Canpionato Dialetàl

El Canpionato del mondo de le tradissioni veronesi, un qualcosa de unico, par imparàr qualcosa e portàr la veronesità nel mondo. Ognuno de voialtri pol parteçipàr e no costa gnente, l'importante l'è gòdarse. Ogni canpionato finisse co' la consegna de le pergamene e dei premi durante la serata evento, par darghe la possibilità a ci pol, de incontrarse, far do ciàcole e passàr un momento in alegria. Varda le foto, lèsi le dimande e le risposte de l'ultima edissión. Premiassion 2020 in streaming Youtube

 



REGOLAMENTO CANPIONATO 2021

REGOLAMENTO CANPIONATO 2021

REGOLAMENTO CANPIONATO v.2021

El Diretòr el farà de le dimande (da 6 par turno) che'l spedirà via imeil
(par 3 turni) a tute le squadre parteçipanti + dimanda finàl plei of su:
-Parole dialetali -Storia de Verona, Provincia, Carnevale Veronese
-Cruciverba e Anagrama
-Cartoline vecie de Verona e Provincia
-Foto su l'arte a Verona e de cantoni sconti de Verona e Provincia
-Poesie
-Cultura Moderna Veronese
Le squadre le dovrà rispòndar entro un dato periodo (vedi p.4.1) al'indirisso canpionato@larenadomila.it

ISCRISSIONI - verte dal 14 febràr al 18 aprìl 2021 - Min 10 / Max 20 squadre
(in caso de nùmarose richieste el nùmaro pol aumentàr)
Par iscrivarse bisogna lésar tuto el regolamento e scrìvar a canpionato@larenadomila.it specificando:
-Nome dela Squadra (es. Paese, soranome, roba da magnar o qualsiasi altra cosa che la g'à a che far Verona e la cultura Veronese)
-Nùmaro Conponenti: da 2 a 4 Veronesi Provinsia – da 1 a 4 Veronesi fora Provinsia – 6 se presenti dei parenti (es.moiér o fioi ecc.) – Squadre miste da 1 a 4
-Nome o Soranome dei componenti (gnente cognomi)
(L' è vietado canbiar i componenti durante el canpionato)
-Indirisso I-meil del capitàn dela squadra (par ci vol anca un secondo indirisso) L' indirisso no'l pol essar canbià durante el canpionato.
-Logo de Proveniensa
-La Diression se la vol ve spedirà via imeil la conferma d'iscrission entro 24 ore da la data de spedission de la vostra imeil con un codice identificativo de squadra.
-Una 'olta iscriti vegnarà spedì la locandina ricordo del canpionato.
-No pol partecipàr al Canpionato ci l'è membro o ci l'è stà membro de la giuria (e relativi familiari) e/o ci colabora nel sito con rubriche storiche, cruciverba, proerbi, modi de dir. Ci l'a protestà o invià imeil de protesta no pol parteçipàr.

1.Canpionato:
1.1 Canpionato Dialetàl su 3 turni + plei of.
1.2 Se nissuni intìva la dimànda dei plei-of, vardémo la classìfica del tèrso turno
1.3 El Canpionato l'è a giron unico

2.Puntegio:
2.1 El puntegio el vien somà dal'inissio a la fine del canpionato. puntegio I° Turno + II° turno + III° turno.
2.2. In caso de parità de puntegio se varda ci l'à sbajà de manco.
2.2.1 Se persiste la parità se varda l'ordine de arivo dele risposte. Se in questa speciàl classifica la difarensa la risulterà inferior a 50 punti le squadre le sarà classificade a pari merito.
2.2.2 L'ordine de arivo el sarà convertì in puntegio e vegnarà publicado: es: 1° punti 200 - 2° punti 170 - 3° punti 160 ecc. (oviamente el vegnarà somà par tuti i 4 turni) tegnendo conto de velocità (1°-2°-3° ecc), giorno d'arivo (1°giorno-2° Giorno ecc), erori comessi ne le dimande.
2.3 La clasifica del canpionato la vegnarà publicada dopo 3 giorni dal termine del tempo de risposta.

