LA RENA DOMILA - DAL 1999 EL SITO VERONESE DEI VERONESI IN VERONESE

DIMANDE & RISPOSTE 2021 2°T

SECONDO TURNO

1)  La parola "Asii o Asi" un tempo vegnéa utilisà a Àesa par indicàr: p.5
a)  i còvoli de le cave de la piéra Galina
b)  I capifaméia de la Consortia
c)  lóghi stréti 'ndóe métar le brèle sul Lorì 

Ad Avesa tuti i lavandari i dovea averghe na dotassion ben precisa: el musso, la stala, el fenil par la bestia, un campeto par el forajo che ‘l dovea nutrirlo e che ‘l costituea l’area par sugar la roba in pieno sol, e un careto. I dovea anca averghe un logheto par segnar (marcar) i capi da lavar, par la loro piegadura e l’insacamento e tuto l’armamentario par la vera e propria profession del lavar le robe: la caldera par el bojo, el missioto ciamado anca macaòr (molto spesso l’era un manego da spazzaora), la brenta par lo scolo del lissiasso, e l’àsio. Cossa érelo l’àsio? L’era el posto fisso, “imutabile e inalienabile” che ogni lavandaro el gh’avea su la riva del fosso con l’acqua corente: insoma, na specie de proprietà convensional, nata da l’uso consacrà dal tempo che la consistea in un’area atresada su una o tute do le rive, ocupa’ de diritto pratico da la fameja del lavandar, anca se no era mai sta pagà un scheo. No gh’era ati notarili o compromessi scriti, ma s’avea creado na sorta de usucapion che l’era valida nei giorni de laoro che la se trasmetea de pare in fiol. Ne l’àsio era de obligo le brele (le casete de legno dove i lavandari i se insenociava par lavar), la piera andoe sbatar la biancheria e le tende par protegiarse dal sol, da l’acqua, o da la neve, parchè no se dovea fermarse. (Ave Mate).

El Lorì l’è el progno che passa proprio in mezo a Aesa (Avesa da “aves” che vol dir falda acquifera) e l’è sta la richessa del posto sia par i canpi che par i molinari, i lanari e infine par le lavandare. De fati el progno el passa fin soto le case, do che gh’è la sorgente. Nei trati de Via Sorgente Lorì, Via Camaldola, Via Intentro e Via Campagnetta se pol vedar le aque del Lorì che score ancora in un fosso limità da varie piere squadrade par tegner su sia le "brele", le mote de pani da rasentar, sia la "piera" par insaonar e batar la roba da lavar. Brela e piera iera i asii ("asio" in italian vol dir “agio”) che permetea de lavar e resentar con più mestier i pani dopo la lissia nela brenta. Nela brela de legno le lavandare le laorava insenociade par rivar a l’aqua co man e brassi. Nel borgo gh’è ncora dele lissiare, ndò che le lavandare boliva la roba da lavar, e anca dei molini. (Trio Paloma)

2) Létare missiàde - Te devi sistemàrle par far saltàr fóra 'na parola de 7 létare
Titolo: "sensa schèi": p.5
AEOOPRT POARETO

3) Su stradón Porta Palio al n° 20, gh'è 'na costrussión che un tempo l'éra: p.3 
a) la fàbrica de la bìra Dobrawsky
b) 'na césa dedicà a S.Caterina
c)  'na stala par i cavài del Palio

B – CéSA Dédicà a S. Caterina. In corispondensa de’ n. 20 se riconose ancora la faciada de la Céseta de S. Caterina Vergine e martire. Vissin al’ n. 18 gh’era cuela de Ognisanti e trà le do Cése ghera el “spedali” de la contràa. Sul portàl de’ n. 20 catemo scrito DIVAE CATHERINAE –SACRUM VICINIA POSUIT (vicina volea dir CONFRATERNITA). Cuan lè stà el momento de far la scrita el scalpelin nò’ la tegnù conto de la longhessa de la scrita e co’ la scusa chel no’ g’avea pìi spassio la S de POSUIT la se càta drento la O. In stà ceseta se catàa i confradei de le Stimate e de S.Francesco. Ne’ 1618 co’ la scusa che iera diventai tanti i gà pensà de costruir u’ nòo oratorio dedicà a le SACRE STIMATE DE SAN FRANCESCO, su dei lasciti de la nobile CATERINA CIPOLLA  e nel 1624 i confradei in procession ià lassado la ceseta de S.Caterina. Le dò Cése jè stade recuiside da’ DEMANIO NAPOLEONICO EL 15 Noenbre 1808. (I Fioi del Bandàr).

