La rubrica de la cusìna in tòla nel segno de la tradissión veronese. Gh’émo ‘l piasér de presentàr càlche réçèta al gran “Radécio rósso de Verona”, che se’l cóltìva a Caselón. Le récète, che répórtémo qua, i-è tòlte da libro “L’oro della Bassa” (veronese) – Ricettario a cura dell’Associazione Pro Loco ‘Casaleone-Carpanea’, publicà ‘n ócasión del ‘IV Concorso Gastronòmico Radécio d’Arzènto’, del 3 de diçèmbre 2008.
| FAGÓTÌNI DE MÀNZO SU LETO DE RADÉCIO |
Cosa ghe vol:
Fagótìni de mànzo, ‘mpénìdi de puìna, sóra ‘n lèto de Radécio de Verona. Par 4 parsóne:
- 150 gràmi de puìna frésca
- 250 gràmi de Radécio de Verona
- 4 fétìne de filèto de mànzo
- 1 limón
- mèzo bicér de òio de óliva ‘stravérgine
- mèzo cuciàr de sènapa
- sàl e péar, quanto i bàsta.
Come far:
Se bàte, un poco le fétìne de mànzo. Se le sàla e se le péara. Se spàlma la puìna, dopo ‘vèrla bèn laóràda. Se sèra ‘l fagótìn. Se prepara la salsa co’l limón, co’ l'òio e la sènapa. Se parécia i córesìni de radécio, bèn lavà, ‘n mèzo al piàto e se ghé méte de sóra i fagótìni e se cóndìsse tùto con la salsa.
|
| BRANZÌN AL SCARTÒSSO CO' RADÉCIO RÓSSO |
Cosa ghe vol:
‘Ngrédienti par 4 parsóne:
- 4 branzìni (da pórssión)
- 50 gràmi de botiér
- 8 ólìve nere de Gaeta sènsa òsso
- 2 teste de Radécio rósso de Verona
- 2 pomodòri bèn maùri
- Parsémolo, àio, sàl e péar
Come far: Nétàr, lavàr e taiàr ‘l Radécio a tóchétìni. Taiàr le ólìve a metà e ‘l pomodòro a cubéti. Tritàr ‘l parsémolo e l’àio. Paréciàr 4 fòi de carta stagnòla e métàrghe sóra i brànzìni, lavàdi, bèn nètàdi e sènsa lische. Métar ‘n tè la pànsa dei branzìni ‘l parsémolo, le ólìve, ‘l radécio, ‘l tritàdo de àio e de parsémolo, ‘l botiér, ‘l sàl e ‘l péar. Séràr a scartòsso e métar ‘n té’l forno a 180 gràdi par 20 mènùdi.
|
| RADÉCIO RÓSSO DE VERONA FRÌTO |
Cosa ghe vol:
‘Ngrédienti par 4 parsóne:
- 150 gràmi de farina
- 200 gràmi de bìra ciàra
- 400 gràmi de Radécio rósso de Verona
- 1 óvo
- Òio ‘staverzìne de ólìva vènéto par frìsar
- Sàl (quanto ghe ne bàsta).
Come far: In una cassaróla picenina, tamisàr la farina, e méscolàndo co’ càlcòsa, ùdàr tùta la bìra fìn che vièn fóra ‘n compòsto lìssio e tanto flùido. Zóntàrghe la bàla de óvo e méscolàr, par ssiòliar ‘véntuai grùmi. Lassàr réposàr tùto par ‘n par de óre. ‘Ntànto, lavàr ‘l radécio e torghe via la radìsa, sùgàrlo e taiàrlo ‘n quatro pàrte. Bàtar a neve la ciàra e ‘malgamàrla àla pastèla. Métar drénto ‘n stó composto i tòchéti de radécio e métarli ‘n padèla co’ òio bèn caldo. Frìsarli par póchi ménùdi, e po’, métarli su de ‘n fòio de carta sugarìna, par tórghe l’òio che gh’è ‘n più. Spólvaràr de sal e servìr “caldissimo”.
|
