NEGRÀR DE VALPOLESÈLA (Negràr di Valpolicella)
Popolassión: 17.199 Altessa: 190 metri sóra el livèl del mar Superfice: 40,42 chilometri quadri Comùni confinanti: Verona, Gressana, Maran de Valpolesèla, San Piéro in Carian, Sant'Ana d'Alfaedo.
Importante Comùn de la Valpolesèla con le frassioni Arbissàn, Fane, Montecio, Massàn, Nòare, Prun, San Vì, Santa Maria, San Pereto, Torbe. El teritorio che'l parte dai 83 m.s.l.m. de Arbissan e se rampega fin ai 750 m de località S-ciopo de Fane, l'è stà abità da l'òmo fin da la preistoria, come pól testimoniàr i reperti del Paleolitico ne la zona tra Montecio e Monterico o quei de l'Età del Rame in località Colombare. In epoca romana el teritorio de Negràr (Toponimo Negràr dal tardo Latino nigrarius, "lógo con tera nera" o da nux=nosa) el faséa parte del "Pagus" dei Arusnati, popolassión forse de origine celtica o etrusca che prima de l'arivo dei romani l'avéa catà casa in Valpoleséla. Du iscrissioni latine jè vegnude a la luçe a Massàn (Mazzano) e le documenta el culto a Giove, mentre grassie a un poche de iscrissioni rinvegnude a Arbissàn e a de le tombe catà a Negràr, podémo savér con sicuressa che la zona l'éra la residensa de le faméje Clodia, Cassia, Arria e Valeria; del III sec. d.C. l'è la pavimentassión a mosaico de 'na vila ne la località òmonima conservà al Museo Archeologico de Verona, mentre a Nòare un toco de aquedoto romàn a session triangolar. 
Nel medioevo la zona de Negràr l'è stà ocupà dai Longobardi, defàti nel çentro del paese l'è stà rinvegnuda 'na tomba de 'n òmo del VI secolo con scudo troncoconico e 'na spada oltre a 'na "fibula" a forma de colomba, sempre de epoca longobarda. Le prime testimonianse scrite su la val Veriacus che la dovea corispóndar a l'atuàl val de Negràr jè del 838 e 844 d.C. - Dal 1000 d.C. gh'è stà un bèl aumento demografico dando sempre piassè magior importansa ai çentri abità, caraterisadi da la presensa de una signoria, come pól dimostrarne le testimonianse su i castèi nati a Negràr, San Vito, Rosele, Fane e Arbissan (Albucius); cossita un secolo dopo, Negràr con la so pieve intitolà a San Martìn l'è deventà Comùn. Del 1166 l'è l'iscrissión latina de 64 righe sul campanìl, che la ne parla de un pochi de contrati in "Communitas Vallis Nigrarii". Nel 1184 ne la val de Negràr i éra presenti le comunità de Fane, Prun, Massan, Torbe e Capavo, Negràr e Sergiago, San Vito, Nòare, Arbissan con importanti funsioni aministrative. Da segnalàr che i beni de Prun con pieve e castèl nel XII secolo i éra de propietà del Capitolo de Verona, el feudo de Capavo con castèl l'è stà regalà nel 1090 al Monastero de San Zén mentre el castèl de San Vito nel XIII secolo l'è passà sempre dal stesso Monastero al libaro Comùn de San Vito. Nel 1238 el Comùne de Negràr l'à scrito uno Statuto par la difesa del teritorio, 'ndóe tuti i abitanti i dovéa far servissi de guardia, a causa de numaròse guere civili. Quando iè rivà i Scaligeri verso el 1311 Negràr l'è entrà a far parte de la giurisdissión de la Valpolesèla infeudà a Federico de la Scala fin al 1325, e s'à 'isto la nàssita de corti con tóri colombare e lo svilupo de l'agricoltura con ua, olivi e cereali.
Dopo el periodo dei Visconti e dei Cararesi, la Valpolesèla l'è stà el primo distreto a sótometarse ai Venessiani dopo la conquista de Verona, con in cambio, la riconferma dei privilegi e de le concessioni scaligere. Sóto la Serenissima, Negràr faséa parte del Vicariado de la Valpoleséla, a capo de un "pievadego" (le altre do pievi i éra San Fioran e San Giorgio) composto dai comuni de Negràr, Arbissan, Nòare, San Vito, Torbe, Prun, Massan e Fane. Grassie a la visita del Vescovo Ermolao nel 1458 semo vegnudi a conossensa de le nove cése presenti nel teritorio de Negràr: San Pól a Prun, Sant'Antonino a Fane, San Piéro a Torbe, San Marco a Massan, Santa Maria in Progno, Santa Maria de Moron, San Vito che la dipendea dal Monastero de San Zén, San Gioàni Batista a Cerna e San Martìn a Negràr mentre quèla de Arbissan no l'è stà visità. Con le visite pastorali del Vescovo Giberti 1530 e 1532 vien documentà che i abitanti in tuta la val i éra quasi 2300 e par colpa de la peste nel 1576 i éra deventà 1568 (altra peste nel 1630). Nel 1538 a Torbe e Prun funsionava bèn diese molini, a Negràr nove, mentre a San Vito e Arbissàn çinque. Nel XVI secolo a parte l'agricoltura, l'éra importante l'estrassion de la pièra de Prun utilisà par la costrussión de case, aredamenti e corti, defàti grassie ànca a le nobili faméje veronesi rivà da la çità come i Panzani, i Rattis, i Righetti, i Boldieri e a quéle zà presenti sul teritorio, gh'è stà 'na corsa par cromparse un terén par costruirghe 'na vila (quasi tute con pòrtego). 
