Al confìn con el Vesentìn catémo la località famosa par el mandolàto, Cologna Veneta ma nei ultimi ani bén conossù su internet grassie ai sociàl, par motivi piassè gravi. St'émo parlando de l'ex convento de le Capussine, Sorele vegnù da Venessia che g'avéa inventà un merléto co' el "pónto in aria" e propio a Cologna le g'avéa tirà su 'na césa dedicà a San Piéro del 1614 co' tanto de ciòstro co' 'òlte a tuto sesto. In 'sti giorni bóna parte del quèrto l'è croà zò su quél restà drénto la césa e dovì pensàr che no l'è la prima 'òlta, el Comùn el s'à sempre interessà, scrivéndo ai du Enti publici paroni del vècio convento e faséndo presente el problema anca al Ministero dei Beni Culturali. Nel Catasto no se capisse bén de ci sia cosa, visto i vari passagi storiçi, fato stà che nel 2017 l'Ulss 9 e Ipab Domenico Cardo paroni de 'sto "bén de Dio" i g'a fato una manutenssion straordinaria dopo che el quèrto el s'éra sassinà nel 2014-2015. Secondo el Sindaco par salvàr quel restà ghe vol almanco 15 milioni de euri, spesa massa grossa e che se podéa far de manco de rivàrghe co' calche manutenssión. La Sovraintendensa g'a fato un sóralógo nel vècio convento, quando gh'éra ancora in pié le ultime dó statue in piéra, con Santa Chiara e San Cristofàro sistemè ne l'altàr de destra, ma no la g'a fato in tempo a métarle in sicuressa e cossita, dopo che'l quèrto l'è vegnù zò co' travi e cópi, iè finìe mal.
L'oratorio g'avéa tri altàri co' uno dedicà ai Santi Piéro e Paolo, quatro ossi de San Gaudenzio primo Vescovo de Rimini e piassè de dosènto tra òpare e relìchie. Gh'éra i angioléti scolpìdi nel '700 da Giovanni Bonazza o da la so botéga e i dipinti piassè importanti che iè stà portè nel Dòmo de Santa Maria Nassente. Le statue i altari e le colone o iè stè sassinè da calche malcunà o el tempo g'a fato la so parte, Nel 2013 calchedùn g'avéa ciavà le relìchie de San Marcurio fórsi co' ossi e grèpa catè calche stimàna dopo tacà a l'Adese nel paese de Albaredo. Nel 1810 con decreto napoleonico le congregassioni religiose iè stà sopresse e cossita finisse la storia nel convento. Nel 1849 e fin al 1981 l'è deventà sede destacà de l'ospedàl civìl par i mati "Psichiatria". No se capisse parché l'è stà lassà al so destìn, no se capisse parché in Italia semo cossita mona de no valorisàr bén le nostre òpare che in tanti stati al nostro posto farìa. La burocrassia la copa l'arte, el nostro patrimonio e la nostra storia. L'arte l'è el nostro petrolio, che podaria portàr schèi e laóro, ma l'è fià butà al vénto spiegàr questo a ci ne goèrna. (Redassion 13.09.2025)
