Un cantón de storia montoriese.
Ci podéa pensarlo che a Montorio ghe fusse un giardìn a l'italiana, el più vècio d'Italia o che parfìn el Boccaccio el g'à parlà 
de 'sti posti. 'Ndóe gh'è aqua, gh'è vita, e in questo caso l'à dato una grossa man a tuto el teritorio de Montorio e no solo, anca a quél de la çità e de San Martìn quando gh'éra la famosa suta de l'istà. La Republica Venessiana l'éra de casa, ma anca i fiói de Dante Alighieri i s'à catà veramente ben a Montorio.
La Losa de Montorio
La Rena Domila l'à catà un tòco de storia Veronese scomparsa e a conossensa de póchi intimi. Nela foto a fianco se pol notàr dele case un po vece, un pòrtego e un cortìl bèlo grando. 'Ste case iè a Montorio vissin al Laghéto Squarà.
Tuto se podaréa pensàr ma che na olta l'era "La Loza" dei Scaligeri quela proprio no! Ne l' XI secolo l'éra un palasso giudissiario ìndóe i controlava anca le aque sóto l'aministrassión del Monastero de San Zén (Racolta dela Deçima, distribussión dei pascoli dala Lessinia a l'Adese e sede del tribunàl çivil e eclesiastico).
I Scaligeri sucesivamente i g'avéa otegnù i diriti sule aque da parte de San Zén. (Foto sinistra: Mapa del 1700 de un çerto Bighignato, 'ndóe se vede la Loza nel 1500). Nel 1273 Alberto dela Scala l'avéa fato un "alveo soteraneo" che'l portàa l'aqua del Squarà drénto nel palasso e a la pescarìa al çentro de la corte.
Nel 1363 Cansignorio dela Scala l'avéa messa a nóvo e sgrandà el complesso dele "Loze" compreso nela "Fatoria Scaligera" la qual l'éra sta vendù nel 1410 a un çerto Azzo Francesco de Castelbarco "Palatium Ulivedo", confiscado e vendù a Marino Contarini da Venessia par du tersi e a Pasio Guarienti e Bevilacqua notaio par un terso. Sucessivamente i paroni dela Losa i è stadi un çerto Roberto Conte de S.Severin (generàl dela Cavaleria dela Serenissima Rep. de Venessia morto nela bataja de Galiano), Gaspare de S.Severin conossù come Fracassa secondo conte de Caiasso e la Fameja Battaglia par tresénto ani.
El primo de 'sta fameja a portàr al masimo splendòr el "Palasso" l'éra stà Piero Antonio. El nobile, de fameja Veneta, utilisa el 
"giardin" no solo come par piasér e de delissia ma anca come zona da valorisàr 'conomicamente potensiando le fonti idriche che in quél tempo ghe n'éra assè (Bojo, Fossato Maestro, Fontanela, Giardin). (Foto: l'anel de piera del boio e l'aqua che boie).
El Bojo l'è un sifón che'l ciapava l'aqua dal Lago Squarà dando vita al Fibio portandola nel giardin rendedolo esteticamente molto bèlo e ai molini. L'aqua del Fibio la vegnéa usada par primi dai molini che i masenàva gran e farina andando a vàl dai fabricanti de lana, carta e fèr a le Ferrasse, 'ndóe nel 1405 i produséa le armi par la Republica Veneta. Par l'aqua gh'è stà numarose dispute che al giorno d'ancó se podarèa definirle condominiali.
Gh'éra persone che g'avéa un molin lóngo el Fibio o qualsiasi altra atività e le ciavava l'aqua ai altri sensa autorisassión. Una 'olta adiritura l'éra intervegnudo el "Magistrado ale Aque". Ritornando al 
Squarà, un tempo partia anca el Fiumesèl (fiumicello) utilisado pìù dale lavandare che par scopi industriali e 'l finìa nel'Adese dove gh'éra i molini natanti.
Nel 1539 Giò Lodovico Battaglia el g'a scominçià a ròmpar i maroni ai consorti del Fiumesèl. Da una testimoniansa tradoto dal latin se lése che parfin Boccaccio g'avéa dito de le feste che se tegnéa a palasso (sensa èssarghe stà de persona): "Le çene a Montorio, le se svolgéa de fóra a l'aria vissìn le freschissime e limpidissime fontane e le frasche".
El Bandello el ricorda anca un pergolato nel giardin (vissin al Palagio) 'ndóe el se ritirava con alcune personagi dopo magnade olimpiche "luculiane", balade, canti e musiche che le durava tuta la giornada. Se "accenna" anca al "celebrado nel Filocolo da messer Giovanni Boccaccio, piacevole e fecondo scritór, el Castèl de Montorio". 
Chi el castel el vien inteso come Vilajo. difàti el seitàva: <<Quivi facendosi pescare e prendendosi molte truttele, ternali, gamberi e quei delissioni pessolini dala molona grossa, che in diversi loghi i-à sortido nomi diversi e che vojaltri Veronesi ciamè Magnaroni>> l'éra intervegnudo anca Lodovico Dante Alighieri (fiol del poeta Dante) che el se trovàa nel podere vissin, nela sò vila de Olivè. Intanto <<essendosi preso zà del pesse assai e fasendo gran caldo el Signor podestà con la compagnia el sà ritirado nel Palasso>>....//
Nel 1820 i Conti Albertini i g'avéa trasformà el palasso nobiliare in edificio popolare. Nel 1920 l'e stà crompado dala Fameja Maggia atuàl propietario che ringrassiémo par el materiàl fornido. (In rosso trategiado se pòl notàr "l'alveo soteraneo" fato costruir da Alberto dela Scala nel 1273 par portàr aqua dalo Squarà al'interno dela Loza Inoltre se pòl notàr el bojo (color azuro in alto a sanca ), du bojeti minori, e tuta la geometria del giardin dela fameja Battaglia, con al çentro la fontana (una 'olta pescheria) nel 1500.