MARÀN DE VALPOLESÈLA (Marano di Valpolicella)
Popolassión: 3.175 Altessa: 350 metri sóra el livèl del mar Superfice: 18,62 chilometri quadri Comùni confinanti: Negràr, Sant'Ana d'Alfaedo, San Piéro in Cariàn, Fumane.
Comùn nel cor de la Valpolesèla tra la val de Fumane e quèla de Negràr conossù ànca come "La Césa" e con sede municipal in contrà Porta. Nel teritorio numarosi jè stà i reperti archeologiçi catadi come le folende, ceramiche, ossi, bronsi de epoca preistorica a Ravazzol, Boschetti, Monte Castelón, San Rocco, Pizzol, Monte Per, Castèl Besin, Monte Noroni, Mondrago, Porcarola e Ciacalda, Covólo dei Pani ora in esposission al Museo de Verona, al Museo de Sant'Ana d'Alfaedo e a la Sóraintendesa a le Antichità de le Venessie. Scavi inissiadi ne l'800 da Stefano de Stefani e portà avanti da Olindo Falsirol, Raffaello Battaglia, Francesco Zorzi, Luciano Salzani e Leone Fasani. Sul Monte Castelón de origine vulcanica, l'òmo l'è sempre stà presente da l'epoca preistorica fin al medioevo come ne pól dimostràr i resti de un casteliér de l'Età del Fero, costrussióni romane e una fortificassión medievàl. E sempre sul Castelón 'ndóe 'desso gh'è el Santuario de Santa Maria Valverde, se vede i segni de un tempio romàn dedicà a Minerva, in pratica l'éra un importante çentro pagano e religioso no solo de la val ma de tuta la Valpolesèla, in quél tempo "Pagus" dei Arusnati.
Infati fin a poco tempo fa la frassión San Roco, poco distante dal "tempio", l'éra ciamà "San Roco de Minerbe". Nel XIII secolo el castèl 'isto in precedensa, l'éra feudo del Conte de la Valpolesèla, Federico De la Scala cusin de Cangrande; ma nel 1325 quando Federico l'à proà a spodestar Cangrande che nel fratempo l'éra malà, l'è stà sconfito e mandà in esilio con la so faméja, butandoghe zò el castèl. Nel testamento del 1339, Federico el ricorda la sovranità che'l g'à avù ne la val "Iaborerium castri mei Marani" e tuto el formento restà da 'na parte ne la Valpolesèla. Nel '400 el Castèl de Maràn el vien ricordà ne l'elenco de "Castra Veronae" e durante 'na visita pastoral de Ermolao Barbaro la césa de Santa Maria de Minerbe la se cata in "in Valleversa sive in castro". Secondo 'na legenda el castèl el g'avéa origini piassè antiche; nel 102 a.C. el console romàn Mario che l'avéa vinto contro i Cimbri ne la batàja dei Campi Raudi el s'à fermà a Verona e portà in trionfo dai Veronesi, decidendo subito dopo de costruìr un castèl in Valpolesèla, che vegnarà ciamà "Mariano" in so onór.
Gh'è ci dise che el nome del paese el végna da 'sta fóla, piassè probabile che un çerto Marius el g'avesse dei teréni de propietà "Marianum". Dopo i Scaligeri l'è stà la 'òlta dei Venessiani, cossita Maràn l'è stà le dipendense del Vicariado de la Valpolesèla con sede a San Piéro in Cariàn. A parte la peste del 1576 e del 1630 la vita sóto la Serenissima l'è andà avanti in tuta tranquilità. In 'sto periodo se vede la nàssita de numaròse vile come Vila Guantieri a Fasanara con pòrtego, lòsa e tór colombara, mentre el nucleo çentràl l'è del '400, afreschi e decorassioni del '500; a Canzago del '700 gh'è Vila Lorenzi e la maestosa Vila Rizzini con Oratorio de San Carlo. Altre vile interessanti a Valgatara de l'800 Graziani, Raisa-Rimini e Silvestri. Nel XIX secolo da segnalàr, sóto al dominio francese Maran l'è stà assegnà al Cantón de San Piéro in Carian, da contàr ànca la presensa austriaca e nel 1866 sto comun l'è entrà a far parte del Regno d'Italia.
