Le origini del carneàl
L'origine del carnevàl de Verona, el testamento de Tomaso da Vico, come l'è nato el Vènardi gnocolàr e la riçeta in latino-macheronico su come cusinàr i gnochi.
In poche righe se vién a conossensa de tante curiosità che par molti secoli iè stà sconte. Se volì 'verghe più informassioni, basta crompàr el nostro libro "Bacchanalia" par catàr tute le informassioni che Ve serve. Se parla de tradissión ma se varda anca le documentassioni par completàr al meio le nostre riçerche.
| // Podarìa interessarte |
| Museo + Origini + Corteo + La Funsión + El Sire + Curiosità + Tre Màscare + Libro |
L'ORIGINE DEL CARNEÀL DE VERONA
 L'origine del Carneàl de Verona "Carnevale di Verona" ne la tradissiónL'origine del Carneàl de Verona la se perde nela note dei tempi e la se liga forse par analogia in alcuni elementi costitutivi del "Baccanale" a antichissimi riti pagani e al çiclo de Demetra, dea greca de la sémena e dela fertilità che i Romani i vedéa in Cerere, antica divinità italica del'agricoltura. Ne la sò "Istoria de Verona" el Dalla Corte el conta che, in conseguensa de le disastrose inondassioni del'Adese - fra el 1520 e el 1531 - e a causa dele devastassioni dei Lanzichenechi todeschi durante la guera tra Carlo V e Francesco I in Lombardia, ne la çità de Verona se moréa de fame. In quela çircostansa i "pistòri" i g'avù l'idea de alsàr el costo del pan e no voléndo ne farlo e ne véndarlo a la popolassión piena de fame, el 18 dugno 1531 la zénte infufà a S. Zen l'era corsa in piassa saltòghe 'dosso e ciavàndoghe pan e gràn. Secondo tradissión el pericolo de la rivolta l'è stà scongiurà co' la nomina de alcuni çitadini, che a sò spese i g'à dato da magnàr ai abitanti piassè pitochi dela contrada de S. Zeno. La tradissión la ne dise che ne la benemerita comissión gh'éra anca el Da Vico, indicà come "istitudòr o restauradòr" del "Bacanal del Gnoco", avendo fato distribuìr gratuitamente su sò libara inissiativa ai Sanzenati pan, vin, botiér, farina e formajo ne l'ultimo vendri de Carneàl. Nel testamento de Tomaso da Vico secondo i sanzenàti, risulta che ghe fusse scrito, che, tuti i so "beni" i dovéa èssar devolù par tiràr su schèi in modo da podèr celebràr, ogni ano, el "Vènardi Gnocolàr", co' la distribussión de pàn e vin sensa contàr de botiér, farina e formàio par far i "Macaròni". In più el voléa èssar sepolto tacà a la "tàola dei pitòchi", poco distante da la cèsa de San Procolo. Quél scrìto nel testamento l'è ben difarénte, la verità l'è un altra e Da Vico no g'a a che far co' el carneàl.  La Tàola dei Pitòchi Vegnéa invità a magnàr a la tàola, 12 pitòchi del quartièr de San Zèn a spese del’abate e dei signori del tempo. Come se vede ne la foto “La mensa dei 12 poveri” da “Verona in chiaro e scuro”, 1700. |
TOMASO DA VICO
 Tomaso da Vico Tomaso da Vico l'era un famoso medico, 'na pàrsona a la màn, abitante ne la contrà de San Pièro Incarnario. L'era considerà tra le personalità più importanti de la vita publica de Verona come ne dimostra la famosa "cavalcata", andòve l'era presente in compagnia de "gentiluomini" e "prelati" par 'nar incontro al novo vescovo de Verona G.Giberti che vegnéa su da Roma. Quando l'è morto, secondo tradissión, nel testamento l'à lassà una fortuna par far ogni ano el carneàl e darghe da magnàr a la pora zènte. Tomaso, l'è da considerarse quèl che l'à inventà o g'à dato nova vita al nostro carneàl? No. Testamento, vero o falso? Semo sicuri che el nostro carneàl el vegna celebrà grassie a Tomaso da Vico da 500 ani? Nel testamento presente a l'archivio de Stato de Verona, se lèse, che nel marso 1531, vién messo nero su bianco el testamento dal notàro S.Dalla Mano; du mesi dopo el vién leto da parte del fiòl del notàro. Tegnémo conto parò, che secondo la tradissión, el 15 dugno 1531, gh'è stà la rivolta in Piassa San Zèn e che Tomaso da Vico l'era tra quèi che l'à distribuì i vari ingredienti par far i gnochi. Ma lu in quèl giorno l'è morto da molti mesi. No risulta che vegnesse lassà qualcosa ai sanzenàti ma come unico erede el fiòl Marcantonio mentre la tomba no la dovéa èssar a San Procolo ma dai Canonici sora Verona. In più, par farla completa, nel testamento, no gh'è scrito da nissuna parte, la parola "carneàl". Mausoleo de Tomaso Da Vico “Thomas Vicus Philosoph, Medicus et inter rarissimos praeclarus, hic et in his se jussit claudi lapidibus hoc asserens si vixi, resurgam. anno MDXXXI”. |
EL VENARDI GNOCOLÀR
