Parlémo de polenta, che a Verona vién spesso e volentieri compagnà da la Rénga pèsse dei mari del nord rivà fin da noantri. Pietansa che un tempo l'éra consumà in gran quantità provocando la famosa Pelàgra. La Polenta la se compagna co' tuto magari co' do bèle féte de sopressa o co' i osèi.
POLENTA E RÉNGA
'Sa ghe vol:
- Do-trè rénghe,
- un bicér de oio de oliva,
- polenta,
- asédo a piasér
Come far:
Netàr el pésse, suca, cóa, résche. Cósarlo su la gradèla e consàr el tuto con l'oio. Se consilia polenta calda o polenta brustolà tiepida. Finì el carneval, "Mèrcoli de le Céneri", podì 'ndàr a la festa de Parona a gustarVe 'sto magnifico piato, 'ndóe da ani i le cusina veramente ben. La Renga nasse ne l'aqua e more nel vin....quindi un bicér a la nostra salute. Me racomando de no béar massa vin...
POLENTA E OSÈI
'Sa ghe vol:
- seteçento gr. de oseléti netàdi
- çènto gr. de panséta,
- salvia q.b.,
- mèso bicér de oio de oliva,
- çinquanta gr. de botiér,
- polenta,
- sal,
- péar.
Come far:
Bisón netàr i oseléti, cavàndoghe oci, sate e passandoli sul fógo, e póco dopo bisón vèrzarli. Consarli con sal e péar, metendoghe a tórno la panséta, fissada con un caùcio da parte a parte. Cósar ne la téja dopo aver rosolà el botiér e diése fóje de salvia, po' a fógo lento roersàrli zontàndoghe un póco de botiér che el deve desfarse. La polenta bèla soda, la deve èssar tajada del spessòr de du schèi e postada arénte ai osèleti con un póco de pocéto.