3.Dimande:
3.1 El Diretor el spedirà a tute le squadre le dimande via imeil, sié par turno. Se par motivi tenici le squadre no le riceve le dimande, bisogna consultàr obligatoriamente el sito.
3.2 Come zà specificado ne la "Presentassion" le dimande i è divise par categorie
3.3 Le Dimande le vegnarà spedì la sera prima de la data stabilì entro le ore 22. In caso de problemi la giuria Ve risponderà entro 24 ore da l'invio de la "richiesta d'aiuto".
3.4 "No serVe essar poeta!" - Inventa 'na Poesia... La Poesia sarà composta in 8 righe; a esempio le righe dispari le sarà inserì dal Diretor (dopo aver siélto da le poesie del Berto) mentre le righe pari da le squadre. Deve vegnér fora 'na poesia de senso compiù. Vien premià soratuto "l'idea" e la "fantasia". Par ci sbàia a scrìvar 'na lètara serémo un ocio, basta che no sia gravi da impedir de capir el senso, fasemo nojaltri le eventuali coressioni prima de publicarle. Le poesie le vegnarà composte a partir dal primo turno. 8 righe (se in più e in manco el voto sarà 0)

Un esempio:
Diretor: Eco qua mondo pitoco
Squadra: ...la balada de l'oco!...
Diretor: Drito in meso a la cusina
Squadra: ...su na teja picenina...
Diretor: Me comare moscardina
Squadra: ...ghe da 'na saladina...
Diretor: Che bisogna festegiar
Squadra: ...che diman 'ndemo al mar!

3.5 Un tochetìn - nel secondo turno vegnarà consegnà dei tochetìni de 'na cartolina del '900. Ci ghe imbroca diséndo la località giusta ciapa 5 punti, se ghe imbròca nel terso turno co' più tochetìni ciàpa 3 punti.

3.6 "Coeficente de dificoltà" se la squadra lassa le righe ne l'ordine proposto dal Diretor, le g'avarà un puntegio piassé alto. Se una squadra vol missiàr l'ordine de le righe proposto, ghe vegnarà cavà 1/2 punto.

4.Risposte:
4.1 Tempi de risposta via imeil a canpionato@larenadomila.it
I° Turno: 19-26 aprìl 2021
II° Turno: 03-10 maio 2021
III° Turno: 17-24 maio 2021
Finalissima prime 5 squadre (+ 2 a pari p.5a): 30 maio - 4 dugno 2021

4.4 Se pol rispòndar a partìr da le ore 12 del primo giorno (ci risponde prima, el vegnarà considerà come ultimo a rispòndar).
4.5 Ci risponde: un giorno oltre el termine stabilido ghe vegnarà cavà 3 punti du giorni oltre el termine stabilido el vegnarà cavà 5 punti ci no risponde el vegnarà espulso
4.6 Ogni 'olta che se spedisse le risposte a canpionato@larenadomila.it, in automatico Ve sarà spedì un imeil de ricession da parte de l'organisassion. Se par caso non Ve 'riva la risposta de ricession entro poche ore, vol dir che l'organisassion no l'à ricevù nissun imeil da parte Vostra.
4.7 Ci risponde in maniera justa a tute le dimande e in poesia el ciapa almanco 6 (soto al 6 l'è considerà eròr), entro el 21 april nel 1° Turno -entro el 05 màio nel 2° Turno -entro el 19 majo nel 3° Turno, el ricevarà in regàl 2 punti in più in classifica a la fin del canpionato. Con 1 sbàio 1 punto. El bonus l'è valido solo sui tre turni.

