La Tór dei Lamberti l'è uno dei simboli piassè importanti de la çità de Verona che podì catàr a metà de Piassa Erbe. Nel 1140 in epoca comunàl l'a scominçià la so funsion de tór civica co' tanto de campana che nissuni sà come la fusse fata. Grassie ai Statuti Albertini, nel 1172, s'a pensà de zontàr a la campana del "Rengo" utilisà un tempo par convocàr el Consilio Comùnàl, anca quéla de la "Marangona" par segnàr l'orario de laóro de le corporassioni.
Pochi i s'a l'origine de la faméia nobile dei Lamberti, gh'è ci dise, la vegnésse da Zaréa. La prima fase de costrussión l'è romanica e no tanto alta, 37 metri, basta vardàr i muri a fasse de quarèi e piéra galina. Co' i Scaligeri, nel 1311 una de le do campane le sta fusa da nóvo zontandoghene anca una tersa ciamà "Consolata". Nel 1394 Zanfrancesco Da Legnago el g'a fato da nóvo quéla del "Rengo", utilisà par l'anunciassión de rogne, da la guéra a la pèste, da la condàna a morte e qualche bèl fógo.
Un tempo gh'éra dei campanàri che i faséa da custodi, da guardie par i delinquénti inprisonà ne la tór e par védar se da lontàn vegnéa 'vanti rogne. Nel XV secolo la tór l'è stà alsà fin ai 83 metri, con sóra la çèla campanaria a trìfore e par finìr una lanterna otagonàl in piéra bianca. Nel 1452 Gasparino da Vicenza el g'a fuso da nóvo el "Marangona" e la "Rengo"; la prima fata su da nóvo nel 1471 parché la s'a crepà. Nel 1521 e par finìr, nel 1557 i Bonaventurini i g'a rifàto el "Rengo" ancora funsionante, co' i so 4215 kg, l'è la seconda tra le piassè grande de Verona e del Veneto dopo quéla del Dómo.
Nel 1597 i Da Levo i g'a rifàto la "Marangona" in sagoma gotica. Nel 1779 Giuseppe Ruffini l'a realisà la campanèla de le ore in SIb3 in acordo de otava col Rengo in SIb2 e un'altra, ciamà la “Rabiosa”. Le campane in tuto i éra cinque, tre de le quali (RE3, FA#3, LA3) in acordo armonico magiór.
In pratica:
Rengo: Sib2, fuso dai Bonaventurini nel 1557
Marangona: nota Re3, fusa dai Da Levo nel 1597
Rabiosa: nota Fa#3, fusa da Ruffini nel 1779
Consolada o Bajona: nota La3, fusa da ignoto nel 1311
Campanèla dele ore: nota Sib3, fuso da Ruffini nel 1779
Nel 1798 l'è stà realisà l'orolòio su la tór. Nel 1833 el Cavaliér Giovanni Cavadini, par farghe dispèto al fradèl Francesco de un altra fonderia, el g'a su da nóvo la "Marangona", "Rabbiosa" e "Bajona". Tute in compagnia le forma un acòrdo armonico fondamentàl de 4 note (Sib2, Re3, Fa3, Sib3) in uso in epoca baroca e che un tempo l'éra ciamà "a salto".
