Forsi, pochi veronesi s'a, che el nostro Berto Barbarani el g'a declamà i vèrsi de uno de so "Canzonieri" a la Radio e par precisión a la EIAR (Ente Italiano per le Audizioni Radiofoniche), la mama de Radio RAI par capirse, presente sul teritorio nassionàl dal 1927 al 1944. Come vién riportà dal giornàl "Radiocorriere" (ann. 7 n°13) par la stimàna 
dal 28 marso - 4 april, i poeti Barbarani e Murolo i è stà i ospiti de la EIAR a le 20.15 del primo de aprìl del 1931, Berto co le so ultime poesie e co' el so "Canzoniere" probabilmente el terso "I Sogni" stampà da Mondadori nel 1922 e el grande Ernesto co' quéle napoletane.
Se podéa sentìr le poesie solo ne le grandi çità, Milàn, Torìn, Genova, Roma e Napoli, ma par la poesia dialetàl l'è stà un grandissimo risultado anca se considerà in forma sperimentàl. In poche parole Berto l'éra considerà uno dei più grandi poeti in Italia, massacrà da Pasolini che no'l g'a mai capido la so grandessa, ma questa l'è un altra storia.
L'è quasi impossibile che quela registrassión del Berto la pòssa èssarghe ancora, in quanto nel 1931 no gh'éra le registrassioni su nastri magnetici e solo i eventi de una çèrta importansa, vegnéa registrà su dischi de cera o acetato. Le trasmissioni tra l'altro i éra in dirèta. Ne la seconda guéra mondiàl le sedi de la EIAR de Milàn e Torìn iè stà bombardade.
Invitémo istitussioni, giornali, radio e tv veronesi a dimandàr a l'archivio RAI questa registrassión se ancora presente, no se sà mai, sarìa un miracolo, parché sarìa l'unico reperto de la magnifica voçe del grande Berto. El Diretor