El gran contàgio de Francesco Pona

Ancó parlémo de la pèste, o mèio "Il gran contagio di Verona" de Francesco Pona che g'a devastà la çità de Verona da marso 1630 al 15 marso del 1631. 

Uno dei più grandi testimoni che el g'a contà quel sucesso stando a la fenèstra, l'è stà Francesco Pona, in primis medico ma anca un scritór e filosofo.

Nel secolo XVII, Verona l'éra 'na splendida çità d'arte, che s'a catà nel giro de pochi giorni a far i conti co' un periodo infernàl che s'a scadenà ne l'istà del 1630. Francesco Pona, medico e soratuto testimone el g'a messo nero su bianco quanto l'è sucesso ne la nostra çità, parlémo de 'na vera catastrofe sanitaria. El scritór ne fa capìr, che tuto 'sto deghèio l'è opera de 'na giustissia divina, nata par farghe capìr a l'òmo, che credendo de èssar superbo, l'è riussì a desmentegarse de la fragilità umana. Par capìr quando l'è nata tuta la tragedia, dovémo far un salto a la guèra de sucessión par el Ducato de Màntoa, quando i Lanzichenèchi iè passè par le tère veronesi, trasformando la guéra del podér in un mèso de trasporto de morte. El contagio l'è vegnù fóra, tuto de un bòto, come un vulcàn che sbròfa, par colpa de le "milizie venete" che durante el scontro a Vilabóna nel mantoàn le s'a ritirè drénto le mura veronesi e visto che i soldà imperiali g'avéa ocupà le campagne, i contadini iè scapé in çità, portando la popolassión a piassè de 80 mila àneme. Questo mucio de profughi, forèsti, soldà, g'a spampanà la pèste par la çità, tanto che, el Proveditor sanitario de la Serenissima Alvise Valaresso el g'a fato un decreto par butàr fóra da le mura e mandàr da nóvo nei campi i contadini, in modo da udàr le strade e tegnér el "morbo" a dèbita distansa. Ma par colpa de ci l'è rivà a Verona, el "Gran Contagio"?

Secondo el Pona gh'è un nome e un cognome, el soldà Francesco Cevolini che'l rivàva da Asola o Pontevico e morto el 20 marso del 1630. La tragedia l'è scominçià ne la casa de Lucrezia Isolana 'ndóe el soldà g'avéa catà da dormìr ne la contrà de San Salvàr in Corte Regia. Éla ciapàndo in man le ròbe de l'òspite la g'a inpestà anca le serve e cossita, in pochissimo tempo tuto el rión s'a catà in malatìa. Nel resto de la çità, la popolassión e i dotóri del Colègio no i credéa al "gran contàgio", tanto che i pensava che ci moréa, g'avésse ciapà una punissión divina co' féara o bài ne le buèle. Ci voléa denunsiàr la pèste, come el dotòr Francesco Grazioli o el chirurgo Camillo Giordani podéa passàr par mato a i òci del popolo o impenì de bòte par strada. Cossita el Pona g'a preferì métarse in quarantèna e restàr "immobile ad ogni machina" da metà dùgno a tuto 'gosto, par salvarse lu e soratuto la so faméia dal contàgio.
Stando a la fenèstra l'è deventà un véro e proprio "cronista" dimandando informassioni a tuti quéi che i passàva sóto casa, come ufissiali sanitàri e dotòri o quéi che i podéa nar e tornàr dai Lazareti. La gestión de l'emergensa l'è stà una corsa contro el tempo, caraterisà dal contról durissimo del Valaresso. El Magistrado a la Sanità g'a deciso de far 'na "zona rossa" divisa in Sestieri. Par ogni contrà gh'éra l'elessión de tri deputadi co' "poteri assoluti": el primo cercava i maladi e sbaràva le porte segnandole con' 'na bèla cróse bianca; el secondo dovéa contàr quanti poaréti gh'éra par darghe dòdese "soldi" al giorno e consegnàrghe i beni solo da le fenèstre; el terso controlàva el trasporto dei corpi, la visita dei dotóri e 'l trasferimento al Lazaréto.

