El poema de Giovanbattista Spolverini su la coltivassion del riso, un grande sucesso a la corte dei reàli spagnoli.
El grandioso libro de poesia "La coltivazione del riso" l'è un òpera che podémo definìr didascalica, méssa nero su bianco da Giambatista Spolverini e stampà par la prima 'òlta a Verona nel 1758 dal tipografo Agostino Carattoni. L'è de sicuro uno dei massimi capolavori de la leteradura del '700 par la so straordinaria capaçità de missiàr l'elegansa lirica con la precisión sientìfica de una tratado agrario. Ne la prima edissión, sul frontespissio de l'òpera, scominçia co' una curiosità, una dedica a Filipo de Spagna, pensà come regàl a la moiér, tal regina Elisabeta Farnese. El poema l'è diviso in quatro libri che va drio a la vita del riso, da quando vién semenà a quando vién binà; ogni vèrso l'è de 11 sìlabe sensa rima che g'a ciapà ispirassión dal modèl classico de le Georgighe de Virgilio, par un totàl de 4000 vèrsi. Visto che el tema l'éra complesso, Spolverini el g'a preferì utilisàr i termini tènici ligà al dialèto o del posto par far capìr al mèio la so òpera in una fusión leterària de altissimo livèl. Drénto a l'òpera iè presenti anca i disegni de Francesco Lorenzi da Mazurèga de la scòla del Tiepolo portadi su laste de rame co' la tènica de l'aquaforte da Domenico Cunego.
Nel primo libro se parla de "ingegneria idràulica" e de la trasformassión del panorama. Spolverini el ne dise de come el contadìn el g'a rebaltà le "boe", el terén duro che n'a òlta arà te lassa i slòti de tèra e de come g'a diviso e sgualivà i teréni "quadri", ò mèio, "vasche" par la coltivassión co' a tòrno i "cavedóni" o "arzarini" par tegnér l'aqua sempre a la stéssa altéssa. Grassie a de le "ròste" che se podéa spostàr, se desviàva el flùsso dei canài come le fusse de le "ciùse", in modo da bagnàr i campi. Se l'aqua l'éra massa e te servìa el giusto livèl, se parla de stramàsso o tàia e de sfioradór, 'na sòrta de "ciàvega" de quarèi, che menàva l'aqua nei campi grassie a 'na canaléta "seriola" o "zevola". Tra le curiosità del primo libro, catémo anca la polemica tipica del "Secolo dei Lumi" o de "L'éta de la rasón" conossù come "illuminismo", contro el lusso e el modo de far dei nobili del tempo. Spolverini el sparla de le colassioni dei sioràssi fata co' roba da schèi forèsta, come cafè, te e ciocolàda, diséndo che la fa mal e la costa un bòto rispèto al riso de le nostre tère. E par smorsàr la polemica, el s'a inventà una fòla d'amór tra el Dio fiume Tàrtaro e la ninfa Risa, spiegando in poesia come l'è nato el primo terén palustre par sèmena.
Nel secondo libro, entrémo ne la sèmena e ne la crèssita, in particolàr se parla de la fadìga de la "mónda", quando i contadini e le "mondìne" co' i sòcoli da la sóla larga par no sprofondàr nel paltàn, i cavàva la gramégna a man ne la risàra piéna de aqua. Se lése anca de la figura del "sargente", l'ufissiàl idràulico che ghe tendéva drio a ci voléa ciavàr l'aqua, desviàndola al campo tacà. Tra le curiosità de 'sto canto, Spolverini rièsse analisàr al mèio el problema de la "malaria" par colpa de l'aqua ferma, 'ndóe se vede i pòri contadini "dai corpo tristi e deformadi" da la malatìa. Secondo lu, grassie a l'aqua e ai impianti moderni, parò, el ri-scio sanitario l'éra manco presente de un tempo e soratuto gh'éra piassè giro de schèi. E par dar un stampo "legendàrio" al libro el se inventa co' 'na çèrta ironia, una fòla degna de le grandi batàje de l'Iliade, tra i contadini co' fiónde e spaventapassère contro i osèi pronti a magnàrghe quél piantà.
Nel terso libro se passa a la trasformassión del gràn de riso co' la celebrassión de la "medaróla" (mietitura) e de la "mesta" co' el rastèl, operassión che la sèrve par remenàr el riso sul sélese al sol in modo che no devénta smàrso, prima de portarlo a la "pila", nome che nel veronese vegnéa dato a tuto el stabilimento del molìn idraulico. El poeta parla dei so ingranài e de le "monecchie o monicche", sporgense in legno fissàde su l'àlbaro motór par tiràr su i pesanti "pestóni" pronti a cascàr nei "morter" scavadi nel marmo rosso veronese, cossita da smigassàr la "lula", la scòrsa dura e doràda del gràn de riso. No podéa mancàr le "gramegne" infestanti: Gran turba di gramigne infeste; altra spigosa panocchiuta s'alza, altra in giuba diffonde il gambo e i rami, molte al panico ed a l'avena molte simili il seggio altrui rubano e 'l cibo. Sorge, e l'avido piè stendendo pasce il butomo pomposo, il cardo audace, il samolo, il crescion, l'ebbio, il sisembro, il pulegio, la menta, e la natante lenticchia, e l'altra forcelluta, starsi use ben spesso e dominar congiunte. E come in ogni capitolo, Spolverini el ne conta 'na fòla, le mitologiche "monecchie" de legno de la pila costruide da una divinità del lógo come eterno pegno d'amór par una ninfa aquatica.
Par finìr, el quarto libro ne porta in un discorso politico e 'conòmico, el riso come "òro bianco" de la Republica de Venessia, risorsa strategica par darghe da magnàr a la pòra zénte sensa importàrghene da fóra. Riso come roba da magnàr dei pitòchi, che impenìsse la pansa dei contadini ma che pol èssar considerà come piato trionfàl par i banchéti dei sióri. El poema finisse co' una "profezia", el riso veronese che và fóra dai confini nassionali trasformandose in un potente strumento de paçe universàl, de unión e de colaborassión comerciàl tra tuti i popoli de la tèra.
Par i veronesi, questo pól èssar un libro come tanti, scrito da uno dei tanti poeti, ma nel XVIII secolo, la publicassión l'è stà un calcossa de grandioso a livèl europeo. Parfìn Voltaire g'a scrito una létara al marchese veronese par complimentarse del "miracolo poetico" e Giacomo Leopardi ne la so "Crestomazia" el g'a parlà de "La coltivazione del riso" de Spolverini. No ve resta che lésarlo anca voialtri ne le biblioteche digitali.( El Diretor 15.06.2026)