 El Vènardi GnocolàrNe l'ultimo vènardi de carnevàl la nostra çità l'à celebrà la "Funzione dei Gnochi" o "Festa de la Bondànsa". Un tempo l'era ciamà Vènardi Casolàr da "caseus" come dito dal podestà Barberigo a la fine del '500. I gnochi un tempo i era impastà co' sola aqua e farina come i "gnochi sbatùi de malga" e ciamà "Macaròni". Solo nel '700 gh'émo l'introdussión de la patata in cusìna grassie a un cogo francese. I Gnochi in cusìna Secondo la tradissión veronese, in faméia o nei ristoranti se magna i gnochi el vènardi gnocolàr, consà co': 1) botiér desfà e formàio parmigiàn 2) co' sugo de pomodoro e formàio parmigiàn 3) Gorgonsola desfà 4) Pastissada de cavàl par I veronesi D.O.C. 5) Pastissada de musso par i Sanzenàti D.O.C. 6) Sùcaro e canèla ne la Bassa Veronese al confine co' Padòa. riçèta dei gnochi |
LATINO MACHERONICO
 Latino-MacheronicoPochi i sà che a Verona gh'è un grandissimo archivio de latino-macheronico, un missiòto de latìn e volgàr veronese. Eco come cusinàr i gnochi secondo F.Dionisi nel 1740 Optima de mostris nascuntur multa cosinis, Sed quae se Gnocchis postulet esse parem? Tanta roba da magnàr nasse da le nostre cusine, ma qual merita de èssar paragonà al gnoco? Omnigenos siquidem farsitos, atque bodinis / Hunc Antenates nostri travavere piattum,/ Hunc conservabit sedula posteiritas./ Qui fandi Gnoccos bramasset habere ricettam, / En Verona docet bravior Hippocrate; / Ante tamisatae sex libras sume farinae, / et misce quantum sit satis intus aquae; / Totum impastetur, grandis pyrolona fiatur, / Inque quater centum divide particulas; / Has sfregolando super digito cum pollice, rizzas / Roversis faciat gratacasola busis; / Comque parechiatus steterit parollus ad ignem, / Extemplo in calida praecipitentur aqua; / Quae postquam mediam ad summum bolliverit horam, / Gnocca procul dubio cocta, stracota dabit, / Ne perdas igitur temps, sbosoque manestro / Collige; dum fumant, dumque bazota tremant, / Grattati libram casei, librasque botèri / Adde duas; nec quod sint nimis uncta time; / Gnocca debent etenim cunzari semper abunde, / Ut per gargatum plu molesina fluant. / Composita est pietanza magis bona nectare divum / Felix, si totam solus habere potes! La famèia dei gnochi l'è più importante de quela de torte e budini. Un piato inventà dai nostri vèci, conservà da le nove generassioni. Ci vol la riçeta par far i gnochi, Verona pol insegnarghelo mejo de Ipocrate. Bisòn ciapàr siè "libre" de farina ben tamisà, roersàndoghe drento aqua, quel che serve; impastàr el tuto e fato un gran bigolo, dividerla in quatrosento parti; se sfrega el deolòn sui gnochi, che i se inrissola su la gratacasòla roersàda o dai busi roèrsi. Quando el paròl el sarà sul fogo, se buta drento i gnochi ne l'aqua calda e dopo el bojo de mes'ora i sarà ben coti. Col manestro sbusà te devi pescarli che i fuma e jè drio tremàr. Te devi zontàr 'na libra de formajo gratà e do de botiér e no 'verghe paura se jè massa onti; i gnochi i deve èssar ben consà fin a quando no jè bei morbidi e i va zò par el gargàto. Una pietansa divina. Feliçe, se te pol 'verghela tuta par ti! |
VERBA VOLANT, SCRIPTA MANENT
 Verba volant, scripta manent Semo sicuri che el Vénardi Gnocolàr no ghe fusse prima del 1531 quando Tomaso Da Vico l'à dispensà i gnochi? 1) Nel 1509 se parla de un "tratamento speciàl" co' i gnochi, ne la mensa dei frati de Santa Maria de la Scala nel periodo de "carnovale". 2) El famoso maestro veronese Panteo nel 1484, par el novo Statuto de la Casa dei Marcanti, l'à composto una poesia spedì in anteprima al Podestà nel "periodo de carnovale". 3) Nel 1434 el predicadòr Fra Bernardino (deventà Santo nel 1450), el g'à dito ai veronesi de impegnarse de più dal ponto de vista religioso. Par questo motivo, la tradissionàl corsa del "Palio del Drappo Verde" l'è stà spostà da la prima Dominica de Quaresima al Zòbia (Giòvedi) Grasso. El Palio del Drappo Verde Secondo tradissión, el catìo Eselìn III da Romàn, dopo aver vinto contro i guelfi Sambonifacio, l'è rientrà a Verona ne la prima dominica de Quaresima del 1208. Par festegiàr i è stà organisà giostre e tornei. El Palio l'è stà messo nero su bianco nel Statuto Albertino e decantà da Dante Alighieri nel XV° Canto de l'Inferno:"e parve di coloro – che corrono a Verona il drappo verde – per la campagna; e parve di costoro – quelli che vince, non colui che perde”…. |
| // Podarìa interessarte |
| Museo + Origini + Corteo + La Funsión + El Sire + Curiosità + Tre Màscare + Libro |