5. Par i partecipanti: A tuti i partecipanti che i à risposto a tuti e tri i turni, ghe vegnarà spedì via imeil el diploma de partecipassion a parte la Pergamena de la Veronesità a le prime 3 classificà

Premiassion -  causa CoronaVirus l'è Sabo 05 dugno a le ore 21.15 sul canàl Youtube de www.larenadomila.it

5.1 Premi de Categoria
La squadra che risponde in maniera completa a le dimande (zontando altre informasioni a la risposta da dar) la gavarà el dirito al premio "Secia", altri premi:
Premio Asso de Cope = A la squadra seconda clasificada
Premio Sinpatia = Par el nome pi bel votà da le squadre partecipanti
Premio 12° Concorso Poesia Barbarani = A la poesia pi bela
Premio Mastino = A le squadre più combative che le rimonta almanco 5 posissioni in tri turni.

p.s. Ci parteçipa al canpionato l'è obligà a presentarse a la serata de premiassiòn co' almanco un componente (a parte i veronesi fora provinsia) o rìspondar, par st'ano a tuti i turni. El canpionato l'è 'na festa par Verona, par ci parteçipa e par ci organisa che ghe mete l'ànima, la Vostra presensa l'è fondamentàl par la riussida!

6. Concorso de Poesia Berto Barbarani: A la poesia più bela (p.3.4) vegnarà consegnà una cartolina-diploma inedita del grande Berto Barbarani. Par entràr tra le candidate al premio, te devi rispòndar in maniera giusta a 1 dimanda par ogni turno.

7.Reclami: IscrivendoTe al canpionato, Te si d'acordo sul regolamento in tuti i so ponti chi de sora indicadi e del giudissio insindacabile dela Diression. Dunque l'è proibido reclamàr. Ci reclama durante el canpionato el vegnarà espulso.

8.Conclusioni: Lo spirito justo par partecipàr al Canpionato l'è: -Averghe voja de imparàr qualcosa de novo. -Contribuìr con la propia sapiensa a la divulgassión de la nostra léngua. -No preocuparse se i risultadi jè negativi, non sà mai finìo de imparàr. -No 'bandonàr el Canpionato in corso, bisogna savér ciapàr anca i risultadi negativi, avendoghe così anca rispeto par ci organisa e de ci partecipa. -L'importante l'è parteçipàr, parchè quel che deve vìnsar l'è la léngua veronese.

P.S. Come da lege su la Privacy i dati de persone, indirissi imeil dei partecipanti non vegnarà ne distribuidi e ne publicadi sensa l'autorisassión dei interessadi su internet o altri sistemi de comunicassión. Questi dati i vegnarà utilisadi solo par comunicassioni tra La Rena Domila e i interessadi par invio dimande e/o informassioni relative al canpionato o al sito.

I CANPIONATI - LIVRE D'OR

I CANPIONATI - LIVRE D'0R
Edissión 01-2000 Primo Canpionato - Viva la pearà
Edissión 02-2000 Trofeo Barbarani - Viva la pearà
Edissión 03-2001 Trofeo XII Apostoli - Viva la Pearà
Edissión 04-2002 Trofeo Botega del vino - I Tri Dotori
Edissión 05-2003 Trofeo Papà del Gnoco - El Cavàl de Gonela
Edissión 06-2004 Trofeo Verona Rateriana - I Cavassini
Edissión 07-2005 Trofeo Tomaso Da Vico - La Famèja
Edissión 08-2006 Trofeo Porta San Zèn - Fritàja co'la sèola
Edissión 09-2007 Trofeo de l'Adese - Straca Massele / Bala che vegna
Edissión 10-2008 Decimo Canpionato - Butelèti sensa buganse
Edissión 11-2009 1°Trofeo Al Camiere - Fritàja co' la sèola
Edissión 12-2010 2°Trofeo Al Camiere - Le Ave Mate
Edissión 13-2011 3°Trofeo Al Camiere - I Du Falcheti
Edissión 14-2011 Cenpions Lig Trofeo de Santa Lussia - Taca la cola
Edissión 15-2013 4°Trofeo Al Camiere - Pescantinopoli
Edissión 16-2014 5°Trofeo Al Camiere - Fritàja co' la sèola 
Edissión 17-2015 Trofeo Sandokan - Dighe ochi ti a le ànare
Edissión 18-2016 Trofeo San Roco - Élo gnente?
Edissión 19-2017 2°Trofeo San Roco - Le Ave Mate
Edissión 20-2018 3°Trofeo San Roco - Elkjaer Sindaco
Edissión 21-2019 4°Trofeo San Roco - Fritàja co' la sèola 
Edissión 22-2020 - I Fioi del Bandàr

