". Forsi, tanti no i sà, che ogni assessorado g'a dei schèi da gestìr, quindi, uno che pensa al verde no çéntra co' quél che costruisse palassi; te pol incassàrte parò, se un tal assessor spende schèi mal, nel so assessorado. I laóri iè tanti e la quèrta l'è curta. Se in più chi l'è in Giunta, no g'a 'spariénsa, par gestìr situassioni complesse, la fritàia l'è fata. Ci devéntarà sindaco st'an che vién, se catarà davanti, a parte quél lassà da 'sta Giunta, anca a le Lèsi che vién da Roma, che le sèita a dimandàr schèi ai Comuni, come 'na parte de la "tassa de sogiorno". Par quanto rivarda la sicuressa, no sà più visto rivàr a Verona, le nóe "Forze de l'ordine" promesse e quindi bisón far co' quél che se g'a. Par le prossime elessioni del nóvo sindaco, se augurémo che i partiti g'àbia progeti de façile realisassión e no faraonici, che i tégna al bén de tuti e no solo a la caréga, par darghe un çèrto svilupo a la çità. Sentìr parlàr de bùse, piste çiclabili e de la stéla in Piassa Bra no te dà una visión de futuro. In pratica, co' le ciàcole no se impasta frìtole! (El Diretór 09.11.2026)