Nel 1746 da 'ste parti jè passadi i soldà todéschi e nel 1780 Venessia l'avéa concesso a Negràr de far el marcà stimanàl "di soli animali d'ogni sorte", concessión confermà nel 1791, quando l'è stà costruida la colona col leon alà arènte a la césa parochiàl. Quando l'è rivà Napoleón l'è stà scancelà el Vicariado e nel 1807 Negràr l'è stà messo nel canton de San Piéro in Carian mentre nel 1815 l'è deventà comun con sóto le frassioni de Fane, Massàn, Prun, Torbe, San Vito, inveçe Arbissàn el faséa comun da solo unido a Parona e Nòare. Nel 1871 Prun l'è deventa Comùn autonòmo ma nel 1929 l'è ritornà sóto Negràr, stessa sorte par Arbissan nel 1927. Tra le cése da segnalàr quèla de Arbissàn antica Pieve ricordà da Papa Eugenio III nel 1145, dedicà a San Piéro Apostolo e costruida verso la fin del XVII secolo sóra ai resti romanici de la vècia césa e relativa canonica de cui podémo amiràr ancora el fantastico portal del XIII secolo, scrite, lapidi e tochi de pièra. Drénto gh'è conservà un fonte batesimal, un tritico del '300 e un bassorilievo mentre el campanìl rifato piassè 'olte nel XVI secolo l'è stà butà zò e sostituido da quél nóvo nel 1936. Da 'na scrita piturà drénto la fassàda faséa risalir la césa al 417 al tempo del Vescovo San petronio. A Santa Maria in Progno podémo catàr l'antico Santuario de la Madona del Carmine del XVII secolo 'ndóe ghe conservà le pale de Dòminico Brusasorsi e Marcantonio Bassetti. A San Pereto la césa de San Piéro Apostolo de origine romanica.
A Massàn la césa parochiàl dedicà a San Marco Evangelista costruido sóra a un tempio pagan dedicà a Giove. Ne la césa de Prun dedicà a San Pól che nel XII secolo faséa parte dei possedimenti del Capitolo de la Catedràl de Verona, podémo amiràr du tele de Paolo Farinati. La piassè importante tra le cése de 'sto teritorio l'è sicuramente quèla de San Martìn a Negràr del XII secolo ma ricostruida ne la versión atuàl ne l'800. De l'antica pieve gh'è restà el campanìl usà nel 1238 come tór de guardia come previsto da uno Statuto. La parochiàl dei Santi Giorgio e Antonio a Fane del 1781 rifata sóra 'na vècia capela, conserva statue e 'na pala con rafigurà San Giorgio del 1822 de A.Ugolini.
La césa parochiàl de Montecio de la Maternità de la Vergine l'è del XVIII secolo con afreschi de Gaetano Miolato e Giuseppe Resi. De la vècia ceséta romanica del XII secolo de San Vito, gh'è restà solo el magnifico campanìl, mentre quèla atuàl l'è del 1806. A Moron documentà dal 1222 gh'è bèla ceséta afrescà de Santa Maria. Tra le vile da segnalàr la Bertoldi "El Palasso" del '400 con pòrtego, modificà nel XVII secolo; l'elegante vila La Sorte fata costruìr dai Conti Noris nel XVII secolo con giardìn e statue del '700; a Poiega opera del Trezza, l'è Vila Rizzardi del XVII secolo, con giardìn a l'italiana e rifata nel XIX secolo; Vila Salvatera a Prun del '500 con lòsa e colombara; a Torbe gh'è Casa Quintarelli originaria del XIV secolo, con pòrtego e colombara; a San Vito del '600 gh'è Vila Biscardo con drénto campanìl romanico (vedi sóra); ne la frassión Arbissàn podémo 'édar Vila Messadaglia del '700, Vila ex Verità elegante con pòrtego e colombara, Vila Zamboni del XVI secolo con pòrtego e archi, Vila ex Albertini del XIX secolo da la forma sempliçe; a Nòare la grandiosa vila Mosconi Bertani del 1759. De personagi famose g'avémo "el siensa" politico e leterado Luigi Messedaglia e la faméja del grande scritor Emilio Salgàri. E par ci ghe piase far quatro passi in mèso a la natura consiliémo de visitàr la Séngia Sbusa a 595 metri, tór de pièra "sbusà" da 'na grota usà dai eremiti. E alora ne resta che saludarse fasendo un brindisi con un gosso de vin Recióto, l'Acinaticum dei romani o con un bón Amarón.