La rubrica de la cusìna in tòla nel segno de la tradissión veronese. Magnèmo qualcosa de dolso, magari a carneàl come le frìtole o i galàni mentre soto le Feste de fine ano 'na bela feta de Nadalìn el pare del Pandoro o le fròle de Santa Lussia. Anca in questa categoria a Verona semo specialisàdi con tante asiénde pronte a sfornàr prodoti de tuti i tipi. Qua soto, quel che podì magnàr de veramente bon, catà su veci libri de cusìna. No ve resta che cusinàr e de invitàr a magnàr a casa Vostra la nostra redassiòn, par capìr se si stadi brai.......
| FROLE DE SANTA LUSSIA |
Cosa ghe vol:
- 300 g. de farina,
- trè balòte dei ovi (4 picenini)
- 130/150 g. de sùcaro,
- 150/175 g. de botiér
- 'na scorsa de limòn,
- un pìssego de sàl.
- decorassión co' sùcaro a vél
Come far:
Métar in 'na terina, la farina coi ovi, el sùcaro, el botiér molesìn, sàl e la scorsa de limòn gratà e malgamàr zóntando el lievito. A 'sto pónto laoràr el pastón e lassàrlo ponsàr par un par de ore nel frigo, ben coèrto. E 'desso rìva el bèl. Ciapàr la méscola e spiànàr fin che vién fóra un sfòio del spessór de mèso schèo; par darghe la forma ai "biscoti" de pasta fròla, l'è mèio utilisàr i "stanpini", se invéçe te gh'è fantasia te pól ciapàr 'na ruèla da cusina e darghe la forma che te vól. Infornàr co' carta da forno par 12-15 min. a 150 °C e completàr co' el sùcaro a vél. Lassàr soràr par almànco un par de ore. Consilio: quando se utilisa i stampini e te gh'è tanto scarto de pasta, te pol malgamàr da nóvo e far da nóvo un sfóio da mèso schèo co' la méscola. No cósar par piassè de 15 min. parché quando le fròle se sóra, le se indurisse; no giràrle nel forno, de sóra le deve èssar indorà e de sóto piassè còte.
|
| FRÌTOLE |
Cosa ghe vol:
- 400 g. de farina, trè ovi, un bicér de late,
- sié cuciàri de sùcaro,
- 100g de sùcaro vanilià,
- 100g de uva passa,
- 20g de lievito de bira,
- 1/2 bicér de graspa,
- oio da frìsar q.b.,
- 2 pomi gratadi, 'na scorsa de limòn,
- un pìssego de sàl.
Come far:
Métar in 'na terina, la farina coi ovi, late e sùcaro, e versàr al çentro el sàl con l'ua passa messa in precedensa a moio par un 1/4 d'ora, i pomi e la scorsa de limòn gratà. Malgamàr con un cuciàr de legno zóntando el lievito, 1/2 bicér de graspa e spetàr che la pasta la lievita (20 minuti). A 'sto ponto butàr el pastón a scuciarade in 'na teja de oio de semi deventà de bojo, e quando le frìtole i è dorade tirarle via da la téia e butàrle sora un foio de carta; completàr el tuto con el sùcaro vanilià.
|
| GALÀNI (SÓSSOLE) |
Cosa ghe vol:
- çinquesento gr. de farina,
- trè ovi, 1/2 bicér de soave,
- 60 gr. de botiér,
- 120gr. de sùcaro,
- 'na scorsa gratà de du narànse e un limon,
- 'na bustina de vanìlia, sùcaro a vél,
- oio de semi pàr frìsar, un pìssego de sàl.
Come far:
Métar la farina a fontana, co' in in meso tuti i nostri ingredienti. Laoràr el pastón e lassàrlo ponsàr par n'ora, ben coèrto. Ciapàr la méscola e spianàr fin al spessór de un par milimetri; taiàr la sfoia a strìcole longhe 'na spana e larghe tri dièi con 'na ruèla, fasendoghe nel mèso du taiéti. Butarle nel'oio che bóie e binarli quando i g'a 'n color dorà. Lassàr soràr e portàr in tòla con sora el sùcaro a vél. in 'na terina, la farina coi ovi, late e sùcaro, e versàr al çentro el sàl con l'ua passa messa in precedensa a moio par un 1/4 d'ora, i pomi e la scorsa de limòn gratà. Malgamàr con un cuciàr de legno zóntando el lievito, 1/2 bicér de graspa e spetàr che la pasta la lievita (20 minuti). A 'sto ponto butàr el pastón a scuciarade in 'na teja de oio de semi deventà de bojo, e quando le frìtole i è dorade tirarle via da la téia e butàrle sora un foio de carta; completàr el tuto con el sùcaro vanilià.
|
| CROSTADA DE POMI |
Cosa ghe vol:
- Tresénto gr. de farina,
- trè cuciari de miél,
- trè cuciàri de oio de oliva 'stra-vergine,
- trè pomi,
- un limòn,
- un pochetìn de marmelada, sal, canela 'n pòlvar.
Come far:
Impastàr la farina col miél, oio, canela, un pìsego de sàl, 'na scorsa de limòn gratà, aqua fresca parché deventa morbido. Lassàr sponsàr pastón par 'n'ora. Dopo ciapàr 'na méscola e disténdar la pasta spessa un scheo. La tortiera la va onta con oio e marmelada. Métar le fete de pomo, 'na spiansà col limòn e infornàr par 40min. 180°. Me racomando de tor pomi de Zevio e Belfiòr che jè veramente boni!
|
| NADALÌN |
Cosa ghe vol:
- çinqueçento gr. de farina,
- dosentoçinquanta gr. de botiér,
- çentoçinquanta gr. de sùcaro,
- trè ovi,
- sesanta gr. de lievito de bira,
- sugo de limòn,
- setanta gr. de mandole tritade,
- sal,
- gusto de vanilia.
Come far:
Dolçe a forma de stela a çinque ponte con 'na bogna 'n meso. Impastàr i òvi con la farina, el botiér, el sùcaro, el sugo de meso limòn, un poco de aqua e par ultimo un pìsego de sàl e la vanilia. Ciapàr el pastón e cassarghelo drénto al carateristico stampo. Métar sòra le mandole e sùcaro, infornàr a 150°Tempo 1h.
|