Tra le cése da segnalàr la ceséta del XIII secolo in località Pozzo, arénte a la frassión Valgatara, dedicà a San Marco con afreschi de l'epoca e con tochi de piéra de origine romana; a Valgatara la parochiàl dedicà ai Santi Fermo e Rustico del XVII secolo e sgrandà nel'800 e '900; a Maran la césa parochiàl dedicà a San Piéro e Paolo del '900 con arènte la vècia césa del '700; el Santuario de Santa Maria Valverde sul Monte Castelón el g'à origini antiche come ne dise un documento del 1184 S.Maria Menervii. L'atuàl Santuario l'è del 1682 come dise l'iscrissión su l'altàr magiór, mentre la statua lignea de la Madona col Butìn che i dise la sia miracolosa l'è stà costruida nel 1516 da la Compagnia de Santa Maria de Valverde del Castèl de Maràn; a Puran l'Oratorio de San Giorgio ricordà in documenti del '400, con drénto 'na pala con rafigurà "San Giorgio che'l copa el drago" segnalà nel 1699, e 'na statua de San Gioàni Nep. documentà dal 1764. Se ve piase el vin, Ve convien far 'n salto da ste parti par béar un bón Recioto vardando el magnifico paesagio quando i siresari jè in fiór.
San Marco in Pósso
La ceséta de San Marco in contrà Pósso de Valgatara l'è documentà a partìr dal XIII secolo ma co' el nome de San Stefano cambià nel periodo venessiàn, nel secolo XVII. In origine la costrussión l'éra in stile gotico, quésto el ne fa pensàr che la césa l'éra presentae qualche secolo prima de quél documentà. Nel 1605 dopo la visita pastoràl, vién segnà su un tòco de carta la presensa de un secondo altàr dedicà a San Marco e nel giro de 9 ani vién realisà la capeléta finìa nel 1614.
La ceséta l'è stà sistemà tra la fine del '600 e l'inissio del '700 come dimostrà da la fassàda a capàna, modificà fin a la fenéstra a mèsa luna vèrta, orientà a ovest e co' l'abside su l'istésso asse de la Césa mare del Santo Sepolcro in Gerusaleme; in mèso catémo la porta retangolàr co' stipiti e architrave in piéra de Prun co' centina in piéra galina, invésse de sóra la fenéstra, catémo una cornisa sempre in piéra galina forsi de la vècia costrussión romanica, par tuta la longhéssa del quérto, riutilisà dopo avér alsà la fassàda.
Nel lato nord catémo un rinforso tacà al muro par tegnér su un altàr, la capeléta a pianta semi-çércolàr co' drénto el so altàr e un tòco de la vècia mura. A sud gh'è una seconda entràda retangolàr e do fenestréle in stile gotico, poco distànte una pitura del secolo XV de la Crocefissión co' sóra una lasta de préara a protessión, sensa contàr un tàco de piéra murà de epoca romàna co' un voto a Giove.
El còro dopo la ristruturassión del '500-'600 quando l'è stà butà zò l'abside romanica co' pianta forsi semi-çircolàr, l'è quadrangolàr co' un altra entràda del '700 che porta in sagrestia e una fenéstra retangolàr co'inferiàda e cornise in piéra galia.
Par finìr la parte de fóra, émo tegnù par ultimo la tòr campanaria, modificà piassè òlte, che la se cata ne la parte nord, tra le mura del complesso, in stile romanico co' ponta a piramide e do grande fenéstrèle co' arco a sesto sbassà che le se alterna a le originarie bifore. Drénto la ceséta a una sola navàda catémo su tuti i muri catémo tochi de piture a fresco del secolo XIV e in particolàr quél de Santa Catarìna de Alessandria e la Madona de la Misericordia co' data M[CC]CLXXXVII sensa desmentegarse anche dei tochétini colorè forsi del periodo romanico.
Tra le curiosità segnalémo la pala d'altàr del fiamingo Michel Meeves (par i amiçi Michele Meves artista presente nel veronese dal secolo XVII), de forma ovàl piturà a oio su tela contornà da 'na falsa cornìsa de legno co' le testine de puti, fruta e verdura; la sèna se presenta co' la Vergine co' el petesìn infrincià da sète spade e sui zènoci el corpo del Fiól morto, i angeléti a tórno i tién su el sudario e in basso catémo San Carlo Borromeo, un abate vestìdo de bianco e un Santo che'l tién una lónga péna d'òco su la destra. Una ceséta che meritarìa de èssar visità e tegnù piassè in considerassión visto el lógo nel cór de la Valpolesèla e la storia.