El mese de 'gosto 2025 l'è caldo par el Comitato Bacanàl del Gnoco, dopo le multe par i problemi al Giardìn d'Istà in gestión, el Comùn g'a cavà "el pato de sussidarietà". Ma no l'è finìa, sui giornài se lése e no'l disémo de çèrto noàntri, del casìn créa al Ministero de la cultura che'l g'a consegnà dei contributi par i carnevali storici italiani compreso al nostro. Parlémo dei ani 2023-2024 par un totàl de quasi 500 mila euri al Bacanàl. Ma el Ministero quando s'a visto denànsi la dimanda par i contributi del 2025 g'a dito al Presidente veronese che la richiesta no la naséa bén e de darghe indrio anca el 2023 e el 2024.
Nel Bando ministeriàl gh'éra de le norme da rispetàr che a quanto dise el Ministero no iè stè rispetè e che pol portàr i rapresentanti del carnevàl nei casini. El probléma l'è che i schèi iè stè zà spesi dal Comitato e dèsso, la nostra tradissión l'è in grave in pericolo. Se no vién sistemà la questión, se ris-cia grosso a Porta San Zén. 'che deve spiegàr le propie rasóni al Ministero (i schèi del 2024 no iè ancora rivè) e de èssar nel giusto come dito nel comunicato stampa dal Presidente. Sui giornài se parla de seràr baraca e buratìni e de far rinàssar el Carnevàl grassie a una Fondassión gestìda in bóna parte da le Istitussioni. No ghe démo torto o rasón a nissuni, parò la situassión l'è vergognosa, el carnevàl dovarìa èssar una festa par tuti e no un bordèl co' in mèso schèi, carte bolàde e tribunài. Co' le nostre tradissioni no se schersa! (Redassión 28.08.2025)
