PM10, Verona a l'ultimo respiro

Podémo dir che la nostra çità pól vantàr un altro record, l'è tra le çità piassè inquinade d'Italia. Secondo la classifica de Legambiente sémo messi mal, de drio solo a Frosinón e Milàn con le pólvari sutìli rivé a le stéle. Quali solussioni par no ciapàr 'na bèla multa da l'Europa nel 2030? Partémo nel dir che piassè de du mesi a l'an de pólvari sóra ai limiti europei i-è tanti, riussìr a sbassàrli ghe vol du ani de piova, come nei paesi tropicali. Se seitémo a costruìr palassi con un minimo de 7 piani ne le vie 'ndóe gh'è casìn de machine sensa far un prà con un mucio de piante, come mentalità no andémo da nissuna parte. Se invésse se buta zò i vèci palassi e se costruisse quéi a norma al so posto alóra gh'émo qualche speransa. 'Dèsso se vol realisàr el filobus, che par nar bén el dovarìa nar soto tèra, invéçe va a incasinàr le strade come via Mameli; la speransa dei nostri Aministradori l'è, che la zénte, la vóia lassàr la machina a casa e la se móva co' el mèso publico. A tórno a Verona gh'è anca la superstrada e l'autostrada con milioni de machine e tir che passa avanti e indrio. Se fémo el trafóro de le Toresèle la pólvar ghe l'émo anca a nord, 'ndóe se respira l'aria piassè pulita che vién zò dai monti? Bèla dimanda. La solussión sarìa 'nar in biçicleta o a pié, ma quanti i le farà, in particolàr quéi che laóra da l'altra parte de la çità?.. El Diretór 05.02.2025