BELFIÓR (Belfiore)
Popolassión: 3.144 Altessa: 26 metri sóra el livèl del mar Superfice: 26,45 chilometri quadri Comùni confinanti: Caldier, Albaredo d'Àdese, Ronco al'Àdese, Zevio, Soave, San Bonifaçio, Àrcole, Veronèla, Colognola.
Molto curiosa l'è l'origine del nome de 'sto comune che molti secoli fa el se ciamava in un modo no massa elegante, "Porcile". L'è par 'sto motivo che i abitanti stufi de èssar tolti par el cul dai comuni vissini el 13 zenar 1547 con 'na dimanda al Consilio dei Dodese de Verona e firmada ànca da numerosi nobili del paese tra cui Jacopo Cipolla, Pietro de Pitati, Pier da Cerea, Alvise de Cerolli, Francesco Zan, Bertolamio Aleardo e Nicola Cesenato, i à otegnudo el canbio de nome, da Porcile in Belfiór in meno de una stimàna. In epoca Romana "Porciles" l'éra travérsà da la Via Porcilana che partendo da San Martìn bòn Albergo la univa la Via Postumia a la Via Emilia-Altinate.
Dal punto de 'ista artistico de particolar interesse l'è el Santuario de la Madona de la Strà o Césa de San Michél (foto), costruida nel 1143 su n'altro edificio sacro de l'VIII secolo, in stile romanico veronese. L'interno l'è a tri navade con l'alternarse de colone e pilastri con capitei e dei fantastiçi afreschi del quatrosento con rafiguradi Sant'Onofrio, Sant'Agata, Santa Coronata, San Bartolomeo, Santa Maria Madalena, un vescovo e un apostolo. Su 'n par de colone podémo lésar dei fati storiçi riguardanti la cèsa: el primo el ne parla de una batàja sucessa ne le vicinanse mentre el secondo el ne parla de un feràr de Zevio che l'a costruido la cèsa. Da segnalàr la statua lignea del 1497, rafigurante la Madona sentà con el Butìn su zenoci mentre el struca ne la man un pìtaro, atribuida a Gioàni da Zebellana.
Ne l'Abside de sanca podémo catàr un bèl crocefisso ligneo del tresento. Da édar consilemo le tri vile presente ne la zona: Vila Cipolla conossuda ànca come "La Panterona", del 1692, con tór, colombara, pósso e Capela de San Giusepe; la Vila Tantini l'è del siesento e la presenta una tór de avistamento con merladura de l'otoçento, costruida sicuramente prima de la vila, usada probabilmente come postassion de contról su la Porciliana, strada imperial fata costruìr da Berengario I° Re d'Italia; in località Brion inveçe gh'è Vila Moneta, de la metà del sinquesento, con afreschi del Vasari come "Ratto di Europa" e 'n altro con divinità come Venere, Giunon, Diana, Giunone, Amor e Psiche.