Nel comùn de Costermàn a pochi chilometri dal Lago de Garda catémo un balcón tra i òlivi, conossù come Marciaga, località famosa anca par un belissimo campo da Golf. Podémo catàr un bèl percorso lóngo con "Par 72" e le so 18 buse. El clima l'è fantastico e l'erbéta bèla verde te fa végnar in mente i più bèi percorsi de la Scossia o de l'Irlanda. Ma nei ultimi ani el porco sengiàr (cinghiàl) che g'a messo su casa sul Monte Luppia poco distante dal campo da golf, el g'a deciso de nar a provàr el percorso, par certificàr che el zugo sia fato secondo le regole più moderne. El g'a remenà tuta la tèra e cavà su la bèla erbéta fina fina sul percorso con nove buse.No podéa no portàr so fiói a farghe védar che laóro el fa só bupà. Cossita la faméia la g'a provà la belessa de 'sto zugo in lóngo e in largo con grande sorpresa de ci gestisse el Golf club...
El problema l'è presente dal Baldo a la Lessinia passando par la Val d'Adese che va zontà a quél del lóvo e in qualche caso anca a tórno a la çità. Soto elessioni i politicanti i prométe de risòlvar questo casìn, ma come al solito i-è ciàcole e ci vive spèrso ne le montagne g'a paura. Catàrse denànsi 'na bèstia da un par de quintài no l'è el massimo, in particolàr, se la crede de èssar in una situassioni de pericolo. Un problema che no l'è mai stà risolto e no se capisse parché no se voia. Nei ani parò, le bèstie i-è sempre piassè anca parché l'òmo preferisse bandonàr le tère e lassàr tuto a lóre. (Redassión 16.11.2025)
