Dal 29 noémbre al 1 deçémbre 2024. I dise sia nata prima de l'emigrassión cimbra ne le nostre montagne, forsi nel secolo XII, anca se, a quanto par, l'éra dedicà in primis a pégore, vache e porsèi. Defàti, fin dal secolo XIV la "fiera dei porchi" co' porsèi e vàche, vegnéa celebrà tacà a la strada par San Bòrtolo 'ndóe 'dèsso gh'è el camposantìn invéce quéla de le pégore te podéi catarla poco più in su a Tretene. Par i bogóni, in cimbro "snékan gaspearat" no gh'è documentassión ufissiàl scrita se no quéla conossù de pare in fiòl e passà de bòca in rècia. De sicuro l'è, che a la Triga su la strada par Selva gh'éra el "marcà dei bogóni".
Nei secoli, el marcà dei bogóni el verzéa a le 5 e mèsa de la matìna, quésto parché, ci g'avéa da recuperàr "la dèçima" se presentàva piassè tardi, defàti i dassiài de l'Abassìa de Badìa i convocava ci g'avéa in fitànsa i terèni o i-éra paróni de bèstie o g'avéa produssión de fruta e verdura par farse dar i schèi.
Nel 1903 catémo un articolo de Berto Barbarani inviado par el "Il Gazzettino": "C’era il mercato delle lumache che richiamava frotte di gente dai comuni vicini per vendere prodotti di ogni genere ma soprattutto lumache". Vai a la storia
Ve invitémo a far un salto a Sant'Andrea de Badia Calavena par gustarVe anca i Bogoni co' la Pearà e vìvar una bèla giornada in alegrai! (La Redassión)
