CASTEL D'ASSÀN - ASSÀN (Castèl d'Azzano)
Popolassión: 11.767 Altessa: 44 metri sóra el livèl del mar Superfice: 9,72 chilometri quadri Comùni confinanti: Verona, Butapiéra, Igàsi (Vigasio), Vilafranca de Verona, Povejàn Veronese.RO
El comun de Castèl d'Assàn el se cata a 'na diesina de chilometri a sud de Verona, lóngo la strada par Vigasi e Mantoa. Le prime testimonianse de un insediamento uman in 'sto teritorio jè del I° Secolo d.C. come ne dimostra le tombe catade a Palasso Nogarola e lóngo la strada Bacasieta-Assàn o un poche de epigrafi a San Martìn. Quasi sicuramente Castèl d'Assàn l'éra traersà da la via Claudia Augusta e come ne dise la toponomastica el nome "Azzano" el deriva da la faméja romana de la "Gens Attia" testimoniada più 'olte a Verona. Verona essendo stà bèn fortificada fin dai tempi dei romani, no la permeteva facilmente invasioni e assalti, così la campagna intorno a la çità l'éra deventà un lógo 'ndóe se podéa ciavàr de tuto e far sponsàr le trupe; infati ne la zona de Castèl d'Assàn el s'à fermà l'esercito bisantìn impegnà ne la guera contro i Goti. In epoca feudal i castèi che i vari signoroti i costruiva ne le campagne jà contribuido a una çerta difesa nonché al svilupo de l'agricoltura e nel caso de 'sto comun el merito l'è stà de la faméja dei conti Nogarola. In 'sto periodo el teritorio de Castèl d'Assàn l'éra diviso in tri: 'na parte l'éra dei Nogarola in particolar el castèl e un toco de Becasieta, n'altra parte la faséa parte de la campagna aministrada dal comun de Verona mentre Assàn l'éra sóto el monastero de San Zén grassie a 'na concessión de Federico I a l'Abate con 'n diploma del 27 otobre 1184. Inveçe, le atuàli frassioni che le forma el comune de Castèl d'Assàn jè quatro: Becasieta, Assàn, San Martìn e La Rissa.
El primo documento che parla de la frassión de Assàn l'è del 926, 'ndóe se lese el nome de un çerto Rodibertus de vico Aciano. Ma 'sta località l'è deventà importante par merito dei Scaligeri che riussendo a far deventàr Abate de San Zén uno de lori, par èssar precisi Giusepe e fasendose conferir la gestión dei afari dal monastero sanzenato, jè entradi in possesso de le propietà. Un poche de 'ste chi, jè stà consegnade dai De la Scala ne le mane dei nobili Nogarola deventadi parenti, che jè riussidi a portar un bèl svilupo nel paese e costruendo tra le altre, verso la fin del XIII secolo el so palasso, conossù come "Castèl" che el dà el nome a la contrada òmonima e a tuto el paese. Dopo le ocupassioni dei Cararesi e dei Visconti el teritorio el passa ne le mane dei Venessiani, ancora spacà in tanti tochi come in passà e con numarosi Vicariadi. Fin da la metà del '400 l'è documentada ànca la presensa de un altra nobile faméja tra le più potenti nel veronese, i Malaspina che i éra entrà in possesso del Vicariado de Cà de Tinaldi (che corisponde a Assàn). Sóto Venessia la vita la va avanti bèn, in paçe, sensa tanti problemi, con un fraco de laoro, un bèl svilupo de l'agricoltura, del comercio e con l'introdussión dei cavaleri. Ma 'sto bènèssar el vien roinà nel '500 da le lote de Lega de Cambrai par vint'ani in 'sta zona che le à portado malatie, fame e miseria. A parte la peste del 1630 e la tremenda sicità del 1779 l'economia l'è andà avanti pian pianela. Con Napoleón i ariva altre guere e altre rogne, come la contestasion de la giurisdissión dei Nogarola su la Parochial. Nel 1814 sóto i austriaçi vien istituido el primo consijo comunàl.
Tra belesse artistiche da 'édar l'è el famoso "Castèl" conossù come Vila Violini-Nogarola storica residensa dei nobili Nogarola rifato e sgrandà ne l'otoçento ora sede municipal, Vila Malaspina a Assàn 'ndóe i dise el sia morto uno dei Gonzaga de Mantoa, l'incantovóle Vila Cesari-Perbelini con oratorio e afreschi, la corte rural Cà Tinaldi. Tra le cése, la parochiàl de Assàn dedicada a Santa Maria butà zò nel 1965 e rifata noa, l'è la piassé antica del comune. Vien ricordà de la so esistensa a partir nel 1110 con el titolo de San Michel e nominada ne la bóla papàl de Eugenio III nel 1145 e parochia nel 1530 con el titolo de San Piéro. Drénto ghe conservadi un afresco atribuido al Brusasorzi e de le tele de Antonio Vicentini. L'altra parochiàl del comune l'è dedicada a San Maria Annunziata e ricostruida su 'n altra vècia; esistente dal 1310 par merito dei Nogarola. In contrada Caporala gh'è l'Oratorio de Ognissanti costruido tra el 1743 e 'l 1746. E par finìr a Forete, la cèsa dedicada a San Martìn costruida sóra 'n altra del XV secolo.