>> tute le edissioni

SQUADRE PARTECIPANTI 2021

SQUADRE PARTECIPANTI 2021
01-Fritaja co' la Seola 2 Verona
02-Ave Mate 3 Sanguinè/Regio Emilia
03-I Fioi del Bandàr 2 Stadio Borgo Milàn
04-Bràse cuèrte 6 Verona
05-Trio Paloma 3 Corubio, Parona, Somacampagna
06-Ganassoni  2 Toronto (CAN)
07-Bele muse 3 Barçelona (CAT)
08-Elkjaer Sindaco 3 Stadio Golosine
09-SRS I sèresù 3 Bussolengo/Pescantina/Áesa
10-Dighe ochi, ti, a le anare 3 Castel d'Assàn
11-I Sogni 5 San Michèl Ex. / Milàn 
12-Polenta e Fasói 2 Porto Alegre (BRA)
13-RiVr Plate 2 Rosario (ARG)
14-I Pignoli de l'Isolo 2 Bionde / Torìn

DIMANDE & RISPOSTE 2021 1°T

PRIMO TURNO

1) Nel XVII° sec. Marcantonio Maffei el g'a presentà al Consilio de Verona un progeto par sgrandàr el so Palasso de "Piassa Grande", Cosa no gh'éra de nóvo nel  progéto?..: p.3
a) 'na scala a bogonéla
b) un giardìn su la terassa
c) el león de S.Marco scolpìdo sul camìn

La suplica fata da Marcantonio Maffei e da so neodo Rolandino, l’è del 20 dicembre del 1626; i voléa ricostruir el loro palasso e i s’à rivolto al Consiglio Comunal, parchè  se intervenisse contro  quei de le boteghe soto i archi de la faciata, che i se oponea a la riforma degli archi stessi e al perfezionamento de l’edificio: i pensava de essar sostegnudi dal Comune. A la fine, el Comune el g’a dà reson ai Maffei, cussita jà podù scuminziar la ristruturassion o mejo la ricostrussion del palasso. No se conosse el nome de l’architeto, forse el vegnea da Roma, ma de sicuro, savemo che la scala a bogonela le sta voluda dal Marcantonio, savemo che la terrassa col giardin le stà zontà ne la seconda metà probabilmente del Seicento, insoma, ne par che no  possa essarghe de novo el leon de San Marco su un camin. Se sa che se podea tegner qualcosa de la vecia strutura (Ave Mate).

La dimanda faséa riferimento a la suplica del 1626 (sbajà su wikipedia 1629) e no cosa l'è stà costruì e modificà nel tempo. Un altro sbajo de le squadre, l'éra tegnér conto de cosa gh'éra de novo del progeto, la dimanda l'éra cosa NO gh'éra. El Leon sul camin no gh'è mai stà nei secoli. (El Comitato)



2) Tacà a Porta Borsari gh'è un tòco de piéra, a ci l'è dedicà? p.3
a) 'na buteléta ciamà Petronia Tertulla
b) a un console romàn ciamà Caio Maio Tartaro
c) a Giulio Cesare

Eco, sta ara la dise in latin: Dis Manibus/ Petroniai / C(ai) F(iliai)/Tertullai An(nos) XIII, che tradota vol dir: Agli Dei Mani, di Petronia Tertulla, figlia di Gaio, visse anni tredici. Se trata de un monumento funerario, fato far dal papà de Tertulla, par protegiar la fiola con l’aiuto dei Mani, gli Dei protetori de la fameja. La se cata dove passava la Via Postumia, che l’è deventà el decumano massimo, ma no l’è stà trovada lì: la ne dise solamente che na olta, come a Roma e in tutte le cità romane, se metéa i monumenti funerari, fora da la cità e longo le vie consolari, l’è giusto par dar na idea… se fussimo andà dopo l’arco dei Gavi, verso porta Palio, avaressimo visto ai lati de la Postumia tuti sti monumenti, come a Roma longo l’Apia antica. (Ave Mate)

dimanda 2

3) Foto de 'na 'olta - Le case ne la foto te podéi catarle a: p.5
a) Parona
b) Beverara
c) Campagnola
d) Dogana
e) S.Tomaso

dimanda 3

4) Létare missiàde - Te devi sistemàrle par far saltàr fóra 'na parola de 9 létare.
Titolo: "vegetàl" p.5
ABCINRSSU BRUSCANSI

