De i canti popolari veronesi gh'émo anca le "Matinade" che vegnéa cantè da i butèi soto al balcon de 'na butèla par desmissiàrla e védarla 'péna svéia. A difarénsa de i canti de la séra la musicalità l'è piassè alégra e gioiosa, A la butèla ghe vién dito che ghe soméia al sol, a un fior co' la rosàda o a la stéla del matìn. Grassie al folklorista Ettore Scipione Righi te pol catàr càlche esempio de le valàde veronesi.
ROSINA
Rosina bela da le tre rosine
m'à incadenà el cor con tre cadene;
se tre cadene se n'à roto una,
de tre morose no ghe n'è nissuna:
una l'è morta e l'altra l'è malada,
una me l'à robà el me camarada…
LA MAMA DE ROSINA
Tuti me dise e tuti me dimanda:
Cosa fà la Rosina e vien la granda?
E la vien granda che la fà l'amor,
e a la sò mama la ghe dà dolor;
e la vien granda che la fà su el leto,
e a la sò mama la ghe dà dispeto.
7 BELESSE
Sète belesse g'a d'aver 'na dona
quando che bela se vol far ciamàr;
larga de spale e streta in senturèla,
sète belesse g'à d'aver 'na bela;
i oci mori cole bionde tresse,
quele se ciama le sete belesse
BRUTA
Tute le bele se marida st'ano,
mi che son bruta l'andarò a'n'altr'ano ;
tute le bele g'à bruto moroso,
mi che son bruta l'è beło e grazioso ;
tute le bele g'à bruto parlar,
mi che son bruta fasso inamorar.
LA PORTA
L'è tanto tempo che no dormo in leto,
dormo su la tô porta, anima mia;
su la tô porta mi m'ò fato el leto,
vèrzeme, vita mia, che son Togneto;
su la to porta ghè 'na dura prea,
vuto che dorma? fame compagnia;
su la tô porta ghè d'un duro sasso,
vuto che dorma? pòrteme un stramasso
L'ANÈLO
Vùto végner con mi a far 'na volta
su la contrà de la morosa mia?
La trovaremo soleta su la porta,
ghe daremo man la conduremo via;
la sarà su la porta e sul portèlo,
ghe daremo man e metaremo l'anelo.
ZEMBALIN
Sona pur, zembalin, sona pur sona,
e fate pur sentir a la lontana;
e se ghe fusse qualche bel'umori,
sona pur, zembalin, daghe dolori;
e se ghe fusse calche bel sogèto,
sona pur, zembalin, faghe dispèto.
VIOLIN
O sonador che sona de violino,
sonè par mi ma sonè pur pianino;
sonè pianino che la cà l'è bassa,
e che no senta la gente che passa;
sonè pianino che la cà l'è sola,
che no senta la gente che gh'è fora.
RONDINÈLA
O rondinela che dal mare viene
pórteme nova del mio caro bene ;
pórteme nova se l'è morto o vivo,
se l'aqua de lo mar me n' esse privo;
pórteme nova se l'è vivo o morto,
se l'aqua de lo mar me l'esse tolto.
NO L'O VISTO
Al sera e l'altra sera jè dò sere,
el bene mio non l'ò visto vegnêre:
aspeto un' altra sera che no'l vegna,
ghe mando a dir che altre strade el tegna
speto un'altra sera che no'l veda,
ghe mando a dir che d'altra el se proveda.
EL NANE
El me moroso che l'è nome Nane,
le ciave del cor mio el g'à in le mane;
el gh' ià in le mane e no 'l me le vol dar,
démele, Nane, e no me fè penar;
el gh' ià in le mane e no 'l me le vol dir,
démele, Nane, e nô me fè morir.
EL POVEIO*
Mètelo là, Mêtelo là ch'el vedo,
l'è bianco, rosso, el me par un povejo;
se l'è un povejo, zimèghe la coa,
se l'è el mio caro ben la strada l'è soa;
se l'è un povejo zimèghe le ale,
se l'è el mio caro ben lassèlo andare;
se l'è un povejo zimèghe lo beco,
se l'è el mio caro ben metìlo in leto.
*farfala - falena
EL MOLINAREL
Molinarel da la bianca farina
coi oci el varda e con le man rampina*;
coi oci el varda se gnissun lo vede,
...E co le man el raspa sensa fede;
coi oci el gira se gnissun lo varda.....
E co le man el raspa e el mete in tasca.
*uncino
DOLSE PAROLINE
No vedo l'ora che vegna stà sera,
Chè presto vegnarà sabo de sera;
Sabo de sera cossa g'avaréto?
Le dolse paroline del me Bepo.
Sabo de sera cossa g'avarìo?
Le dolse paroline del ben mio
MATINADA
Son vegnù quà par far 'na matinada
A la morosa del compagno mio;
E no'l m'à dito andôve che la staga,
E el m'à dito che la stà quà drio;
fasso stà matinada e no la sento,
credo de farla a ti, la fago al vento;
fasso sta matinada e no la vedo,
credo de farla a ti, la fago al fredo.
O CHITARINA
O chitarina te me dè gran pena
quando te sento la note a sonàr;
più d'una sera son restà da zena*,
chitarina per vègnerte a 'scoltar;
o chitarina se te fossi mia
le corde d'oro te voria crompar;
le corde d'oro e le corde d'arsénto,
o chitarina, te si el me contento.
*restàr sensa magnar a çéna
LUIGI
Luigi bel da la bela velada,
la sarà vostra quan' l'ari* pagada:
Quando l'ari pagada dal sartore,
Narì da la Rosina a far l'amore:
Quando l'ari pagada dal mercante
'Narì** da la Rosina a far l'amante.
*avrete **andrete
SEREN CO' NÙGOLE
Vardè che bel seren s' à nuvolado
el par che võja piovar e po' el passa;
così fa lo mio ben, l'è inamorado,
ama la bela dona e po' el la lassa.
BARDASSEI
Quanti ghè n'è de questi bardassèi*
Che i fà l'amor seben che jè putei;
i và a la festa, i cata la morosa,
o i ghe n'à un soldo da torghe la rosa.
I ghà le scarsèle con dei botoni
e i và digando** che jè soldi e troni***.
*monelli **disendo ***lire venessiane
BELESSE
La bona sera te la dò piansendo
e lagremando par tuta la via;
le mane al pèto e la boca disendo;
ando' se vedarénti, anima mia?;
anima mia, anima mia, che feto,
le to belesse a ci le lassarèto?
le me belesse no jè da lassàr,
parché soto tera jè da portar.
PICENINA
Vùtè védar la dona quan' l'è bela?,
Várdela a la matina quan' la leva sù
tajè la végna e tajèla 'gual basso
la dona picenina g'à curto el passo;
tajè la végna e tajèla 'gual tera
la dona picenina l'è sempre bela.
