Berto a Teatro

Berto Barbarani l'è stà protagonista de un celebre successo nei teatri italiani quando el g'a portà el so Giulieta e Romeo da la carta al palco. Come contà dal'articolo de La Stampa del 10 genàr 1929, Barbarani no 'l s'à limità a far l'autór, ma l'è salìdo sul palco in mèso a i atóri del Teatro Sperimentàl, ospità alora ne la prestigiosa Sala del Bibiena del Teatro Comunàl de Bologna. Nel 1931, su le colìne bolognesi, el comediografo Lorenso Ruggi l'à volù el poemeto veronese nel so Teatro de la Caséta (v.foto), deventà co' el tempo Teatro in Giardìn: tra àlberi, frasche e vigne sòto la luna, el s'à ligà così al "teatro verde" e a la tradissión dei "poeti vignaioli". A parte i momenti bolognesi, Giulieta e Romeo l'è stà inserìdo ani prima e precisamente nel 1924, come riportà dal Secolo XX, nel cartelón del vècio teatro milanese de "La Piccola Canobbiana", deventà più avanti Teatro Lirico Internassionàl e al giorno d'ancó Teatro Lirico Giorgio Gaber. Questa l'è la dimostrassión che la poesia de Barbarani la podéa 'ndar assè più in là de quatro righe scrite su la carta. El Diretor

