Ne la vita par 'vérghe dei risultadi bisón darse da far, anca se, in çèrti casi, basta conossense o tanti schèi. Ma quél sucesso in questo periodo l'è un calcóssa de bèl e incredibile. Una butèla de disdóto ani de Caselón, l'è andà a laoràr nei campi de tobàco tuta l'istà par cromparse un cavàl. Un sogno che no l'è par tutte le scarsèle. In quésti ani, grassie a la só passión e a l'amór par i cavài, l'è riussì a rivàr a grandi risultadi, butando el cór al de là de i ostacoli. Questo so impegno l'è passà sóto a i òci del Presidente de la Fiera de Verona che l'è riussì a realisàr el so sogno.
Cossita a la Fiera Cavài 2025 gh'è stà consegnà 'na bèla cavàla da parte de un alevadór piemontese a la butèla, che no la g'a podù crédar ai propi òci. Cissà in quanti ani la podéa vérghe un cavàl tuto suo, e soratuto quante fóie de tobàco la dovéa binàr su. 'Dèsso con quél sparagnà la pól tentàr de crompàrse una sèla, stivài, braghe e quél che ghe serve par podér 'nar via in sicuressa. Quésta storia la vol farve capìr, che no tuti i butèi no i g'a voia de far un casso, gh'è anca quéi che i s'a sà cosa vol dir far fadìga, sensa preténdar gnénte da nissuni, gnanca da la propia faméia. Bastarìa a òlte darghe fiducia a i butèi e forsi, el mondo, sarìa mèio par tuti. Un grande regàl, un grande gesto che g'a premià, ci ne la vita l'è partì da zèro. (Redassión 13.11.2025)