L'isolamento fisico l'éra deventà una vera e propia militarisassión architetonica: i vicoli secondari e 'l passàjo tra le contrè i vegnéa muràdi e sbaràdi co' cadéne par divìdar la çità in recinti urbani "impenetrabili" che podéa èssar vèrti co' le póche ciàve de le guardie armàde. Le porte esterne de la çità vegnéa serà bén, tanto che, par çircolàr bisognava far védar ai contròi i "certificadi sanitari" o mèio, "le fedi de sanità". Le péne par ci no rispetàva i bandi i éra gravissime, defàti el Pona ne dise, che l'éra prevista fin a la morte par ci metéa a la "berlina" i morti ne le vie. In tuto 'sto casìn anca la césa g'a fato la so parte, defàti, su pressión del Magistrado, el Vicario Episcopàl g'a fato un decreto ai confessori de no darghe "l'assolussión sacrementàl" par ci imboscava el "contàgio". Gh'éra divieti assoluti del Magistràdo de celebràr qualsiasi rito publico parché la zénte no la dovéa muciàrse. Gh'éra dei çitàdini e dei preti che se ne fregàva de le regole e in gran segréto i celebrava batésimi de butìni restè sensa pare e mare. La zénte in càlche maniera la voléa restàr tacà a la vita de prima, par no farse scancelàr da tuto 'sto bordèl. L'è stà l'ocasión de purificàr la çità da ci andava a manghèl e che ogni giorno sguassàva ne la miseria e ne la "sozzura", dàndoghe la colpa in primis de tuto 'sto casìn. Cossita grassie al Marchese Lodovico de la Tóre, 'sti pòri desgrassiàdi che vivéa in çità iè stè mucè e isolàdi a "l'Ospedàl dei Mendicanti" restà udo, invece quéi forèsti liquidè co' quatro schèi tirè su da le tasse dei çitadini e compagné fóra dai confini del teritorio veronese. El Lazaréto dopo quasi otant'ani l'éra stà finido du ani prima del "gran contagio" e anca qua el Valaresso, el g'a messo de le regole durissime. Secondo el Pona l'éra diviso in "fabriche" e camere destinade a la cura. Par contégnar el casìn e l'aria catìa, le vegnéa divise in "apartamenti distinti" secondo el livèl de la malatìa. Tacà a le camere gh'éra la parte dedicà al magasìn ciamà "sbòro", 'ndóe vegnéa conservadi sóto un "distinto inventario" i beni e i vestìdi de pregio. Secondo el Pona i funsionari publiçi dei "sbòri" i falsificava i inventàri faséndo sparìr ninsòi de séda, s-ciòne de valór e monéde de le famèie nobili par devéntar sióri.

Se podéa 'nar al Lazaréto solo co' i "burchi" su l'Adese. El "nostro" testimone el descrive le sène de dolór a la césa del Crocefisso, 'ndóe intiére famèie, compréso dòne nobili, le caminàva descàlse nel paltàn prima de èssar imbarcàde. Drénto al Lazaréto gh'éra un teatro de soferense: le butèle "vergini" visitade co' la forsa dai chirurghi ne le parti piassè sconte, i butìni iéra vardè da servi malè dai modi no de çèrto gentìli che nel delirìo, a òlte i se butàva nel fiume. El "morbo" l'éra veramente catìo co le dòne che dovéa partorìr provocando aborti veloci par colpa dei "velenosi àliti" e de la féara, co' la morte sicura de mame e fèti. Visto che la gestión no funsionàva par colpa de i grandi nùmari e no solo, el Valaresso, g'a pensà de far un salto de pàrsona par capìr parché le róbe no le funsionasse. Cossita l'à volù riorganisàr el tuto, dàndoghe in màn el Lazaréto ai Frati Capussini co' l'autorità de punìr co' la galéra e pan e aqua i servi. Nel giro de póco anca i dotòri g'a lassà le péne, compreso i esperti del "Colèio" veronese, scancelando ai maladi la possibilità de ricévar le cure. Tra questi segnalémo Francesco Grazioli, Orazio Graziani, Claudio Giuliari, G.B.Pozzo, Alessandro Peccana, Girolamo Massaroli, Francesco Franco e par finìr el butèl de bèle speranse Adriano Grandi, conossù come filosofo, poeta e academico filarmonico e 'l vècio dotór e 'stròlogo Ottavio Brenzoni. El Magistrado a 'sto pònto el g'a pensà che i dotòri podéa darghe le cure da "lontàn" sensa l'òbligo de stàr tachè, invéçe i chirurghi i podéa e i dovéa. I farmarcisti, i spessiàli e i èrbari, par no vérghe a che far co' nissuni i g'a serà tuto. El Valaresso, co' bandi "speciali" e la minacia de multe, torture e gàlera, g'a fato vèrzar da nóvo.