La césa de Santa Caterina, l’era vissina a quela de Ognisanti, jera separè da l’ospedal de la contrada. De sta césa no se conosse niente fin al XVI secolo, quando ghè stà na visita pastoral.  Se sa che nel 1614 chì a se riunea i Confradei de le Stimate de San Francesco, che, visto quanti i era, e avendoghe avudo in dono da na bona e nobile dona, tale Caterina Cipola alcune case de la Citadela, vissin a la Santa Trinità, jà deciso de costruir un proprio oratorio dedicandolo a le sacre Stimate de San Francesco (la césa de le Stimate) dove jè andè a star nel 1624.  A questi ghe subentrado qua quei de San Giusepe, che i ghe restadi fin a le sopression de Napoleon, insieme a quela de Ognisanti, par essar vendu a privati.  Se sa che gh’era de le bele opere d’arte del Caroto, de Bernardino India e altri artisti conossudi. De quela césa lì, ghe restà solo la strutura esterna con la copertura a volta e la so semplice faciada, mentre su l’architrave del portale ghe resta l’epigrafe con scrito sora:” DIVAE CATERINAE – SACRUM VICINIA POSUIT”. (Ave Mate)

4) "....dentro alla mia patria un campo...di rozze mura", i-è vèrsi poetici de protesta del Pindemonte par dirne: p.5 
a) de un campo sensa àlzaro che vegnéa quertà da le aque de l'Adese
b) de un camposànto con morti muciadi una sora l'altro
c) del campo da balón in Via Pallone

“I Cimiteri” di Ippolito Pindemonte
“Le anguste case e i bassi e freddi letti
Ove il raggio del sol mai non penètra,
E quella che Verona ai suoi negletti
Figli concede ultima stanza tetra,
Pria che a terra me pur la Parca getti,
Metter vogl'io su la sdegnata cetra.
Vieni, o Dea, vieni a me dal tuo Permesso,
E il crin mi cingi di feral cipresso.
tendesi dentro alla mia patria un campo,
di rozze mura ignobilmente cinto,
dove, sparito della vita il lampo,
ciascun sotterra a farsi polve è spinto.
Sesso, età, grado non ha quindi scampo,
questo corpo con quel giace indistinto:
ignoranza o saver, colpa o virtude
una sola vil tomba inghiotte e chiude.”

El Foscolo el passa da Verona nel 1806 dove gh’era el nostro Ipolito. All’epoca el problema l’era proprio costituido da le sepolture. Dopo che i Francesi ja stabilido de sepelir i morti in struture fora da le mura par questioni de igiene, anca a Verona s’ha presentado sto problema da sistemar...e infati, da li a poco, ghe sarà dato a Giuseppe Barbieri el compito de progetar el cimitero monumental. (Ave Mate)

5) In che Comùn se cata la césa ne la foto?: p.3
a) Ronco
b) Belfiór
c) Colognola
d) specificàr

La césa in question le quela dei Santi Filipo e Giaco de Scardevara, a Ronco a l’Adese. Par che la sia sta costruida ne l’XI secolo. Con ogni probabilità l’è stà fondada dai monaci benedetini che i s’ha fermado qua dal X secolo. Ne la famosa bola del 1145 de papa Eugenio III se ricorda “curtem Scardavariae cum ecclesis et decimis”. Nel 1490 s’ha consacrà l’altar magior. Le deventà parochia nel 1612. La faciada l’è a capana rivolta a ocidente. La tore campanaria la sta sul fianco nord del presbiteri. La pianta le a croce latina con na sola aula. Solo poche parti de sta césa je originali. (Ave Mate)

