El giorno 31 maio 2025 a le ore 20.30 podì far un salto in Piassa Righetti a Quinsàn e parteçipàr a la tersa edissión del "Balcón Fiorido". A parte la consegna dei premi a ci g'a colorà co' i fiori i propi balconi, ghe sarà la possibilità de èssar presenti a uno spetàcolo teatràl che va in sèna in piassa. In più ghe sarà anca el vostro Diretór a presentàr, co' le so poesie, e i so cavài de batàlia.
Le sorprese parò no le finisse qua e a fine serata ghe sarà un bèl brindisi in compagnia. Una manifestassión che par tanti no g'a valór, ma che in verità l'è un momento par star in compagnia e far parte de una comunità. Soratuto, in questi mesi i volontari che i tién in pié la manifestassión, l'è da mesi e mesi che i se prepara par l'evento.
'Na cosa interessante l'è che ci g'a una botéga g'a volù dar el propio contributo a la riussida, defàti el montepremi del "Balcón fiorido" l'è veramente importante.
Come émo dito, no Ve resta che vegnér a Quinsàn par gòdarVe un póco. La comedia teatràl "Striosso" de Ivana Bacci la g'a come atori, i amiçi de la compagnia "I Descantabaùchi" del calibro de Franco Barbieri, Alessandro Damoli, Damiana Lotito, Maddalena Alfonsi, Zeno Gnesato e Sandra Zanoni, sensa dersmentegàr ci laóra de drio, Cristina Righetto, Nives e Gaia Zampini, Claudio Valeriani, Tatiana Orlandi, Chiara Bertani, Sandra Zanoni e Claudia Bellotti. La seconda Circoscrissión l'è sempre pronta come ogni ano a dar el propio sostegno e i amiçi de Auser sempre pronti a dar 'na man. Come in tute le cose, parché le funsiona ghe vol 'na man, de tuti! La Redassión 27.05.2025
---------
31.05.2024 - Ne l'ultimo giorno de maio a Quinsàn, in Piassa Righetti gh'è stà la festa dei fiori, o méio, quéi che passando de vedi sui balconi. Donàr un fiór l'é un calcossa de importante, figuremose un bel s-ciapo! Le associassioni de Quinsàn mésse tute insieme iè riusside a realisar una festa fantastica e soratuto grassie anca a le botéghe che le g'a contribuido.
El publico l'è stà numaróso in questa seconda edissión che l'è restà fin a la fine par édar ci g'a vinto la manifestassión 'ndóe in palio gh'éra un bèl Montepremi. La presidente de la seconda circoscrissión Elisa Dalle Pezze la g'a consegnà i premi ai 26 parteçipanti. Prima de capìr parò ci g'a vinto, el nostro Diretor g'a presentà du cori in uno, butìne vestide da fiori che le balàva, e una comedia teatràl oltre a le poesie de Barbarani e a le sue. Un laóro de squadra, volontari, sponsor e istitussioni. El tuto l'è finìo con un bèl brindisi ne la fresca sera de Quinsàn. 31.05.2024 La Redassion