De i canti popolari veronesi gh'émo anca le "Cansonéte", i éra quasi sempre composte de setenari o otonari rimàdi, a strofe de quatro versi. A parte le ultime tre de Ettore Scipione Pighi, le altre iè tirè zò dal saggio folkloristico de Luigi Cestoni / Carlo Sega (1863)
AMALIA MIA
Benvegnudo par la bruma
a racolgier la licensa,
a svanir la me presensa
par più mai parlar d'amor.
Che te disi, Amalia mia,
te si cambiàda de pensiero?
Ghéto el core così nero
de lassarme in libertà?
Si, te lasso in questo punto,
benchè te si un fior de dalia;
non pensar più de l' Amalia,
Slontànate da mi.
Ci sarà che me sostansa,
Ci sarà che me consola?;
Avocata la persona
che contenta el me dolor.
Altra amante, caro Olimpio,
che se ciàma Giusepina;
rica, bela e galantina,
hce te fida ne l'amor.
LA BIGIOTA
Cara la me Bigiota
Mi son de quà del fosso,
e caminar no posso
che i pié i me fà mal.
Se te fà gran mal elpié
no te fà mal la gamba,
Passa da l'altra banda,
Gran delissia del me cor.
LA ROSINA
El vegna su, sior osto,
el vegna a far i conti;
la luna passa i monti,
l'è l'ora del partir.
Avanti de partire
voi far una manfrina,
Aciò che la Rosina
me võja sempre ben.
Avanti del partire
voi far ' na matinada,
gh'è la Rosina cara
me voja sempre ben.
LE BUTELE DE SAN PIERO
Le butèle de San Piero
e le porta el cura-rece;
le và par aqua co' le sece,
calsirèi no le ghe n'a.
Le butèle de San Piéro
e le porta el grombiàl streto;
e jè bèle nel viséto,
e jè marse nel figà.
LE PUTELE DA LE STELE
Le putèle da le Stele
iè color de le candele,
le discore da par éle
che morosi no le ghà.
Le putèle da le Stele
iè color de l'erba cota,
la ghe fuma, la ghe scota
no poderse maridar.
LE PUTE DA CASTELROTO
Le pute da Castelroto
le và via che le par dame,
le patisse 'na gran fame
e le dorme sul pajon.
Sul pajon e su la paja,
come un picolo cagnolo,
con un strasso de ninzolo
tuto roto e taconà.
TERESINA
Ghò magnado e ghò bevudo,
ghò dormì con Teresina,
la m'à đà 'na medissina
che i spessiai no i ghe n'à
VEGNI VEGNI TERESINA
La me mama la me ciama
con 'na voçe fina fina:
Vegni, vegni, Teresina,
lassa andar quel birichin…
Su la porta ghe voi stare,
fin che son da maridare;
fin che son da maridare,
mi voi far quel che voi mi.
LA MARIETA
La Marieta la và suzo
La se buta zo sul leto,
con dolore e mal de peto
la scominsia a sospirar.
Cosa sospirito, Mariola,
che per vu l'è manco male;
Ciapa, ciapa l'ucia e diàle,
e scominzia a laorar.
Ghò le mane che me trema,
ghò la vista che me sbàlia,
ghò l'amor che me travàlia,
e no posso laorar.
Ciapa, ciapa stà camisa,
faghe, faghe le busête;
le sia larghe le sia strete
o che tristo laorar.
EL MARIO
I vol che me marida,
I vol che toga un vecio;
la sera co' và in leto
el spua de quà, de là;
el la ciapa par 'na recia
Mario, voltève in quà.
Mi son poro vecéto,
ghò estro de sponsàr.
Dovevi tor 'na vecia
e de la vostra età,
no tor stâ giovineta
par farla consumar;
mi son 'na giovineta
ghò estro da matesar.