RONCO FRAZ. SCARDEVARA Césa dedicà ai SANTI FILIPPO E GIACOMO. La cèsa parochiale là catémo nominada nela bola del Papa EUGENIO III zà nel 1145 “CURTEM SCARDEVARAE CUM ECCLESIS ET DECINIS”. El stile lè romanico e l’abside lè cuèla original che se pensa la sia del sec. X-XI,  co’ de’ capitèi scolpidi co’ varie figure. L’altar major i là consacrà ne’ 1490. E’ restà pochi tochi de la vecia Césa.Dentro no’ te cati pì el vecio stil romanico. La gà un dipinto che rafigura l’ASSUNSION DE LA VERGINE del 1600 de la scola de’ A Turchi ciamado L’ORBETO. (Fioi del Bandàr)

6) Completàr la poesia max 8 righe (no de manco e no de più), co' fantasia e bon senso; punti da 4 a 7. Se no te rispondi o te scrivi 7 o 9 righe 0 punti, parole italiane/italianisàde 1/2 punto in manco. Te pol modificàr l'ordine de le righe. Parole volgari voto 4. El premio Barbarani va a premiàr ci ghe soméia co' la so poesia a quela Barbaraniana:

Fora dal mondo, fora da la gente
son 'nda' in convento a far penitensa,
son scapà via par ti da casa mia,
par no farte patir la gelosia.
Ti no t'è dito o fato capir gnente
e gnanca mì no t'ho mai fato gnente,
ognun co'l so magon, in cor e in mente,
butémo via el vivar, par manco de 'na lente...... (v.7)
(Brase Cuèrte)

El problema riscontrà l'éra ne la riga "Fora dal mondo, fora da la gente" che in tante "opere" la g'a spacà in do la poesia. Le Brase Querte con furbissia, i g'a preferido métarla par prima in compagnia del "convento a far penitensa", lassando ai pensieri nel mèso e a la moràl ne la parte finàl, come faséa Barbarani.

DIMANDE & RISPOSTE 2021 3°T

TERSO TURNO

1) In che Comùn se cata la césa ne la foto?: p.3
a) Monteforte
b) Vila Bartolomea
c) Cavrìn

La cesa ne la foto le quela de San Bartolomeo a Vila Bartolomea. No se conosse le so origini, forse se pol dir che l’è sta fata nel XII secolo, in pratica in epoca romanica. Questa che vedemo ai giorni nostri l’è sta’ costruia nel 1855 par sostituir un vecio edificio de epoca romanica, butado zo parchè l’era in precarie condission statiche. La cesa la se presenta con na faciada in stil neoclassico. La tore campanaria l’è sul fianco nord de la cesa. La pianta l’è come i dise i architeti “ad aula unica retangolar”, con un presbiterio quadrangolar, rialsado de tre scalini e chel finisse con un coro semicircolare; longo i fianchi de la navata catemo quatro semi capele che le vede l’altar de la Croce e  quelo de l’Adolorata a sinistra,  e quei de S. Antonio da Padoa e de la Madona del Carmelo da quel’altra parte. La cesa la vede anca de le cornise in stuco e de le piture, ma i muri i vede na scansion dovuda a la presensa de semicolone ioniche de ordine gigante, su le quali se imposta la cornisa bela alta. Quatro copie de pilastri ionici binadi (dopi) i sostien la cupola che la sta de sora el presbiterio. In mezo a la parete de l’abside a ghe la pala del Cinquecento che la mostra “La Madona con el Bambin Gesù in gloria, con S. Antonio da Padoa, S. Giovani Batista, S. Bartolomeo e S. Antonio Abate”. L’aula l’è cuerta da na volta a padiglion con ongie e lunete laterali, la gha decorassion a tempera e con el dipinto central  chel raffigura “l’Assunsion de la Madona”. El presbiterio el gha sta cupola con decorassioni a cassetoni; i decori de le volte je ste fati nel 1926 da Casimiro Salvelli. El pavimento l’è fato in lastre de rosso de Verona e piera bianco- rosa. (Ave Mate).

