NOGARA
Popolassión: 8.586 Altessa: 18 metri sóra el livèl del mar Superfice: 38,78 chilometri quadri Comùni confinanti: Gazo, Sanguiné, Sorgà, Erbé, Isola de la Scala, Salizól.
Comùn de la Bassa Veronese, travérsà dal fiume Tartaro e posissionà a 'na trentina de chilometri in diressión sud da Verona. El toponimo Nogara i dise che, con tuta probabilità, el vegna da Nucaria, Nucula, Nux, lógo coltivà da albari de nose che un tempo i querzéa la zona fin al medioevo. L'òmo l'è presente in 'sto teritorio fin da la preistoria come pól dimostràr i reperti de l'età del Bronso riferidi a la çiviltà teramaricola che vivéa su le palafite sul Tartaro, le sepolture in località Mota e altra roba vegnuda a la luçe a Montalto, Guja, Martina de Val Bissara, Ecce Hòmo, Molin de Sóra e de Sóto, Bel Camin e Olmo. Col tempo gh'è stà ànca etruschi e sóratuto romani che i g'a fato passàr la famosa strada Claudia Augusta pròpio da Nogara, 'ndóe la se incrosava con la strada "Vicinalis". Tra i reperti del periodo romàn da segnalàr tri steli del I secolo d.C. de la gens Truttedia con relativi ritrati de faméja su la fassàda de la ceséta de San Gregorio Magno a Campalàn. 
El primo documento scrito su Nogara l'è del 905, quando re Berengario el g'a regalà al diacono Audiberto 'na parte del bosco tra el Po e 'l Tartaro ciamà Silva Hostilia e 'na Capela dedicà a San Piéro, mentre nel 906 el g'à concesso, come scrito nel documento denominà "Concessionis preceptum" de costruìr un castèl "Castrum nogariae" par difendarse da le invasioni de i Ungari. La Capela de San Piéro in poco tempo l'éra deventà pieve e sede de un convento che a metà del XII el risultava tra i possessi de la famosa Abassìa de Nonantola. El castèl l'éra possissionà arènte al fiume Tartaro tra la corte de i du Roari "Duae robores" e Vila Tulian e g'avéa drénto la Césa de San Silvestro. Nel 1090 l'imperadór Enrico IV 'isto la posissión strategica de Nogara l'à dichiarà guera el castèl e relativo feudo gestido da Matilde de Canossa ma perdendo de bruto. Dopo el Barbarossa e 'l periodo con morte e distrussión da parte de Eselin Da Romàn l'è stà el turno dei Scaligeri che jà portà paçe e tranquilità in quei paesi che nei ultimi secoli i éra stà messi a fero e fogo. Prima parò de entrar nel periodo venessiàn, da registrar, el passàio dei Visconti e dei Cararesi.
El primo periodo sóto la Republica de Venessia no l'è stà façile par Nogara, 'isto i nùmarosi scontri tra venessiani e le trupe de Filipo Maria Visconti. Nel 1509 i Spagnoi de la Lega de Cambrai i à tacà fogo al castèl fansendolo cascar in roina. Dal 1517 fin a la fin del XVIII secolo, a parte la peste portà dai Lansichenechi, sóto i Venessiani no se stava mal; dal pónto de 'ista aministratitivo Nogara l'éra capo de un Vicariato con sóto Bonferàr, Engazà, Bionde de Visegna e Corezo. A l'inissio de l'800 da segnalàr grossi laóri de bonifica de la pianura arènte al fiume Tartaro e la sistemassión de le vie de comunicassión, laóri che i à portà un bèl svilupo a Nogara, sóratuto agricolo. Finìo el periodo francese, sóto l'Austria la provincia de Verona l'éra stà divisa in 13 distreti, con Nogara e le frassioni Calçinàr e Campalan a le dipendense de Sanguiné. Le guere de indipendensa no i à interessà el paese e nel 1866 Nogara l'è deventà italiana. Tra le cése da segnalàr quèla de Casele dedicà a San Piéro e costruida nel 1860 sóra ai resti de 'na capela; la se presenta in stil neo-classico con stil corinsio a grandi colone e a tri navade. L'altàr maiòr conserva du pale del '600, una de Scóla Veronese “L'adorassión de S. Tomaso dopo l'incredulità” e l'altra Veneta “Cristo trafito da la Lancia de Longino” mentre su l'altàr de destra du tele del '700 de arte veronese “S. Girolamo nel coal de un àlbaro” e “S. Bernardo che libara un ossesso”, a sanca inveçe 'na tela del '600 con la "Sacra Fameja".
Tra le vile e palassi da segnalàr arènte a la noa Césa parochiàl, el palasso rinassimentàl "Maggi" con elegante pòrtego, sede de la biblioteca comunàl de Nogara. Vila Marogna costruida sóra a un altra costrussión l'è del 1548 forsi su disegno del Sanmicheli, un tempo con fassàda piturà dal Brusasorzi mentre par entrar ne la vila bisògna passàr da un portal dorico del Trezza. A Calçinàr la Vila Perez un tempo de la faméja vesentina Valmarana che in epoca venessiana in compagnia de altre nobili faméje, l'avéa fato spostàr el percorso del Tartaro da l'original sede. In località Ecce Hòmo el palasso del '500 residensa dei Conti Sangueneda. 'Da édar in località Molin de Sóra, l'ultimo molin del '500, con l'afresco de la Madona sóra al portón.