5) "El campanìl de Rivoli" ne la poesia de Berto Barbarani... p.3
a) Se impissa
b) Se smorsa
c) Se indormensa

6) La "Lùdria" l'è: p3
a) 'na bestia (Lontra)
b) 'na fogàssa
c) 'na suca

DIMANDE & RISPOSTE 2021 2°T

SECONDO TURNO

1)  La parola "Asii o Asi" un tempo vegnéa utilisà a Àesa par indicàr: p.5
a)  i còvoli de le cave de la piéra Galina
b)  I capifaméia de la Consortia
c)  lóghi stréti 'ndóe métar le brèle sul Lorì 

Ad Avesa tuti i lavandari i dovea averghe na dotassion ben precisa: el musso, la stala, el fenil par la bestia, un campeto par el forajo che ‘l dovea nutrirlo e che ‘l costituea l’area par sugar la roba in pieno sol, e un careto. I dovea anca averghe un logheto par segnar (marcar) i capi da lavar, par la loro piegadura e l’insacamento e tuto l’armamentario par la vera e propria profession del lavar le robe: la caldera par el bojo, el missioto ciamado anca macaòr (molto spesso l’era un manego da spazzaora), la brenta par lo scolo del lissiasso, e l’àsio. Cossa érelo l’àsio? L’era el posto fisso, “imutabile e inalienabile” che ogni lavandaro el gh’avea su la riva del fosso con l’acqua corente: insoma, na specie de proprietà convensional, nata da l’uso consacrà dal tempo che la consistea in un’area atresada su una o tute do le rive, ocupa’ de diritto pratico da la fameja del lavandar, anca se no era mai sta pagà un scheo. No gh’era ati notarili o compromessi scriti, ma s’avea creado na sorta de usucapion che l’era valida nei giorni de laoro che la se trasmetea de pare in fiol. Ne l’àsio era de obligo le brele (le casete de legno dove i lavandari i se insenociava par lavar), la piera andoe sbatar la biancheria e le tende par protegiarse dal sol, da l’acqua, o da la neve, parchè no se dovea fermarse. (Ave Mate).

El Lorì l’è el progno che passa proprio in mezo a Aesa (Avesa da “aves” che vol dir falda acquifera) e l’è sta la richessa del posto sia par i canpi che par i molinari, i lanari e infine par le lavandare. De fati el progno el passa fin soto le case, do che gh’è la sorgente. 
Nei trati de Via Sorgente Lorì, Via Camaldola, Via Intentro e Via Campagnetta se pol vedar le aque del Lorì che score ancora in un fosso limità da varie piere squadrade par tegner su sia le "brele", le mote de pani da rasentar, sia la "piera" par insaonar e batar la roba da lavar. Brela e piera iera i asii ("asio" in italian vol dir “agio”) che permetea de lavar e resentar con più mestier i pani dopo la lissia nela brenta. Nela brela de legno le lavandare le laorava insenociade par rivar a l’aqua co man e brassi. Nel borgo gh’è ncora dele lissiare, ndò che le lavandare boliva la roba da lavar, e anca dei molini. (Trio Paloma)

2) Létare missiàde - Te devi sistemàrle par far saltàr fóra 'na parola de 7 létare
Titolo: "sensa schèi": p.5
AEOOPRT POARETO

3) Su stradón Porta Palio al n° 20, gh'è 'na costrussión che un tempo l'éra: p.3 
a) la fàbrica de la bìra Dobrawsky
b) 'na césa dedicà a S.Caterina
c)  'na stala par i cavài del Palio

