No gh'è bambù par el Panda da magnàr a Pian de Festa, mèio el Busatèl o la Val Boràgo. Forsi co' el caldo l'è mèio l'ombrìa del vaio o le aque calme de la palude. El "Panda" preferisse riprodurse 'ndóe gh'è paçe e tranquilità ma soratuto, 'ndóe no se ris-cia de farse del mal, anca parché da le sénge de Festa se pól sbrissìar a Rivalta e finìr soto oio al posto de i salmoni norvegesi. Quindi el "Panda" preferisse una vita più borghese, in çità o ne la casa de campagna, stando sempre soto l'ocio vigile de la notorietà. In pratica i problemi dei altri i resta dei altri, cossita quando le altre bestie restarà sensa casa par colpa de la costrussion de la çentràl idroeletrica, lu el restarà sul so balcon de Quinsàn a magnàrse el bambù. Ma co' i fondi europei e la nova cultura verde ambientalista i pol costruir in tuto el Veneto centrali e quindi, anca la Val Borago l'è in pericolo compresa la casa del "panda". L'è stran che no se senta dichiarassioni del "Panda" a sostegno de i amiçi de la Val de l'Adese come el g'a fato par la bolpe del Borago o el fassa una protesta a sostegno de le fauna, in quanto simbolo de la salvaguardia de le bestie. El "Panda" conosse el problema de Festa e Rivalta tanto che l'an passà g'a scrito https://va.mite.gov.it/File/Documento/1295952 le so impressioni in merito, a la lova de Roma, o mèio, al "MASE" Ministero Ambiente e Sicuressa Energetica e dopo? El "Panda" l'è ritornà sul so balcon a ciuciàr co' 'na canéta la so aqua sucarà. - La Redassion 08.07.2026
