A i vigili i conti de le multe no i torna! No stémo parlando de conti e contesse del nostro Carneàl, ma quel sucesso in Giunta come riportà da L'Arena e dal Coriere de Verona sul tema "Bacanàl". La Vicesindaca e Assessora al Patrimonio la g'a fato presente al Sindaco che bisón cavàr el "patto di sussidiarità" firmà co' el Comitato Bacanàl del Gnoco par la gestión del "Giardìn d'istà" tacà a Porta San Zén, un lógo del Demanio in concessión al Comùn. El Comitato quando el g'a organisà dei eventi, no l'è riussido a rispetàr le regole firmade, dar da béar e magnàr a la zénte (somministrazione bevande e alimenti) nel Giardìn e sparàr la musica a batèl ne le feste organisà drénto la sede de Porta San Zén. Par 'sto motivo i Vigili i g'a dà multe par 35 mila euri che finóra no iè stè paghé (forse calcheduna? Boh)
El Comùn el ghe darà in concessión al Bacanàl el Giardìn d'Istà solo quando e g'avarà pagà, un poco a la òlta (a rate) le multe. In poche parole no se pól far quel casso che se vól par dopo darghe la colpa al Sindaco. Semo stufi che ghe sia sempre i soliti che no i rispèta le regole e che magari i pòssa pagàr a rate le multe, l'è ora che çèrta zénte no la pòssa più gestìr el bén Comùn e ciapàr schèi da la Comunità o ciapàr schèi su le spàle dei contribuenti. Tante associassioni le rispèta le regole, a Porta San zén le regole i se le scrive da par lóri. (La Redassión 12.06.2025)