B – CéSA Dédicà a S. Caterina. In corispondensa de’ n. 20 se riconose ancora la faciada de la Céseta de S. Caterina Vergine e martire. Vissin al’ n. 18 gh’era cuela de Ognisanti e trà le do Cése ghera el “spedali” de la contràa. Sul portàl de’ n. 20 catemo scrito DIVAE CATHERINAE –SACRUM VICINIA POSUIT (vicina volea dir CONFRATERNITA). Cuan lè stà el momento de far la scrita el scalpelin nò’ la tegnù conto de la longhessa de la scrita e co’ la scusa chel no’ g’avea pìi spassio la S de POSUIT la se càta drento la O. In stà ceseta se catàa i confradei de le Stimate e de S.Francesco. Ne’ 1618 co’ la scusa che iera diventai tanti i gà pensà de costruir u’ nòo oratorio dedicà a le SACRE STIMATE DE SAN FRANCESCO, su dei lasciti de la nobile CATERINA CIPOLLA  e nel 1624 i confradei in procession ià lassado la ceseta de S.Caterina. Le dò Cése jè stade recuiside da’ DEMANIO NAPOLEONICO EL 15 Noenbre 1808. (I Fioi del Bandàr).

La césa de Santa Caterina, l’era vissina a quela de Ognisanti, jera separè da l’ospedal de la contrada. De sta césa no se conosse niente fin al XVI secolo, quando ghè stà na visita pastoral. 
 Se sa che nel 1614 chì a se riunea i Confradei de le Stimate de San Francesco, che, visto quanti i era, e avendoghe avudo in dono da na bona e nobile dona, tale Caterina Cipola alcune case de la Citadela, vissin a la Santa Trinità, jà deciso de costruir un proprio oratorio dedicandolo a le sacre Stimate de San Francesco (la césa de le Stimate) dove jè andè a star nel 1624.  A questi ghe subentrado qua quei de San Giusepe, che i ghe restadi fin a le sopression de Napoleon, insieme a quela de Ognisanti, par essar vendu a privati.  Se sa che gh’era de le bele opere d’arte del Caroto, de Bernardino India e altri artisti conossudi. De quela césa lì, ghe restà solo la strutura esterna con la copertura a volta e la so semplice faciada, mentre su l’architrave del portale ghe resta l’epigrafe con scrito sora:” DIVAE CATERINAE – SACRUM VICINIA POSUIT”. (Ave Mate)

03 23

4) "....dentro alla mia patria un campo...di rozze mura", i-è vèrsi poetici de protesta del Pindemonte par dirne: p.5 
a) de un campo sensa àlzaro che vegnéa quertà da le aque de l'Adese
b) de un camposànto con morti muciadi una sora l'altro
c) del campo da balón in Via Pallone

“I Cimiteri” di Ippolito Pindemonte
“Le anguste case e i bassi e freddi letti
Ove il raggio del sol mai non penètra,
E quella che Verona ai suoi negletti
Figli concede ultima stanza tetra,
Pria che a terra me pur la Parca getti,
Metter vogl'io su la sdegnata cetra.
Vieni, o Dea, vieni a me dal tuo Permesso,
E il crin mi cingi di feral cipresso.
tendesi dentro alla mia patria un campo,
di rozze mura ignobilmente cinto,
dove, sparito della vita il lampo,
ciascun sotterra a farsi polve è spinto.
Sesso, età, grado non ha quindi scampo,
questo corpo con quel giace indistinto:
ignoranza o saver, colpa o virtude
una sola vil tomba inghiotte e chiude.”

