Dopo la serata finàl de le olimpiadi invernali de Milàn-Cortina drénto la nostra Rena, podémo confermàr quél dito piassè volte sul nostro sito. Verona merita manifestassioni a livèl mondiàl e no solo a livèl provinçiàl. La nostra çità la dovarìa vìvar de turismo e par farlo bisognarìa creàr eventi importanti. L'è da ani che no vedémo eventi culturàli o mostre che pol portàr el nome de Verona fora dai confini provinciali. Par fortuna che gh'émo lirica e fiera che pol dar lustro a la nostra çità, ma l'è massa póco. El turismo e la nostra storia, iè el nostro petrolio che podarìa portàr schèi e posti de laóro.
Con i grandi eventi te pól far conòssar tuto el teritorio co' le so belesse naturalistiche, culturali e eno-gastronomiche e anca le realtà picenine che nissuni par el mondo pol vérghe come le feste locali che porta denànsi la tradissión. Gh'émo 'spariénsa, semo brài nel laóro de squadra, se démo da far come mussi con el nostro volontariato, ma se fermémo drénto ai confini de quartiér.
Gh'è da dir che la burocrassia no ghe dà 'na man a ci fà del volontariato e quindi tante cose che se podarìa far ben a póchi schèi piàn piàn le sparisse. Parché parlémo de le feste locàli? Parché el turista vol védar cose che no véde in giro da altre parte nel mondo e quindi le nostre feste le pòl far conòssar tuto el teritorio soto tuti i pónti de vista. Quindi ghe vol grandi eventi ma ghe vol anca realtà piassè picinine che gira a tòrno. Ma se no gh'émo un evento che porta zénte forèsta e che pòssa valorìsàr al mèio Verona, nissuni se dimàndarà cosa pol èssarghe piassè in là del balcón de Giuliéta o fóra da le mura de la çità.
In pratica, se vive a la giornàda, no se vede piassè in là del propio naso e no se pensa a costruirse un futuro ma se contentémo de quél poco che gh'émo, mèio un òvo ancó che 'na galina dimàn. (El Diretór 23.02.2026)