El Pona el ghe ne dise un progno a i dotóri difesi in quel periodo. Le "pome d'ambra e le materie odorose utilisade dai dotòri no le servìa gnénte come dal rèsto l'uso terapeutico de la Triàca utilisà par curàr de tuto, visto che d'istà faséa crepàr piassè persone par colpa de le infiamassioni che la portava.  Par limitàr el "maligno alito" el Pona ne porta l'esempio del caso de Lucca su modèl francese 'ndóe i dotòri i s'a vestìdi co' de le lónghe tòneghe inçeràde co' tanto de capusso e dei "speciali" cristài davanti a i òci. Nel "Trattato" se parla del dotòr Bonaventura Ferrari che grassie a 'sta idea l'è riussìdo a no restàr impestà stando tacà a i maladi. I morti i éra stè mucè sóto i pòrteghi o lassè su le rive de l'Adese al so destìn. Visto che ci dovéa pensàr a scavàr la fòssa no ghe stava più drio dal gran nùmaro e visto che no gh'éra pòsto da nissuna parte, l'Autorità g'a pensà de darghe la possibilità de far nar sóto aqua i burchi co' i morti ciamè "i vascelli della morte". Ci dovéa catàr su i morti par le case, l'éra vestido de rosso, el più de le òlte no se limitava solo a quel "laóro" ma anca a robàr i beni dei morti.

Nel disastro più completo, no sonàva più gnanca le campane "tacevano i bronci queruli", visto che no gh'éra più òmeni che podéa compagnàr i morti. La paura l'éra entrà dapartuto, i pàri lassàva da qualche parte i fiói, le màri i butìni péna nati e ne le case muràde se moréa de fame. Defàti i pistóri a l'inissio de dùgno i g'a pensà de scapàr da la çità lassando la çità sensa un tòco de pan. El proveditor dela Torre a quél pònto el g'a pensà de convertìr i monasteri feminili de clausùra restè isoladi, in veri e propi forni industriali par sfornàr e véndar pan ne le piasse da le "inferìade".  A tuto 'sto bordèl zontèmo quél sucesso el 3 de luio del 1630 al Monte de Pietà, quando l'è andà a fógo co' un patrimonio dal valór de quasi 190 mila ducati; le campana le sonàva a martèl faséndo èco par la çità e co' i soldà albanesi "stradiòti" al servissio de Venessia pronti a tuto par smorsàr el fógo. La 'conomia veronese propio in quel giorno l'è andà in fumo. Segnalémo che l'industria de la seda la g'a ciapà 'un bèl sbèrlón, o mèio, l'è saltà tuto par aria, in quanto la séda, riussìva a trategnér "el velén", par 'sto motivo i telàri i è stè messi da 'na parte; defàti Venessia la g'a proibì a le grandi faméie de marcanti de portàr la só róba fóra da Verona. 

A la fin del libro se lése le tabèle co'le statistiche contrà par contrà che ne fa capìr cosa el g'a provocà el "morbo". Ne le colìne o posti sconti se vivéa piassè invéçe nei riòni come San Stefano o San Salvàr Corte Regia solo el 20% no moréa. Quando finalmente el "morbo" g'a molà l'òsso, i veronesi el 15 marso 1631 i g'a fato 'na processión tra le vie de Verona, partendo dal Dòmo fin a la césa de San Nicolò. Questo cortèo no l'éra solo una "pratica religiosa" ma 'na forma de liberassión che celebrava el ritorno a la vita comunitaria dopo mesi de isolamento nel terór. Le cifre ne le tabèle ne dise che nel 1627 Verona contava bén 53.533 abitanti passando a 20.630 nel genàr del 1631. El "Gran Contagio" del Pona finisse co' na riflessión: la pèste la g'a insegnà ai veronesi che schéi e podér i pól sfantàrse come l'onda e 'l fumo". Anca nel terso Milènio émo visto cosa g'a provocà el Covid19, ma nissuno a la fin g'a imparà bén la lessión. Ghe vorìa piassè umiltà e voia de giutàr el prossimo. Co' la sperànsa che tuto quésto no'l pòssa tornàr e che l'òmo el sia preparà a 'ste tragedie al mèio. (El Diretor 13.07.2026)

"Conoscano i Popoli, che passano come onda e fumo le humane pompe" (Francesco Pona)