CASALEÓN - CASELÓN (Casaleone)
Popolassión: 5.806 Altessa: 16 metri sóra el livèl del mar Superfice: 38,61 chilometri quadri Comùni confinanti: Zarèa, Sanguiné, Gazo Veronese, Ostiglia MN
Comùn de la Bassa Veronese a sud de Zarèa e a nord de le Grandi Valàde Veronesi. Un paese conossù sia par el mobile d'arte ma ànca par la so vocassión agricola che nel corso dei secoli l'è stà una de le poche fonti de sopravivensa de la popolassión. El teritorio parò l'à subìo un fraco de inondassioni da parte de le aque dei fiumi che i le travérsa, cossita l'è restà par ani e ani una bèla e granda palude, complicando el laoro dei campi. Solo verso la fin del XVIII secolo, sóto la Serenissima, l'è stà pensà de darghe na bèla sistemada a la zona come ne dise i documenti: "Il luoco di Casaleone si trova in situazione bassa e distante un miglio circa dalla valle, e come che la maggior parte de luochi superiori del Veronese scolano a questa parte le acque, ingrossano in modo tale li fiumi Tartaro, Tregnón e Menago con altri Dugali, Sanuda e Focchiara, quali tutti fiancheggiano li beni di detta comunità che gonfiandosi e desalveando, per lo più vengono inondati et allagati la maggior parte de beni ch'erano e sono di maggior rendita et entrade".Le prime testimonianse su Caselón jè de le monéde romane scoèrte nel teritorio, che pól farne pensàr de l'origine romana del Comùne. I documenti piassé antichi i è del XII secolo, quando, ne la bóla papàl de Eugenio III del 1145 vien ricordà tra le altre la Ecclesia Casalavuni e nel 1180 se parla de Casalaurnus, mentre quarantani dopo in un par de ati notarili, se pól lezar Casaluponis. In altri documenti del 1184 catémo Casalavoni cum Ravagnani mentre nei statuti del Comùne de Zàrea la variante Casalvonus. In quél periodo Caselón l'éra feudo de la faméja Sanbonifacio passado ai Ragnoli e dopo ai Dal Verme.
E a proposito de faméje nobili, da segnalàr le magnifiche abitassioni: i Serego-Alighieri ne la frassion Sustinenza i g'avéa nel XVII secolo 'na vila con 150 campi intorno; Vila Borghesana fata costruìr verso la fine del XV secolo da Borghesano del Borgo sul confìn col Comùne de Gazo, corte rural passada col tempo ne le mane prima dei Cagli e poi dei Basadonna par finìr in quéle dei Michieli. La capela de la corte, costruida da Antonio Basadonna nel 1676 la conserva 'na tela con la "Madona de le Grazie" del Liberale; poco distante da la precedente gh'è Vila Le Boldiere dei fradei Boldieri primi propietari che i l'à consegnà ani dopo a Carlo Canossa; el simbolo de Caselón l'è Palasso dei Conti de Sangueneda o di Sanguinetto, palasso a tri piani con dipinti e afreschi mentre poco distante gh'è la cèsa del Sant'Antonio da Pàdoa del 1663 voluda dai propietari del palasson.
Tra le cése, da visitàr nel çentro de Caselón, la parochiàl dedicà a San Biagio rifata in stile gotico incorporando la parte de l'abside de la vècia cèsa che la funsiona da Oratorio, e che podémo amiràr arènte a quèla noa, mentre el campanìl l'è stà costruido nel XVIII secolo. Drénto la cèsa atuàl gh'è altàri minori e quél magior in stile baroco del 1693 trasportadi da la vècia. La cèsa, deventà parochia nel 1480, l'è stà ricordà ne la bóla papàl da Eugenio III nel 1145; a Sustinensa, toponimo che deriva da Sustigneza che vól dir sostegno par raforsàr l'àrzaro, catémo la parochiàl dedicà a San Giacòmo Magior ricostruida nel 1947 sui resti de la cèsa vècia ma parochia dal 1526. Drénto podémo 'édar una pala del '500 con rafigurà la Madona col Butìn in gloria contemplà da San Giacòmo e altri santi atribuida al Brusasorzi o al Creara.