Cesa de S.Bartolomeo, la prima cèsa de Vila Bartolomea lè stà costruida in stile romanico tra i sec. XII e XIII. Zà nel 1460 l’era na parochia. Lè stà demolida nel 1855 parchè no’ l’era mia sicura. La Cèsa atual lè stà costruida tra el 1863 e 1881 nel stile neoclasico. En nòo canpanil ala fine nò lè stà mai costruido parchè el teren no’ lera mia sicuro e co’ stà storia a lato de la Cèsa ghè el vecio campanil in stile romanico de’ XIII sec. La Cèsa lè stà ristruturada nel 1948 e, el 24 otobre del 1949 lè stada consacrada. Nel tempo là subido tante ristruturassioni sia fora che drento terminade nei ani 2000 (I Fioi del Bandàr)

2) Létare missiàde - Te devi sistemàrle par far saltàr fóra el titolo de 'na poesia de Barbarani: p.5
solussion: 3-3-3-4  SAN ZEN CHE RIDE   ACDEEEHINNRSZ

3) Secondo una mapa del teritorio veronese che se pol catàr su l'Archivio de Stato de Verona anca digitàl, del 1747, "La Busa del ghiacio in Campegno", l'è l'atuàl: p.5
a-Spluga de la Preta tacà al Corno D'Aquilio
b-Buso del Valón tacà a San Giorgio > Campegno l'è 'na malga tacà a San Giorgio ben visibile su "Gùgol Map"
c-Buso del Bolpe nel comùn de Roarè
d-Bus de le Tacole sul Monte Baldo

El titolo de sta mappa qua, che l'é ne l'Archivio de Stato de Verona l'è "El teritorio veronese e sua diocese nei so veri confini coi posti de publiche guardie". Come già anticipà, la risale al 1747, l'é na carta topografica comisionà dal conte Burri Scipione al cartografo Piccoli Girolamo, un perito abastansa noto a quel tempo. L'è na bela svirgola de mapa tuto somado, un metro de altessa par 77 centimetri de larghessa e l'è su tela. (Ave mate)

El Buso del Valòn lè una de le poche cavità carsiche che la conserva drento del giasso tuto el tempo de l'ano. Lè 'na voragine tonda profonda 48mt. Doe i cumuli de giasso e neve i sa conservadi ben grassie a le condissioni del clima drento la grota. A l’inissio del ‘900 stò posso natural l’era utilisà come giassara doe vegnea cavà el giasso da vendar nela pianura. La parte Ovest la presenta 4 cavità scavade da l’omo e forse lè stà usada durante la prima guera mondiale par mantegner i generi alimentari. La disesa lè predisposta da dò parti. Ghè cuela pìi fasile e molto bela par la grandessa de la voragine e molto interesante parchè te pol vedàr el giasso sempre presente sprofondà ne’ l’inghiotitoio. (I Fioi del Bandàr)

4) Quale de sti pónti l'éra un tempo su l'Adeséto? : p.3
a-Ponte Rofiolo
b-Ponte Newille
c-Ponte Postumio
d...specificàr

Questo l’è ancora ancò un toponimo che trovemo indicà in quela via che la va da S. Piero Incarnario a Via Pallone. Sto toponimo lo trovemo za nel XIII secolo, e l’è sta’ ricavado da quel omonimo ponte che nol ghe più, posisionado ad atraversar l’Adigeto fin al 1893, quando sto “rio fiol” de l’Adese l’è sta’ interà. Le ipotesi del nome je do’. Una la le fa derivar da “Rio Fiol”, cioè come se disea, fiume fiol de l’Adese. La seconda, più improbabile, la portaria a un baso rilievo funerario romano, chel se vede a destra de le mura, a l’imboco de via del Pontiere. Su sta scultura ghe sta quatro busti de omeni. Secondo na legendaria storia de oscura proveniensa, questi i saria stadi i protagonisti de la costrussion del ponte: un bopà con i so tre fioj, che i avarìa copà el so genitor dopo na baruffa, scopiada durante i laori. Ci sostien sta ipotesi, el nome “Rofiolo” el derivaria da reo filio, come je stadi ognuno de sti butei. A nojaltri ne par abastansa assurda sta roba… e la conclusion più logica, che l’è quela de i studiosi seri, lè che el nome el deriva dal fiol de l’Adese. (Ave Mate)

