Ogni tanto gh'émo bóne notissie da contarve soratuto ligàde al bonsénso. De cosa stémo parlando? Ve dise gnénte Cinema Astra de Via Obérdan un tempo Via Gran Czara, 'ndóe iè vegnù a la luçe dei stupendi reperti romani pochi ani fa? L'éra serà da vint'anni e lassà al so destìn fin a quando i so paroni i g'a deciso de sistemarlo faséndòghe un centro comerciàl co' tanto de botéghe. E proprio grassie ai nóvi laóri l'è saltà fóra la Pompei veronese che i dise sia el "piassè importante sito archeologico de Verona".
Ma come l'è riussì a rivàr fin ai giorni nostri? Secondo i storici, a la casa romana de 400mq del IV secolo dopo Cristo gh'è croà zò el quèrto par colpa del fógo bampà su la costrussión, che g'a quertà el pavimento a mosaico, i muri a-frescà e tute le vinti stanse, forsi càmare de un albergo da schèi co' tanto de sistema de riscaldamento. Nel tempo l'è stà sconta da la tèra e da le varie costrussioni, par ultimo el Cinema. La cosa interessante l'è che se cata a metà strada tra Porta Borsari co' la Via Postumia e la Rena e podarà deventàr un lógo importante par la çità e i turisti. El Ministero g'a òferto ai paróni de l'Astra un mucéto de schèi par crompàrlo e par farlo devéntàr un museo. A quanto par el bonsénso l'è riussì a vìnsar e nei prossimi ani anca Verona podarà dir al mondo de 'vérghe la so Pompei.. (Redassión 18.11.2025)
