Vai al contenuto principale

Berto e Isolina Canuti


Quando: 25 Otóbre 2023

Nel genàr del 1900 'na butèla veronese de disnóve ani, tal Isolina Canuti l'è sparìa tragicamente, el so corpo catà a tòchi ne l'Adese da do lavandare, Maria Menapace e Luigia Marconcini el 16 genàr. Isolina la spetàva un butìn dal tenente dei alpini tal Carlo Trivulzio de Udine. L'ufissiàl dopo aver provà a darghe de le "polvarine" par farghe pèrdar el fiól g'a dito:"se te spèti un fiól no l'è de çèrto mio" e "te partorissi a Milàn o te pèrdi el fiól a Verona". Nel famoso processo Trivulzio-Todeschini salta fóra un spegàsso.

Mario Todeschini diretór del giornàl socialista "Verona del Popolo" l'è stà querelà par aver smerdà Trivulzio, dopo che el g'a denuncià 'na rete de militari e borghesi che quertàva la morte de Isolina. In tribunàl el tenente Trivulzio se defénde tirando drénto i amiçi de la "Società del Ciodo", 'na crema de nobili personalità veronesi de "Vicolo Ciodo". Par tentàr de tegnér lontani i sospèti sul çìrcolo, conossù da tanti par i festini e le protessioni amichevoli, 'ufissiàl el dise i nomi dei so importanti membri, el tenente Zunini, Mantovanelli della Reale, el dotor Gedeone Rinaldi, el conte Ravignani e el dotor Antonio Mantovani al tempo diretor del'Arena. Trivulzio g'a dito co' forsa che in quel çìrcolo no gh'éra dòne e no se parlava de politica sensa contàr che la notissia de Isolina el ghe l'avù da uno che passava par strada.

Anca se l'ufissiàl el g'a cercà in tute le maniere de pararse el cul, la parte çivìl la g'a dimandà de métar a verbàl quel saltà fóra dal confronto tra Maria Policante serva da la levatrice De Mori e Trivulzio, un òferta de 300 lire par far in modo che Isolina la perdesse el butìn, fata, da la Policante a la De Mori, faséndo finta de portàr 'vanti la richiesta del tenente. La Policante l'è restà al çéntro dei sospèti de amicissia co' l'alpìn. Tra i vari testimoni gh'éra anca Alessandro Carletti amìgo de faméia de la Canuti, studente de Padova, al tempo in redassión del Gazzettino. El giornalista g'a scoltà le confidénse de Clèlia, sorèla de Isolìna che g'a parla de le intimidassioni a l'ordine del giorno. Vién dito anca de le quatro ciàcole fate dal Carletti co' l'ispetór de publica sicuressa Banchetti e co' el delegà Dallari 'ndóe l'è saltà fóra dei schèi par quertàr el casìn da parte de la Policante. Par paura che i funsionàri i se magnésse quel dito ne l'ufissio del Gazzettino, el Carletti g'a dito a un altro giornalista de scoltàr la ciacolàda da drénto l'armàr. El super testimone scónto in quéla stansa, l'éra el poeta e giornalista Berto Barbarani.

El 31 decémbre 1901 la sentensa l'a dito che Todeschini dovéa darghe un bèl mucio de schèi al Trivulzio e finìr in galèra par quasi du ani. L'è stà rebaltà el processo, no s'a parlà più de un morto ma de una difamassión a la divisa militàr. 'Nar contro a Bèrto e Carletti voléa dir che el giudice dovéa alsàr el quèrciolo anca su un mùcio de robe scónte.(El Diretor)


barbarani isolina