El servea par atraversar l’Adigeto fin al 1893 ano che lè stado interà. Par chel nome el derivasse da RIO FIOL “fiume Figlio” filio del fiume Adige. Ghè anca ‘na legenda senpre su’ el nome e la se riferisse a un bassorilievo funerario de epoca romana che se pol vedar a la destra de le mura a l’inissio de via del Pontier. La scultura la rafigura cuatro busti de omeni. Secondo la legenda i saria stadi i operai che costruiva el ponte, un pare e tri fioi che durante el laoro jà barufà  e i trì fioi jà copà el pare. Da cuà el nome ROFIOLO “REO FILIO” come i trì fioi. (I Fioi del Bandàr)

5) El pitór Francesco Barbieri nel XVII° secolo l'éra ciamà: : p.3
a-Lo Sfrisato da no sbaiàrse co' Giovàn Francesco "El Guercino"
b-Lo Straforo
c-Lo Zangara
d.... specificàr

Francesco Barbieri, de costumaja Lo Sfrisato, l’era nativo de Legnago. L’era sta’ solda’ de la republica Veneta e a Brescia l’è deventà amigo del pitor Gandini, con lu l’à scominzià lo studio de l’arte. Tornado a casa, l’ha studiado con el Carpioni, el Giulio, del quale l’è diventado seguace. L’è stado un artista fantasioso. L’à dipinto fati de storia e de mitologia, paesaggi e sogeti de cesa che i ornava galerie private e le case dei siori, ma de tute ste robe poco è restado. E’ andà perso anca el so capolavoro, l’afresco de Santa Maria de la Giara con la trilogia de Maria, firmado e datado 1678, l’è andà in Ungheria, comprado da Federico Rosenowski dal vecio proprietario, tal Brasavola. De lu no resta che na tela su l’altar de San Gaetano ne la cesa de San Nicolò, un afresco de la volta sempre li, na pala de altar a Vila Bartolomea e do tele a Cerea. Uno de so fioj, de nome Lorenzo, l’è diventado pitor. (Ave Mate)

Francesco Barbieri l’era nato a Legnago. Là fato el soldà ne la Republica Veneta a Bressia doe l’avea fato amicissia col pitòr Gandini e co’ lù la scominsià a studiar l’arte. Tornà a casa la continuà a studiar col pitor Carpioni del cuale el diventa alievo. Lè stà un pitor fantasioso, la dipinto fati storici e mitologici, paesagi e sogeti religiosi par le galerie private e le case dei siori. De le so opere è restà poco o niente. Un so capolavoro lè stà l’afresco de SANTA MARIA DE LA GHIAIA co’ la trilogia de Maria firmà e datado 1678 el cuale lè finio in Ungheria. De lo SFRISATO ne resta ‘na tela de l’altar de SAN GAETANO ne la Cèsa de SAN NICOLO’, un afresco ne la volta senpre nela cèsa de S.Nicolò, ‘na pala d’altar a Vilabartolomea e do tele a Zerea. Un so fiol de nome Lorenzo l’era anca lù un pitor. (I Fioi del Bandàr)

6) Completàr la poesia max 8 righe (no de manco e no de più), co' fantasia e bon senso; punti da 4 a 7. Se no te rispondi o te scrivi 7 o 9 righe 0 punti, parole italiane/italianisàde 1/2 punto in manco. Te pol modificàr l'ordine de le righe. Parole volgari voto 4. El premio Barbarani va a premiàr ci ghe soméia co' la so poesia a quela Barbaraniana:

Nel terso turno émo catà: poesie co' piassè parole in italiàn, poesie sensa sogèto che dovémo intivàr a cosa se vol riferirse, poesie co' titolo. Come dito nele precedenti edissioni el titolo l'è in più, se cavo el titolo e no gh'è el sogèto ne la poesia, par quanto sia bèla no la riva al voto 6.

Nina, sèra la porta che riva el vento!
Far malani l'è el so divertimento!
El spassa le foie balando col tempo
e i àlbari se piega al so tormento.
El bussa sui veri, el fa tremar le case
e quando el riva in fondo a la cusina,
se dorme un fogo, el supia su le brase,
par scaldarghe el cor a la me Nina! (v.7)
(Bele Muse - Barçelona)                         

DIMANDA FINALISSIMA 2021

AAACDEEIILNNNOPRTT,
ADEEEEFLMMOR
_ _ - _ _ _ - _ _ - _ _ _ _ _ - _ _ _ _ _ _ ,
_ _ - _ _ _ _- _ _ - _ _ _ _