LA RENA DOMILA - DAL 1999 EL SITO VERONESE DEI VERONESI IN VERONESE

El famoso "Palio del Drappo Verde" che un tempo se coréa a Verona, decantà parfìn dal grande Dante Alighieri nel XV° canto de l'Inferno. Storia e curiosità del Palio più famoso d'Italia corso par piassé de 500 ani ne la nostra çità. El percorso l'è cambià nel tempo ma l'è restà nel cor dei veronesi par tanti secoli.

El  Palio, curiosità
El Palio nato nel 1208 par festegiàr la vitoria del Comùn contro Azzo VI d'Este e i Sambonifacio, l'era diviso in quatro gare: 1-done a pié / 2-òmeni a pié / 3-poarèti sui mussi / 4-nobili a cavàl. L'era conossudo in tuta Italia, tanto che Dante el l'à messo parfin nel canto XV del'Inferno. Par descrìvar la corsa velocissima dei "danà" soto la piova de fogo, l'à scrito: "....e parve di coloro a Verona il Drappo Verde per la campagna; e parve di costoro quelli che vince, non colui che perde".  Le antiche corse i era sancide dal Statudo de Alberto dela Scala e finansiade a spese del Comùn con schei tiradi via dala cassa dele multe par dàrghelo ai palii. Premi: 1-dodese brassi de pano erde (done a piè - vedi prima foto) 2-dodese brassi de pano scarlado (omeni vedi seconda foto) 3-una pessa bianca de Valesio (poarèti - vedi tersa foto) 4-una pessa de veludo "cremisino". I vegnéa concorenti nobili da tuta Italia. Percorso: Porta S.Croce (vissìn a porta Nòa), Porta Rofiolo, Cèsa de San fermo.Soto i Venessiani l'à cambià date e percorso. date: a- 1a dominica de quaresima b- ultima de carneàl. percorso: Porta Palio, Corso Porta Palio (ciamado così parchè i ghe coréa), la metà posta a Santa Anastasia. Arivo unico. Partense diverse: 1-done, Piassa Santa Apostoli, 2-òmeni, davanti a Castèlvècio, 3-mussi, difronte a Cèsa de Santa Lucia a metà stradón Porta Palio 4-Cavai, Porta Palio. Porta Palio nel 1630 l'è stà serada par motivi de contagio (peste) e ciamada Porta Stupa, verta solo in ocasión del Palio. Col passàr del tenpo la corsa l'era de dominica e i premi iè stà modificadi. premi:-5 brassi de pano erdo e rosso, -24 brassi de "valesio" bianco -25 brassi de veludo "cremisino". Premi de consolassión: per la corsa dei cavài i premi i era du mesi porsèi e un gal. Nel 1756 l'è stà deliberado de còrar el Palio la prima dominica de majo par le mejo condissioni climatiche e la fiera. Con i Francesi nel 1796 l'è finìa la tradissión.