El Foscolo el passa da Verona nel 1806 dove gh’era el nostro Ipolito. All’epoca el problema l’era proprio costituido da le sepolture. Dopo che i Francesi ja stabilido de sepelir i morti in struture fora da le mura par questioni de igiene, anca a Verona s’ha presentado sto problema da sistemar...e infati, da li a poco, ghe sarà dato a Giuseppe Barbieri el compito de progetar el cimitero monumental. (Ave Mate)



5) In che Comùn se cata la césa ne la foto?: p.3
a) Ronco
b) Belfiór
c) Colognola
d) specificàr

04 23

La césa in question le quela dei Santi Filipo e Giaco de Scardevara, a Ronco a l’Adese. Par che la sia sta costruida ne l’XI secolo. Con ogni probabilità l’è stà fondada dai monaci benedetini che i s’ha fermado qua dal X secolo. Ne la famosa bola del 1145 de papa Eugenio III se ricorda “curtem Scardavariae cum ecclesis et decimis”. Nel 1490 s’ha consacrà l’altar magior. Le deventà parochia nel 1612. La faciada l’è a capana rivolta a ocidente. La tore campanaria la sta sul fianco nord del presbiteri. La pianta le a croce latina con na sola aula. Solo poche parti de sta césa je originali. (Ave Mate)

RONCO FRAZ. SCARDEVARA Césa dedicà ai SANTI FILIPPO E GIACOMO. La cèsa parochiale là catémo nominada nela bola del Papa EUGENIO III zà nel 1145 “CURTEM SCARDEVARAE CUM ECCLESIS ET DECINIS”. El stile lè romanico e l’abside lè cuèla original che se pensa la sia del sec. X-XI,  co’ de’ capitèi scolpidi co’ varie figure. L’altar major i là consacrà ne’ 1490. E’ restà pochi tochi de la vecia Césa.Dentro no’ te cati pì el vecio stil romanico. La gà un dipinto che rafigura l’ASSUNSION DE LA VERGINE del 1600 de la scola de’ A Turchi ciamado L’ORBETO. (Fioi del Bandàr)

6) Completàr la poesia max 8 righe (no de manco e no de più), co' fantasia e bon senso; punti da 4 a 7. Se no te rispondi o te scrivi 7 o 9 righe 0 punti, parole italiane/italianisàde 1/2 punto in manco. Te pol modificàr l'ordine de le righe. Parole volgari voto 4. El premio Barbarani va a premiàr ci ghe soméia co' la so poesia a quela Barbaraniana:

Fora dal mondo, fora da la gente
son 'nda' in convento a far penitensa,
son scapà via par ti da casa mia,
par no farte patir la gelosia.
Ti no t'è dito o fato capir gnente
e gnanca mì no t'ho mai fato gnente,
ognun co'l so magon, in cor e in mente,
butémo via el vivar, par manco de 'na lente...... (v.7)
(Brase Cuèrte)

El problema riscontrà l'éra ne la riga "Fora dal mondo, fora da la gente" che in tante "opere" la g'a spacà in do la poesia. Le Brase Querte con furbissia, i g'a preferido métarla par prima in compagnia del "convento a far penitensa", lassando ai pensieri nel mèso e a la moràl ne la parte finàl, come faséa Barbarani.

DIMANDE & RISPOSTE 2021 3°T

TERSO TURNO

1) Completàr la poesia max 8 righe (no de manco e no de più), co' fantasia e bon senso; punti da 4 a 7. Se no te rispondi o te scrivi 7 o 9 righe 0 punti, parole italiane/italianisàde 1/2 punto in manco. Te pol modificàr l'ordine de le righe. Parole volgari voto 4. El premio Barbarani va a premiàr ci ghe soméia co' la so poesia a quela Barbaraniana: p.3

1-Far malani l'è el so divertimento
2-..........
3-e i àlbari se piega al so tormento....
4-..........
5-se dorme un fogo, el supia su le brase
6-.........
7-el bussa sui veri, el fa tremar le case
8...........



CLASSIFICA  - 2021 - 1°T



Classifica secondo turno
class 02 2021

Class. mail in caso de parità punti e risposte:
Fritàja 160, SRS 150, Pignoli 140, Bele muse 110, Elkjaer 90, F.Bandàr 75, Dighe Ochi 70, Ave mate 60, Trio Paloma 55, Ganassoni 45, Sogni 11, Brase Cuèrte 7, Polenta 4, RiVr 3


Classifica primo turno
class 01 2021

FOTO PREMIASSIÓN

 





 
// Podarìa interessarte
Canpionato + Tamara SuperEnaloto  Tarochi + Test Veronesità  CruciVerona



Pin It